Ub 10 - Fanawbuid tagsibaliwas Fakayabian

¹ Kwa kaylat gleleg, ay nu katanya, kamayud kwan. Glong kwa ku amatanganan at mauri.

² Katatuy ku longan sas Dius: lag o gtap angku te, sik tagasalanan au. Longi sa angku, nataw ku asalanan sa emu?

³ O guseganan way o gfaidapan angku? Wain ro am fagaiyanun am nawat, ay gfadiuganan at mauri fag ngay taw at algan?

⁴ O nu gdama o kata sik taw nu gdama?

⁵ O am leleg kaba way staw at leleg?

⁶ Wain ro am fagrvbvyun yay gugat ku kakurangan ay ku ngay asalanan?

⁷ Nasaful wo te, kwe asalanan. Dewa katanya, we mafaago angku siginan am daluap.

⁸ O wan at nalaga ay at nawat angku, ay katsi namaidapan wo angku.

⁹ Amatangani, nawat o angku siginans lutuk, o ay katsi namafoli wo angku sasad lutuk?

¹⁰ Kata sik susu bilug at kindai, katanya yangay nu kawat o angku si ku mina at basad ungdan.

¹¹ Nafae balat o ay nafae faknul angku, ay nawat yangay o ku ngay bini ay ku ngay ugat.

¹² Ay sanya ginan, nafon o angku leleg, ay nesug o angku ay nadiri.

¹³ Dewa katanya, nasaful kwan am algan fia sa angku.

¹⁴ Nu nke asalanan kway ro, gulit ro wo gugat angku, ay wo gtap angku te, sik yud au e asalanan.

¹⁵ Anke asalanan kman ay kdi e asalanan, afanyuan kway gugat, ay grungan au kapla, ay maksvn nu gidapan au.

¹⁶ Gina au gakabangkadun, kaylat o nanggamat angku kata sik liun nu gfanaya laman ggamat at fagnangonun, ay namaurianan o angku siginan am fagmabalyananun.

¹⁷ Gfamut wayo ku ngay fagidapun, ay kaugat nu kadotama o angku, ay gfawayan o gugat angku.

¹⁸ Wain am fagnaylatun yay nu kasalug au? Ginanya nangus anbul kwan, ay wa nangus e nalag ya angku.

¹⁹ Wa nangus e nawat ya angku. Ginanya nangus anbul kwan, ay nataglayun sas fagfolian.

²⁰ Wa ban ngaduge ya nu gleleg au, nu katanya, lag o kasalag ya angku, laman umke buknga kyay guseganan,

²¹ nu sa kwa ban at mabalu ay at madulum fag buknga, ay kway ban kafoli ya.

²² Sanya fag talun maksvn nu madulum, ay kabavn mayabi ay we yamag, ay we fagmanabayanun ya.”