Ub 12 - Fanawbuid tagsibaliwas Fakayabian

Ub Naringang

¹ Ay Ub nabalus te,

² “O nu glong am, am way lang ke fagsafulun? O gamatangan am te, nu nbul ban am wa ban e sawad ya tibak taw at ke fagsafulun?

³ Au, e fagsafulun kyangay kata ayu, ay wam malong te, gtungud tuam angku. Saful kyangay fagayu ay nalong.

⁴ Dewa katanya, ku ngay fagadgalangan gfalingun kase angku, dewa au matuyan ay deyud au malong, ay Dius dewa nabalus ku ngay darangin.

⁵ Ngay taw tagbanwan manabayan gfalingun tagidapan fag ngay taw.

⁶ Dewa katanya, takamabul fag ngay taw manabayan nu gbanwan, ay ngay taw takauri Dius maseganama tua, dewa katanya, kanya fagayu at fagsegan at sadili way lang fagmakatuun.

^7-8 Atoglagi tua ngay mangilafang taglao, taglayug, tagalafang, ay tagfioan.

⁹ Aroro kanya fagayu nasaful te, Yawi wan at nawat anya fagayu.

¹⁰ Fagayu at awatan at ngay leleg siwa at daluap, ay anggan taw at engasan.

¹¹ Taw at talinga fanginsaful te, inday at masine ay at mauri fag longan kata at leplep nu gfaskud fakonun.

¹² At mafufuama, ngayu tua at fagsafulun. Aroro nu kaaduge wan at leleg, kaugat yay at fagsafulun nu kayu.

¹³ Dius way lang at kinsak at fagsafulun ay ke fagmabalyananun, kasakan yangay at fagtogdungugun, ay matuyan at ngay famalun.

¹⁴ Dius at narasras, we mafasine ya, ay nu naubung, we mafalfas ya.

¹⁵ Kanya ro nu nafasiwang way arak, lutuk ro kagong wan, ay nu nafarak way ngap ro, maksvn nu grasras fagdaul daga.

¹⁶ Kanya e fagmabalyananun ay e fagsafulun, ay magbilug tagfandaya ay at nadayan.

¹⁷ Kanya gfayud e masuad ngay tagfangatulun at fagsafulun, ay gfayud mamatanganan ngay tagwabilug.

¹⁸ Kanya gaiyan ngay fun siginan at mesa faglunggungan, ay gfafagsuguan sa tibak fun.

¹⁹ Kanya gfayud e masuad ngay tagfon fanggalangun at ngay fanambagun ay tiba yak taw at ke fagsafulun.

²⁰ Kanya gfaragang at fagfatigwanan fag ngay tagfoyung ay gbul ngay mafagtainan at fagsafulun.

²¹ Kanya gfauri ngay fun, ay gbul ngay taw at mabalyanan at fagmakatuun.

²² Ay kanya gfasure at ngay masuksuk, ay kanya gfasik mayamag dulum.

²³ Kanya gfabitsug tibak talun at ngay taw ay giklas tibak talun, ay gfabia tibak talun ay sanya ginan gfarapyag anya fagayu.

²⁴ Kanya gfayud e amatanganan fagayu fun, ay nanamalyam kanya fagayu sas talun at yud e taw.

²⁵ Nu katanya, kanya fagayu gyakapan sad dulum, ay granranugan kata sik tagalangu.