Uan 5 - Fanawbuid tagsibaliwas Fakayabian

Isus Nafafia Sik Taw Yud Malo

¹ Sanya ginan, Isus nalo sas Erusalem aroro ngay taw Udyu e fagmafulun.

² Ay sis Erusalem e sik fagigusan munakbang sis sakbawan tupa. Sas Ebreu fag fangaringang kafag fagigusan at ngayan Betesda, ay sanya e limak fagsarirungan.

³ Ay ngayuk taw e fakasaitun gtaygilidan sanya. Tibak taw at fakasaitun; wa glag, ay tiba wa malo, ay tiba wa malelegan. Ay kanya fagayu gfanya lino nu guigan.

⁴ Aroro tam Fun at tagbarita e buknga nanguig kafag lino. Ay gina kafag mamam guigan, nusnga sinu taguna nansurung kafia nusnga setaw at fakasaitun.

⁵ Ay sanya sik mangama tulu wak safulu e waluk banwa nu e fakasaitun.

⁶ Ay Isus nalag anya ay nasaful te, ngaduge wan kafag mangama nu e fakasaitun. Ay Isus ginto anya te, “O kaylat o kafia?”

⁷ Ay at yud malo gbalus te, “Fagtainan, we gbuba angku, ay mamam nu nauigan, gina kyay galoun sanya e naguna wa angku.”

⁸ Isus glong sa anya te, “Alindugi, bangkadi am igyan ay loi wan.”

⁹ Ay arodi vtv, kafag mangama nfia wan ay nabangkad at igyan ay nalo wan. Ginanya Famiangalay fag Menit.

¹⁰ Taw Udyu at ngay tagfangguna glong sanya fag mangama at kinfia te, “Katsi Famiangalay way fag Menit. Wa masine nu gbuba o am igyan.”

¹¹ Ay kanya gbalus te, “At nafafia angku nalong te, ‘Bangkadi am igyan ay loi wan.’ ”

¹² Ay kafag ngay taw ginto anya te, “Sinu at nalong emu te, ‘Bangkadi am igyan ay loi wan’?”

¹³ Ay kafag mangama wa nasaful te, sinu at nafafia anya, aroro Isus nalo wan siginan sad fagngayuan taw.

¹⁴ Sanya ginan Isus nalag anya sis Dius at bale ay glong te, “Katsi anfia wo. Lag o gasalanan ya, mandasug sa emu gtungud yay aro taw am fakasaitun.”

¹⁵ Kafag mangama nalo wan ay glong sa sangay taw Udyu at ngay tagfangguna te, “Isus at nafafia angku.”

¹⁶ Aroro katanya, ngay tagfangguna gfasigad gfauri Isus, aroro nafafia sis Famiangalay fag Menit.

¹⁷ Ay Isus gbalus anya fagayu te, “Ku Mama gfataglayun gfakamulun ay anggan au gfakamulun kyangay.”

¹⁸ Nu katanya, kanya fagayu nkugat nu gyafabulun Isus, aroro wa nafaning faugali sabaliwas Famiangalay fag Menit, ay at nalongan ya te, Dius ku Mama, nu katanya nafasudan at sadili sas Dius.

At Baguama at Fagmabalyananun

¹⁹ Nu katanya, Isus nalong sanya fag ngay taw te, “Matuyan nu glong au ayu te, au, Taw at Baguama, kwa mafakamulun nung way lang ku sadili. Ku fagfakamulunun ku nalag tua ku Mama at nafakamulun. Ku Mama at nafakamulun, katanya yangay anggan angku, at Baguama, ku fagfakamulunun.

²⁰ Aroro ku Mama kesug angku, at Baguama, ay gfasaful sa angku fagayu at fakamulun. Ay gtungud yay ban kanya at fagnamasafulun sa angku, ku fagnamakamulunun, laman kaugat yay nu kadulo am.

²¹ Nusnga setaw ku Mama nu gfaleleg ngay kinbul, katanya yangay au, at Baguama, gfaleleg kyangay ban nusnga sinu ku fakaylatun gfaleleg.

²² Bunwa ku Mama taginsaful taw at asalanan. Ku Mama nafon angku fagdaul at fagmabalyananun ginsaful taw at asalanan,

²³ laman fagayu taw gseg angku, at Baguama, kata nu gseg ku Mama. Nusnga sinu at yud gseg angku, at Baguama, wa yangay gseg ku Mama, at nasugu angku.

