Uan 7 - Fanawbuid tagsibaliwas Fakayabian

Isus at ngay Faduksay wa Gafanud

¹ Sanya ginan, Isus nalo ay gdalanan sas talun Galilea. Wa kaylat glao sas talun Udea aroro tagsanya fag ngay taw Udyu at ngay tagfangguna kaylat gfabul anya.

² Ay nu munakbang wan ngay taw Udyu at fagmafulun sabaliwas bale Fayag,

³ Isus at ngay faduksay glong anya te, “Lag ste ya, loi wan sas talun Udea laman am ngay tagadal lumag am ngay fakamulun at madulo.

⁴ We taw gsuksuk at fakamulun, kanya nu kaylat way nangasik takadungug. Katanyai yangay am fakamulun, fasafuli emu sas fagayu taw.”

⁵ At fagnalongun katanya, dewa Isus fia at ngay faduksay wa gafanud sa anya.

⁶ Isus gbalus te, “Ya ndasug at kasakan fia ku buknga, ay nu sa ayu masine way dewa snga ginain.

⁷ Ngay taw ste swa daga di kadotama ayu, dewa katanya, kanya fagayu kadotama angku aroro gfoyung au gugat te, mauri at ngay fakamulun.

⁸ Am yakman lang tagsas fagmafulun. Au, kwa sanya aroro bunya katsi fag buknga at kasakan sa angku.”

⁹ Isus nu nalong wan takatanya, gbanwan yay sis talun Galilea.

Isus Glo sas Fagmafulun

¹⁰ Ay at ngay faduksay nu nalo wan sas fagmafulun, Isus glo yangay ay wa nafoyung sas nusnga sinu te, glo kwan.

¹¹ Ay taw Udyu at ngay tagfangguna sanya nu grvbvy Isus, kanya fagayu ginto te, “Dada wan kanya fag taw?”

¹² Ay ngayuk taw tagibugan sabaliwa anya. Tibak taw glong te, “Kanya masine fag taw.” Ay tiba glong way te, “Kanya gfandaya way.”

¹³ Dewa katanya, we taw namaskud namoyung sas fagngayuan taw sabaliwa anya aroro kalimu way taw Udyu at ngay tagfangguna.

¹⁴ Ay nu si wa swabilug fagmafulun fag ngay menit, Isus nalo wan sas Dius at bale ay gfoyung sanya.

¹⁵ Taw Udyu at ngay tagfangguna andulo ay glong te, “Daginan tuy fag taw at fagsafulun, ay wa nadal?”

¹⁶ Isus gbalus te, “Ku foyungan bunwa siginan angku, nu bunway siginan tua at nasugu angku.

¹⁷ Nusnga sinu takaylat gfaning Dius at fakaylatun, sumaful te, ku foyungan siginans Dius ay mannga siginan way ku sadili.

¹⁸ Nusnga sinu tagfoyung nu siginan way at sadili foyungan, kanya gfauseganan way at sadili. Ay dewa katanya, nusnga sinu tagfoyung nu gfauseganan tua sat nasugu anya, kanya wan at matuyan ay at yud e asalanan.

¹⁹ O nunda Muisis wa nafon ayu Dius at Faugali? Dewa katanya, nusdi am at sadi wam gfaning. Wain ay fakaylatun gfabul angku?”

²⁰ Ay kafag ngay taw gbalus te, “Gfansaful o mangaro. Sinu takaylat gfabul emu?”

²¹ Ay Isus gbalus te, “Sadi way ku nafakamulun at madulo ay maksvn nu kadulo am.

²² Muisis nafon sa ayu suguan sabaliwas fakatoglagan, (ay bunwa Muisis at nafasigad kafag suguan nu bunway siginan yay ay ngay mangaguyang,) nu katanya gfae fakatoglagan way am sik munama dewa sis Famiangalay fag Menit.

²³ Ay nu gfae fakatoglagan way am sik munama dewa sis Famiangalay fag Menit laman gfaning Muisis at Faugali, wain ay fakauriun angku nu nafafia au sis Famiangalay fag Menit?

²⁴ Lag am gamatangan te, mauri, siginan ay nalag ku fakamulun. Amatangani tua siginan at matuyan fag balyawvtan.”

O Kanya wa Manga Dius at Nafili fag Fun?

²⁵ Tibak taw sis Erusalem glong te, “O nunda bunwa kafag taw tam ngay tagfangguna at fakaylatun gfabul?

²⁶ Damai. Kanya gfoyung sis wa taw, ay tam ngay tagfangguna wa gfasalag. Malgau kafag ngay taw at amatanganan te, kanya wan Dius at nafili fag Fun.

²⁷ Dewa katanya, we taw saful te, Dius at nafili fag Fun sanya ginan. Ay saful way tam kanya fag taw nu ndaginan.”

