Ub 11 - Fanawbuid tagsibaliwas Fakayabian

Sufar Naringang

¹ Sanya ginan, Sufar tagsiginans talun Naama nalong te,

² “Wa masine gfalangfean tuy am ngay nalong. O masine gtap te, sik taw at mabarisan we asalanan?

³ O nu glong o, am ngay nalong yud e fanambagun mafafaragang emi, o ay nunda nu glong o wami masalag nu kamalingun o?

⁴ Nalong oma o te, matuyan am foyungan, ay di o e malong sis Dius at daga salubangan.

⁵ Dius ganangaringangun wama sa emu,

⁶ ay gfasure sa emu am yud yay nasaful fag fagsafulun, aroro at matuyan fag fagsafulun e duak masuad. Sumaful o nangus te, Dius nafalyam tua tiba am asalanan.

⁷ O makatu way o kayamag sabaliwas Dius? O mananginsaful o at Mabalyanan fag Dius at fagyudun e kurang?

⁸ Kanya abat yap sbanwa ay abasad yap tua sfagfolian ngay kinbul.

⁹ Gtungud yap tua fagdaul daga ay labi yap tua dagat. O nunda mafaladlabian ro wo am fagsafulun sas Dius?

¹⁰ Dius ro nu nagamat emu ay nu nataban sa sangay taginsaful ay nafaubung, o nunda ro e masalag anya?

¹¹ Dius saful way nu sinu tagfanuksuk ay kanya we fagyudun saful ngay taw at fagmauriun.

¹² Madulo way yud e fagsafulun nu nke fagsafulun ay madulo yangay sik asnu talun nu griangan sik taw.

¹³ Ay nu matuyan tua ban o sas Dius, ay nu kakbang tua ban o sa anya,

¹⁴ ay nu gubun tuo am asalanan, ay anggan am ngay kalongan nu gubun tua at ngay asalanan,

¹⁵ anud di ban o e fakaplaun ya, ay umkaksvn ban nu gbanwan o manabayan, ay di ban o e fakalimuun ya.

¹⁶ Wa ban o gamatang ya am nadalan fag fagidapun, ay kalyam way lang ban kata tagfamilugan fag mamam.

¹⁷ Am leleg ban amayamag yap menit nu gdamlag gina sis buknga menit. Ay am dan fag ugali tagsisad dulum, umtubus sik bagu fag ugali kata yamag gina bagu kamenit.

¹⁸ Ummanabayan ban am leleg, aroro e fagsegun wo. Dius gdiri emu ay mafiangalay tua ban o manabayan.

¹⁹ Gina ban o gtiug, di e namalimu emu, ay ngayu ban at nanget gubuk sa emu.

²⁰ Dewa katanya, at mauri fag ngay taw umbalu ban ay we fagnantungulan ya. Ay fakabulun way lang at fagsegun.”