²⁴ “Matuyan nu glong au ayu te, nusnga sinu tagdungugan ku longan ay tagafanud sat nasugu angku, e leleg tua at yud e fakatabuan. Ay kanya di ban gafaurianan nu bunway anlangfe siginans fakabulun ay mul leleg at yud e fakatabuan.

²⁵ Matuyan nu glong au ayu te, kadasug ban tibak buknga, ay katsi wan, at ngay kinbul dumungug Dius at Baguama at aringang ay at dumungug lumeleg ban.

²⁶ Ku Mama tagfon leleg, ay nafon fagmabalyananun sa angku, at Baguama, laman gfon kyangay leleg.

²⁷ Ay nafon yangay sa angku, at Baguama, fagmabalyananun ginsaful taw at asalanan, aroro au wan Taw at Baguama.

²⁸ Lag am kadulo, aroro kadasug ban tibak menit, fagayu ban at kinbul dumungug ku aringang.

²⁹ Ay kanya ban fagayu mesa gduksun siginan at fagmafolianan. Fagayu at nafakamulun at masine gdog yay ban kafulo ay e leleg at yud e fakatabuan kabavn. Ay fagayu at nafakamulun mauri gdog yangay ban kafulo ay gafaurianan.

Ngay Tagfatuyan sabaliwas Isus

³⁰ “Kwe fagmafakamulunun sa ku sadili. Gfaning au ku Mama nu ginsaful au taw at asalanan, ay matuyan ku fakamulun nu ginsaful au taw at asalanan, aroro bundi ku sadili lang fakaylatun ku fagfaningun nu bunway at nasugu tua angku at fakaylatun.

³¹ Nu au way lang tagfatuyan sabaliwa angku, we masuad.

³² Ay dewa katanya e gfatuyan tua sabaliwa angku, ay saful au te, matuyan at longan.

³³ E nasugu am sik ngay taw sas Uan ay kanya nafoyung sa ayu at matuyan.

³⁴ Dewa katanya, at foyungan sabaliwa angku bundi siginans taw. Ku fagnalongun katanya laman umlangfe am.

³⁵ Uan kata sik salung gigang gyamag, ay guseganan am sat buba fag fagmayamagun.

³⁶ Ay dewa katanya e tagfatuyan sabaliwa angku, gtungud yay Uan. Ku Mama nafafakamulun sa angku fag fakamulun, kanya way ku fakamulun, ay kanya wan tagfatuyan te, ku Mama at nasugu angku.

³⁷ Ay ku Mama at nasugu angku, kanya tagfatuyan yangay sabaliwa angku. Kabavn yam batang gdungug at aringang ay yam batang glag anya,

³⁸ ay at longan wa gbanwan si ay amatanganan, aroro wam kaylat gafanud sat nasugu.

³⁹ Gadal am Dius at Longan aroro sanya ginan gamatangan am te, siginan takatanya magbilug am leleg at yud e fakatabuan kabavn. Ay kanya fag ngay Longan tagfatuyan sabaliwa angku.

⁴⁰ Dewa katanya, wam kaylat nangakbang sa angku laman mul am leleg at yud e fakatabuan kabavn.

⁴¹ “Bundi ngay taw at famauseganan ku fagrvbvyun

⁴² aroro toglag kway ayu. Saful kway te, Dius at fakesugun wa si ay amatanganan.

⁴³ Siginan ku Mama at fagmabalyananun andasug au ste sdaga, dewa katanya, wam kaylat angku. Ay tiba ro ktaw nu ndasug ay gfoyung sat sadili fagmabalyananun, kanya way ay fagnamaningun.

⁴⁴ Ay famauseganan nu sa way lang ay iba, tain ro nu gafanud am, wayam grvbvy famauseganan tagsiginan at matuyan fag sadik Dius?

⁴⁵ Lag am gamatangan te, au ban at namauri ayu sa ku Mama at daga salubangan. At namauri ban ayu we tiba nu bunway Muisis, ay fagsegun sabaliwas fakalangfean.

⁴⁶ Nu gafanud tuam sas Muisis, gafanud yangay am nangus sa angku, aroro kanya at rirukan sabaliwa angku.

⁴⁷ Ay nu dway am gafanud Muisis at rirukan, tain ro nu gafanud am ku longan?”