Uan 4 - Fanawbuid tagsibaliwas Fakayabian

Isus ay sik Mangena siginans Samarya

¹ Ngay taw Fariseu nadungug te, ngay taw tagalo Isus ay at nafasurung ayu yap tua tagalo Uan ay at nafasurung.

² Ay at matuyan bunwa Isus at nafasurung nu bunway at ngay tagadal way.

³ Ay Isus nu nasaful, kanya nalo wan siginans talun Udea ay anfoli sas talun Galilea.

⁴ Isus nandalan yay sas furuan Samarya, laman makafoli sas Galilea.

⁵ Ay Isus andasug sa sik furuan at ngayan Sikar, munakbang sis Akub at nafon sat baguama Use fag daga.

⁶ Sanya Akub at bubun. Ay Isus malunggung sis tigyangan bubun, aroro kalufuy at nalao. Aroro ginanya, gakawabilugun menit wan.

⁷ Ay sik mangena, taw Samarya, andasug laman nanagub. Isus glong anya te, “O masine au manga ginum?”

⁸ Ginanya at ngay tagadal wa sanya aroro namul way fakonun sas furuan.

⁹ Ay kafag mangena glong anya te, “Taw Udyu way o ay au taw Samarya au, ay nustua sik mangena kway. Nu katanya, wain am fagetun sa angku mamam?” (Aroro ngay taw Udyu ay ngay taw Samarya wa masine gkamatoan.)

¹⁰ Isus gbalus anya te, “Nu nasaful di o te, nataw Dius at fagnamonun sas taw, ay sinu taget sa emu mamam, malgau ro o way taget sa anya ay gfon ro emu tagfon leleg fag mamam.”

¹¹ Kanya fag mangena glong te, “Fagmangama, wo e fantas, ngabasad way bubun. Dada ro nu namul o tagfon leleg fag mamam?

¹² O nunda gtungud yay o em mangaguyang Akub, at nafon emi tuy fag bubun. Iste wan kanya nu ginum anggan at ngay sisian, ay at ngay fagbaugun.”

¹³ Isus gbalus te, “Taginum ste ginan fag mamam gdog yay kadanum.

¹⁴ Ay dewa katanya, nusnga sinu ban at nainum ku fon fag mamam di kadanum ya. Ay kanya fag mamam kata sik bulbug gfamilugan sat basad, laman gfon leleg at yud e fakatabuan.”

¹⁵ Ay kanya fag mangena glong te, “Fagmangama, foni angku am nalong fag mamam, laman ban kdi kadanum ya, ay kwa stae ya laman nanagub.”

¹⁶ Isus glong anya te, “Ulii wan ay tabani stae am indugan.”

¹⁷ Kafag mangena gbalus Isus te, “Kwe indugan.” Ay Isus glong te, “Anud am longan te, ‘Kwe indugan.’

¹⁸ Lima wan am naindugan, ay katsi am ufud bunwa am indugan. Matuyan am longan.”

¹⁹ Kanya fag mangena glong te, “Fagmangama, nu kamatangan, Dius o at taglong at sadi.

²⁰ Iste fag buksul em ngay mangaguyang nu gseg Dius, dewa katanya am fag ngay taw Udyu glong way am te, sa way langs Erusalem nu nanseg Dius.”

²¹ Isus gbalus anya te, “Fagmangena, afanudi sa angku. Kadasug ban tibak menit, bundi ste fag buksul ay sis Erusalem nu gseg am tam Mama.

²² Wam toglag ay fagsegan, dewa katanya, ami taw Udyu toglag tuami em fagsegan, aroro siginan sa ngay taw Udyu anke fakalangfeun.

²³ Ay kadasug ban sik buknga, ay kafag buknga katsi wan, at matuyan fag ngay tagseg, gseg tam Mama siginan fia at falad ay fagmatuyanun. Takatanya tua fag ngay taw tam Mama at fagrvbvyun tagseg anya.

²⁴ Dius sik falad, nu katanya, nusnga sinu tagseg anya, masine nu gseg nu siginan fia at falad ay fagmatuyanun.”

²⁵ Kafag mangena glong te, “Nasaful kwan kadasug ban Dius at nafili fag Fun, (at ngayan yangay te, Mesias.) Ay gina ban andasug, kanya gfayamag sa emi fagayu nusnge wain.”

²⁶ Isus glong anya te, “Am nalong fag takadasug ban, au wan tagfakamatoan emu.”

²⁷ Ay ginanya at ngay tagadal andasug ay kanya fagayu andulo nu nalag te, Isus gfakamatoan sik mangena. Dewa katanya, nusdi sadi we nainto te, “Nataw am fakaylatun?” ay “Wain am fagfakamatoanun kafag mangena?”

