Ub 16 - Fanawbuid tagsibaliwas Fakayabian

Ub Naringang

¹ Ay Ub nabalus te,

² “Siginan yay ebi nadungug kwan takatanya. Abat ngate am namasun angku, nafaksvn wayam ku fagidapun.

³ O yam gfaragang nung am garingang at mauri? Nataw tagfasagsagan si ay amatanganan ay fagyudun gfaragang nu gfabadbaboan am angku?

⁴ Anggan am, nu nadalan di am kata ku nadalan fag fagidapun, malong kyangay ro sa ayu kata ay nalong sa angku.

⁵ Dewa katanya, kwa gfakamulun takatanya, nu bunway ku fagnanlongun sa ayu tagfabitsug tua ay tagfasun ayu.

⁶ Dewa kngap ro garingang, gidapan kway gugat, ay dewa kngap ro naragangan, ku fagidapun wa kalyam.

⁷ Dius, nafamomuy o angku ay nafamin fagayu ku fagagbilugun.

⁸ Nagamat o angku, ay kalag tua ku fagidapun. Nafaniwang o angku ay siginan takatanya katsi e gamatangan te, e asalanan au.

⁹ Dius, siginan am dotama nafawayan o angku, ay kata o sik tagfangagat fag mela at narufa ku faknul, ay gfaringgit o am ngay bagang, ay glibayung o angku.

¹⁰ Fagayu taw gfalingun angku, ay gfalang ku fingi laman gfapla angku, ay kanya fagayu masadi gfawayan angku.

¹¹ Dius nafon wa angku sat mauri fag taw ay naukas angku sat malimu fag ngay taw.

¹² Ebi mabayan ktua. Ay kanya nafauri angku, ay nated ku liug ay narugut, ay nawat angku at fagfanaun.

¹³ Ngay takamusuy naligung angku. Kanya we afanyu ya gfana angku, ay nafana ku ngay amuslun, ay ku mayat anbuksang ay anbusbus sas daga.

¹⁴ Ay kanya wa gfaragang nu gfalang angku. Kanya kata sik tagfawayan tagfataglayun gfawayan angku.

¹⁵ Nasulun au saku ay namalunggung au sisad daga laman gfalag au te, kabalu au, ay si au sad dafug kata nu nababawan au.

¹⁶ At kaksvnan ku nawayway, ku mata anraska, ay siginan ku fakabaluun, ku balat mata anlayung.

¹⁷ Dewa katanya, kdoma e asalanan, ay matuyan oma ku darangin.

¹⁸ Ankata au sik nafabul fag taw. Glong au sas daga te, ‘Lag yap gfalyam ku taguk yakmay kban e fagmasineun.’

¹⁹ Katsi ku tagfatuyan tagsi tuas banwa; kanya tagfatuyan te, kdi e asalanan.

²⁰ Ay ku tagfatuyan ku fagadgalangan wan. Ay gwayway au get sas Dius fanggubukun.

²¹ Ku tagfatuyan gfainfanyuan sas Dius laman sa angku, kata sik taw taget laman sat fagadgalangan.

²² Aroro waban ngayu yak banwa nu gleleg au ay sanya ginan glo kwan ay kwa ban kafoli ya.