Ub 13 - Fanawbuid tagsibaliwas Fakayabian

¹ Nalag kwan ay nadungug, ay natogdungug kwan fagayu ay nalong.

² Ay saful kyangay ay fagsafulun fag fagsafulun, nu katanya, wam mafamatungudun ya sa angku.

³ Dewa katanya, kwa namabadbaboan ayu sabaliwa ku kayaunanan, nu bunway nu namadasug au ku kayaunanan sa tua at mabalyanan fag Dius.

⁴ Ay fagayu am, kamuag wayam. Fagayu am kata way am sik ngay tagfafia at yud makatu gfafia.

⁵ Nu masine, lag am garingang. Fakatanyai tua at masine ay fakamulun.

⁶ Glong au ayu te, dungugani ku longan.

⁷ O nanggubuk ro am Dius siginan ay fakamuaganun?

⁸ O gfadiuganan am anya? O ay ggubuk am anya?

⁹ O ay Dius ro manga nu nainsaful ayu, o e lagan tua ro ay fagmasineun? Lag am gamatangan te, madaya way ro am anya kata nu gdaya am ngay taw.

¹⁰ Matuyan Dius maiyan way ayu dewa am gfadiuganan anya.

¹¹ O nunda wam kalimu at fagmabalyananun?

¹² Ay ngay longan fagayu we fagmasineun nu bunway kata way sik dafug, ay fagayu ay ngay fagmasineun kata way sik tikung takarufa.

¹³ Kaduge au garingang, am dungugani way lang, ay fabayani way lang ro angku nusnga setaw ro at kumdasug.

¹⁴ Mafalganan au gfon ku leleg.

¹⁵ Dius dewa gfabul wan angku e fagsegun kyay gugat si anya, ay e famalus kway gugat sa anya.

¹⁶ Tibaginan ro, siginan takatanya kalangfe ktua, aroro we taw mauri at manangakbang anya.

¹⁷ Dungugani fia ku longan.

¹⁸ Katsi mafalganan au gfoyung sabaliwa ku sadili, nasaful kwa te, kdi e asalanan.

¹⁹ Sinu at mafatuyan te, e asalanan au? Ay nu e asalanan kway, ang kway lang maragangan yakmay au anbul.

²⁰ Dius, ku fagetun sa emu dua. Nu nafon tua ro wo angku, kwa gsuksuan ya emu.

²¹ Faragangi wan nu gfaurianan o angku, ay lag gfadasug sa angku ngay faurianan at malimu.

²² Fakamatoani angku ay gbalus au emu, ay mannga au tagaringang sa emu ay balusi ro angku.

²³ Nataw ku nasalan ay ku asalanan? Falagi angku ku fakamaboun ay ku ngay nasalan.

²⁴ Wain am fagsaruyanun angku ay am fagtuyanun angku te, am fawayan?

²⁵ Wain am fagfalimuun ay am fagfafaloun angku? Kata kway lalab at fagfalayugun fag don ay fag naglayapan.

²⁶ Ay griruk o at nafamalingun tagfauri angku, ay gfataip yay o fagayu ku asalanan ebi gina au masisian

²⁷ Kata nu nasiuk o salambitan sa ku bitis. Galay au nasiklang gulit o angku, ay galo o ku nagdarafan.

²⁸ Nu katanya, kata kway sik fagagbilugun takarasras ay sik ngay fatung nu kon sik lanbung.