²⁸ Nu katanya, kafag mangena nafamato yay at baringan ay anfoli sas furuan laman nanlong sa sangay taw te,

²⁹ “Wainyayam. Nanlag am sik taw nafoyung angku fagayu ku nafakamulun. Malgau, kanya wan Dius at nafili fag Fun.”

³⁰ Nu katanya, fagayu naduksun siginan at furuan, ay nanangakbang sas Isus.

³¹ Ay at ngay tagadal gfabulun glong anya te, “Takamoyung, fangoni wan.”

³² Ay Isus glong te, “E fakonun au ay fagyudun saful.”

³³ Nu katanya, at ngay tagadal gkamatoan te, “O e nabuba manga sa anya fakonun?”

³⁴ Isus nafayamag sat ngay tagadal te, “Ku fakonun namakamulun au at nasugu angku at fakaylatun, ay namatabu au at fafakamulun sa angku.

³⁵ O nunda wam nalong te, ‘Ufat yak magdanun ay fanggutluan wan’? Glong au ayu te, damai, fare anraska wan ay kagutlu wan.

³⁶ Taggutlu gbul at bulan sat nainlufuyan ay gfaful ngay rawvg laman sas leleg at yud e fakatabuan. Nu katanya, tagtanum ay taggutlu gsud tua guseganan.

³⁷ Matuyan at longan te, ‘Saman wan tagtanum ay taggutlu.’

³⁸ Nasugu au ayu laman nanggutlu am ay nayud natanum. Tibak taw nainlufuyan gtanum ay am at nanggutlu kafag ngay taw at nainlufuyan.”

Ngayuk Taw Samarya Gafanud Wan

³⁹ Sanya fag furuan ngayuk taw Samarya nafanud sas Isus aroro kafag mangena nalong sa anya fagayu te, “Kanya nafoyung angku fagayu ku nafakamulun.”

⁴⁰ Ngay taw Samarya nu ndasug sas Isus glong te, “Banwani yap sirut ste.” Ay Isus gbanwan yay sanya duak menit.

⁴¹ Ay ngayu yay at nafanud nu nadungug Isus at foyungan.

⁴² Kanya fag ngay taw glong sanya fag mangena te, “Katsi gafanud ami bundi lang am foyungan emi, nu bunway aroro nadungug ami anya. Ay nasaful wami te, kanya wa ngaro fia tagfalangfe fagdaul daga at taw.”

Isus Nafafia sik Fun at Munama

⁴³ Nu nlangfe duak menit, Isus nataglayun nalao sas talun Galilea.

⁴⁴ Aroro Isus yangay at nalong te, “Sik taglong dewa nasat furuan at ngay taw wa gsuyu anya.”

⁴⁵ Kanya nu ndasug sas talun Galilea, ngay taw tagbanwan sanya maksvn nu kaylat anya, aroro kanya fagayu gina sis Erusalem nalag Isus at ngay nafakamulun fagayu gina e fagmafulun.

⁴⁶ Isus gdog yay nalo sas furuan Kana, sis talun Galilea. Sanya ebi nu gfasik fanlangu mamam. Ay furuan Kapernaum munakbang sanya, ay sanya e sik taw tagfakamulun sas fun. Ay kanya fag tagfakamulun at munama e fakasaitun.

⁴⁷ Ay kanya nu nadungug te, Isus anfoli sas talun Galilea siginans talun Udea, nalo ay nafainfanyuan glong te, “Sai yap ku bale ay namafiai ku baguama tagakabulun wan.”

⁴⁸ Isus nalong te, “Nu dyakmay am nalag sik ngay madulo ay sik ngay mabalyanan fag fakamulun tagfatoglag te, siginan au Dius, yam gafanud.”

⁴⁹ Dewa katanya, kafag fun glong sas Isus te, “Fagtainan, basta wan. Ku munama ro gakabulun wan.”

⁵⁰ Isus gbalus te, “Loi wan, anfia wan am munama.” Ay kafag mangama nafanud Isus at longan ay nalo wan.

⁵¹ Ay gina yay sa ngaba dalan at ngay fagsuguan nafablang anya ay glong te, “Anfia wan am munama.”

⁵² Kanya ginto te, “Ginain nu kafia?” At ngay fagsuguan glong te, “Egmenit gafasadiun sfafun.”

⁵³ Ay at mama namatang te, ginanya mandi fag buknga Isus nu glong te, “Anfia wan am munama.” Nu katanya, fagayu tagbanwan sanya fag bale gafanud sas Isus.

⁵⁴ Kanya at fadua ginan Isus at nafakamulun madulo sis talun Galilea gina siginans talun Udea.