Ub 15 - Fanawbuid tagsibaliwas Fakayabian

Elifas Naringang

¹ Elifas tagsiginans furuan Teman nabalus te,

² “Taw at ke fagsafulun di glong at yud e masuad.

³ Kanya di garingang at yud e masuad laman gfabadbaboan, ay di garingang at yud e fanambagun.

⁴ Dewa katanya, siginan am ngay nalong, tibak taw wa gsuyu ya Dius, ay wa kaylat ya gseg anya.

⁵ Siginan am asalanan glong o at mauri, ay am longan kata sik taw tagfanuksuk at longan.

⁶ Bunwa au ya tagfoyung emu te, gafaurianan o, aroro am bibig wan tagfatuyan sabaliwa emu.

⁷ O nu glong o, o wan taguna fag taw o ay nunda ansalug wo gina yay yud e ngay buksul?

⁸ Ay o nunda nadungug wo Dius at ngay algan? Ay o nunda o way lang at ke fagsafulun?

⁹ O ay saful wo em fagyudun nasaful? Ay nataw am nayamagan em yud yay anyamag?

¹⁰ Anke fagsafulun ami siginan sa ngay mafagtainan, at mafagtainan yap tua am mama.

¹¹ O nunda yo kasun Dius at famasunun sa emu, ay at ngay longan at malukme sa emu?

¹² Wain am fagnafaningun am namatangan? Nataw at nafamomuy emu siginan at matuyan

¹³ laman kadotama o Dius ay garingang o at mauri sa anya?

¹⁴ O nunda sik taw makatu gugali at yud e malong, o ay matuyan sis Dius at daga salubangan?

¹⁵ Dius wa fia gafanud at ngay tagbarita; tagsis banwa fag ngay awatan nu dway fia masine sit daga salubangan,

¹⁶ kaugat wa ro ngay taw tagasalanan ay tagugali gugat at mauri.

¹⁷ Ub, dungugani angku. Namoyung au ay nanlong sa emu ku nagdalanan fag ngay fagidapun.

¹⁸ Ku fagnalongun kata ngay taw at ke fagsafulun tagsiginan tua at ngay mangaguyang.

¹⁹ Kanya way lang fagayu tagagbilug ste fag talun, ay ye ndasug ngay taw tagsiginan tibak talun.

²⁰ Ay at mauri fag taw gidapan kaduge gleleg.

²¹ Kabavn e fakalimuun way ay dewa gina manabayan fag buknga, kanya kalimu way gugat te, e namawayan manga anya.

²² Kanya kayudbak glao sasad dulum, aroro gamatangan te, e mafabul anya.

²³ Kanya nusnga nday way lang nu grvbvy at fakonun, ay kanya nasaful te, gakabulun wan.

²⁴ Kanya kaugat yay nu kalimu, kata sik fun nu mafalganan namawayan at ngay fawayan.

²⁵ Anud anfasludan sa anya takatanya, aroro kanya nafawayan ay nafamabo at mabalyanan fag Dius.

²⁶ Kanya kata nu gted at mogat fag famalabag, ay mafalganan namawayan Dius.

²⁷ Katsi, kanya dewa mataglu ay maramraman,

²⁸ kanya ban namanwan way sa sangay furuan at kinrasras, ay sa sangay bale at yud e gbanwan ya, ay sa takaiklas wan.

²⁹ Kanya wa kae ramraman ya. At ramraman gakaminun wan, ay at ngay ramraman wa kafamut ya.

³⁰ Kanya wa masaruy ya fakabulun, kanya ban umkata sik fun kayu at sanga takairug. Ay Dius sayginan way guyup fagayu at ramraman.

³¹ Kanya nangus lag gdaya at sadili siginan nu gafanud sas nusnge wain at yud e tungkul, aroro kanya ban we bulan sanya ginan fagayu.

³² Masakit kadasug sa anya faurianan ay at ngay ramraman umkalyam wan.

³³ Kanya umkata sik tanum wat ubas takatong wan at rawvg dewa melo yay, ay kata sik fun kayu ulibu takalangke at barugwak.

³⁴ Ngay taw at yud kalimu Dius kabul wan ay wa kae ngay sugfun. Umkirug ban at nawat fag ngay bale tagsiginan way sfamaylatan.

³⁵ Ay kabavn kanya fagayu at amatanganan sa way at namauri, ay gfalganan way laman nanfandaya.”