Ub 14 - Fanawbuid tagsibaliwas Fakayabian

¹ Taw at leleg wa ngaba ay ngayu at fagidapun.

² Kata waymi sik barugwak at kinrafad, takalangke way vtv, ay kata yangay mi sik aninu takalyam way vtv.

³ Nu katanya, Dius, wain am fakaylatun yay gulit emi, ay am fakaylatun yay namaurianan emi sa am fagfawabiluganan.

⁴ Sinu at malong te, sik tagasalanan fag taw di e kalong? Duan, nusdi sadi we mafafalong takatanya.

⁵ Siginans fagsigadan nafalganan wo sik taw at leleg te, kaduge way nya, ay wa glangfe kata am nafalganan.

⁶ Nu katanya, fabayani way lang anya, laman gtungkud tua kata sik tagfakamulun nu gfiangalay siginan at fagfakamulunan.

⁷ Nu e nafuan sik kayu, e fagsegun yay te, gtugbung yay ban gdog.

⁸ At lalid dewa madanama wan, ay at nagtudan anyango wan,

⁹ nu nke mamam ro, umrugme, ay gdog yay gtugbung kata nu bagu katanum.

¹⁰ Dewa katanya, sik taw nu nbul wan, nalyam yangay anggan at fagmabitsugun, ay nu dway gengasan ya, kanya wan at fakatabuan.

¹¹ Nu setain sik lino nu garimanan kalanggang, ay sik ngay liskung nu kagong,

¹² katanya yangay sik taw tagakabulun wan, wa makatu ya kalunggung, ay wa kafulo ya yakmay ban banwa ankalyam.

¹³ Dius, suksuki angku sa sangay kinbul at talun, yakmay o nafalyam am dotama sa angku, ay falganani yap sik buknga sabaliwa nu nangamatang o angku.

¹⁴ O nunda sik taw at kinbul, gdog yay ban gleleg? Dewa katanya, gagwanta kwan ku ngay fagidapun yakmay au anlangfe sas fagmanabayanun.

¹⁵ Dius, gina o guro angku, gbalus au, ay kesug tuo am nawat fag taw.

¹⁶ Ginanya ban fag ngay menit saful o ku ngay nafakamulun, ay di ban o gamatangan ya ku ngay asalanan.

¹⁷ Ay gfalyam ban o ku fagmauriun kata nu masuadan si sik fagsuadan, ay natabun laman wo glag ya.

¹⁸ Dewa katanya, nu setain ngay buksul nu kagubang ay ngay gang nu kabaras siginan at fagtungkudan,

¹⁹ ay nu setain ngay gang nu kayangfis familugan nu gdalan gugat, ay lutuk nu kagubang aroro maksvn nu karak, katanya yangay nu gfalyam o ngay taw at fagsegun.

²⁰ Kabavn gbabo o ay gfabul ngay taw, ay kanya nu nbul wan namabali o at kamatan.

²¹ Kanya wa nasaful ya te, o e kesug yay at ngay sisian, ay o mannga gafaplan wan.

²² Ay kanya at fagamatanganun sa way lang baliwa at fagidapun ay at fakabaluun.”