²⁸ Gina Isus gfoyung sis Dius at bale, maksvn nu glong te, “Sabv, toglag am angku, ay saful am te, sanya ginan au. Kwa ndasug nu ku fakaylatun way lang. At nasugu angku, kanya matuyan, ay wam toglag anya.

²⁹ Au, toglag ktua anya aroro siginan au anya, ay kanya wan at nasugu angku.”

³⁰ Ay kafag ngay taw gananggamatun anya. Dewa katanya, we mananggamat anya aroro ya ndasug at kasakan fag buknga.

³¹ Ay ngayuk taw nafanud sa anya, ay glong te, “Sia wan Dius at nafili fag Fun, aroro nusnga sinu we mafakamulun tagtungud tua at nafakamulun fag ngay madulo.”

Taw Udyu at ngay Tagfangguna Nasugu laman Nanggamat Isus

³² Ngay taw Fariseu nu nadungug kafag ngay taw at kamatoanan sabaliwas Isus, kanya fagayu ay anggan ngay fun tagfon fanggalangun nanangakbang sa sangay tagfawayan tagulit sis Dius at bale, ay nasugu laman nanggamat Isus.

³³ Ay Isus glong te, “Wa glugo ya nu gfadgaloan au ayu, ay kafoli kwa ban sat nasugu angku.

³⁴ Grvbvy ban am angku ay wa ban am lumag, ay wa ban am madasug sa ku fagnangadasugan.”

³⁵ Ay taw Udyu at ngay tagfangguna gkamatoan te, “Dada ban manga kafag taw nu glao, tam fagyudun ban glag ya anya? O kanya ban manga sa tam ngay kaiban at kinrapyag at magamut gbanwan si sangay taw Gresya, ay namoyung sanya fag ngay taw Gresya?

³⁶ Nataw fia kanya at longan at masuad te, ‘Grvbvy ban am angku ay wa ban am lumag, ay wa ban am madasug sa ku fagbanwanan’?”

Tagfon Leleg fag Mamam

³⁷ Nu ndasug taguyan ay at mafanud fia fag menit ginanya fag fagmafulun, Isus namalindug ay maksvn nu glong te, “Nusnga sinu takadanum akbangi sa angku ay inumi.

³⁸ Kata at marirukan sis Dius at Longan te, ‘Nusnga sinu tagafanud sa angku, mamam tagfon leleg gfamilugan sat amatanganan.’ ”

³⁹ Ay kafag mamam at masuad te, Masine fag Falad, ngay tagafanud ban at fagnamulun ban. Ginanya at Masine fag Falad ya ndasug, aroro Isus ya nabul at fagmasineun.

Ngay Taw at Algan sabaliwas Isus

⁴⁰ Ngayuk taw nu nadungug Isus nu glong takatanya, glong te, “Matuyan tuy wa ngaro fia tam fagfanyaun fag Taglong.”

⁴¹ Tibak taw glong te, “Matuyan kanya wa ngaro fia Dius at nafili fag Fun.” Ay tibak taw glong te, “Dius at nafili fag Fun wa siginans talun Galilea.

⁴² O nunda at marirukan sis Dius at Longan wa glong te, Dius at nafili fag Fun siginan ban fun Dabid at kasugfunanan, ay siginans Betleem, Dabid at furuan?”

⁴³ Kafag ngay taw at amatanganan wa masadi sabaliwa anya.

⁴⁴ Tibak taw kaylat nanggamat anya, dewa katanya, we mafangguna.

Taw Udyu at ngay Tagfangguna wa Gafanud sas Isus

⁴⁵ Ngay tagfawayan tagulit sis Dius at bale anfoli sa sangay fun tagfon fanggalangun, ay sa sangay taw Fariseu. Ay kanya fagayu ginto sa sangay tagulit te, “Wain ay fagyudun gtaban anya stae?”

⁴⁶ Ay kafag ngay tagulit gbalus te, “Katsi yay lang nu gdungug ami sik taw nu e longan takaksvn nya.”

⁴⁷ Ngay taw Fariseu glong te, “O at masuad, anggan am nadayan way am?

⁴⁸ O ay e nalag wam ngay taw Udyu at ngay tagfangguna ay ngay taw Fariseu at nafanud sa anya?

⁴⁹ Duan. At nafanud sa anya ngay taw way lang at yud saful Muisis at Faugali. Dius ban nangus gfaurianan anya fagayu.”

⁵⁰ At sadi tagsanya, Nikudemu, at natikis nalo sas Isus ebi ataw sik yabi. Ay kanya ginto te,

⁵¹ “O nunda kamabo tam tam faugali te, lag yap gfaurianan sik taw nu dyay nainsaful anya?”

⁵² Kafag ngay taw glong te, “O nunda sik taw Galilea yangay o? Adali Dius at Longan, ay sumaful o te, we taglong tagsiginans Galilea.”

⁵³ Ay fagayu taw noli wan.