Uan 18 - Fanawbuid tagsibaliwas Fakayabian

Nagamat Isus

¹ Isus nu ntabu gdarangin, kanya nalao wan gadgaloan at ngay tagadal ay nagvtvs datag Kidrun ay nasa sik tanuman ulibu.

² Udas, at namoyung Isus sas taw mauri, saful yangay kafag tanuman, aroro Isus ay at ngay tagadal malayun nu sanya.

³ Ay Udas nataban tibak tagfawayan ay tiba tungud fag ngay tagfon fanggalangun ay taw Fariseu at ngay fagsuguan. Kafag ngay taw gasalungan ay gafisoan.

⁴ Isus nasaful wan fagayu takafasludan ban sa anya, ay nafablang kafag ngay taw ay ginto te, “Sinu ay fagrvbvyun?”

⁵ Ay kanya fag ngay taw gbalus te, “Isus tagsiginans furuan Nasaret.” Ay Isus glong te, “Au wan.” Udas malindug magamut kafag ngay taw.

⁶ Isus nu nalong te, “Au wan,” kanya fag ngay taw ansugud ay antangda.

⁷ Ay Isus gdog yay fia ginto te, “Sinu fia ay fagrvbvyun?” Kanya fag ngay taw gbalus te, “Isus tagsiginans furuan Nasaret.”

⁸ Isus gbalus te, “Nalong kwa ayu te, au wan. Nu au wan ay fagrvbvyun, lag am gsalag ku ngay ufud nu glao.”

⁹ At fagnalongun katanya laman kafasludan at longan te, “Dakdi nafalyam nusdi sadi am nafon angku fag ngay taw.”

¹⁰ Ay Simun Pedru nagunut at fiso ay nabasing tiba tungud fag tagfon fanggalangun at fagsuguan at siun baliwa fag talinga ay andasdas way lang. Kafag fagsuguan at ngayan Malku.

¹¹ Ay Isus glong sas Pedru te, “Fafolii am fiso sam guma. O nunda kwa masine nandalan ku Mama at nafalganan sa angku fag fagidapun?”

Isus sis Salubangan Tiba Tungud fag Tagfon Fanggalangun

¹² Kafag ngay tagfawayan ay at tagfangguna ay taw Udyu fag ngay tagulit nagamat Isus ay nasiuk,

¹³ ay kanya fagayu nataban Isus sas Anas, Kayfas at nugangama. Anas tiba tungud fag tagfon fanggalangun ginanya fag banwa.

¹⁴ Kayfas wan at nalong sa sangay taw Udyu at ngay tagfangguna te, “Masine nu sik taw lang takabul laman sa tam furuan.”

Pedru nu Kamuag te, wa Toglag Isus

¹⁵ Simun Pedru ay sadi yak tagadal gguyan Isus. Ay tiba tungud fag tagfon fanggalangun toglag kafag duak tagadal, ay kanya nasakbo gadgaloan Isus sat tiba tungud fag tagfon fanggalangun at fagawean bale.

¹⁶ Ay Pedru anfamato way sis day dingding sakbawan. Ay tiba tungud fag tagfon fanggalangun at fagtoglagun fag tagadal naduksun, ay gfakamatoan tagulit sis sakbawan fag baguina, ay kanya nafasakbo Pedru.

¹⁷ Ay kafag baguina ginto Pedru te, “O nunda bunwa o at sadi kafag taw at tagadal?” Pedru gbalus anya te, “Duan.”

¹⁸ Kafag ngay tagfawayan ay fag ngay fagsuguan malindug maligung gfangenbung si sik faygangan aroro ginanya fag buknga marios. Ay Pedru magamut sanya fag ngay taw. Ay kaduge kafag ngay taw gfangenbung, anggan Pedru sanya yangay malindug gfasuglatan sanya fag ngay taw gfangenbung.

Tiba Tungud fag Tagfon Fanggalangun Ginto sas Isus

¹⁹ Ay tiba tungud fag tagfon fanggalangun ginto sas Isus sabaliwa at ngay tagadal ay sat foyungan.

²⁰ Isus gbalus te, “Nu gfoyung au si tua sfagngayuan taw, kabavn gfoyung au sa sangay bale fakafulan ay sas taw Udyu at maful sis Dius at bale. Kwe foyungan at masuksukan.

²¹ Wain fagsaun angku nu ginto am? Ay fagintoan sai wan at ngay nadungug ku foyungan, kafag ngay taw saful wan ku nafoyung.”

²² Isus nu nalong takatanya, at sadi tagulit at munakbang si anya nafalang at fingi, ay kanya nalong te, “Wain fakatanyaun nu gbalus o sa tiba tungud fag tagfon fanggalangun?”

²³ Isus gbalus anya te, “Nu mauri way ku longan, foyungi angku. Ay nu matuyan tua ku foyungan, wain am fagnafalangun angku?”

²⁴ Ay Isus gina masiukan, Anas nafataban anya sas Kayfas, tiba tungud fag tagfon fanggalangun.

Pedru nu Gdog Kamuag te, Kwa Toglag Isus

²⁵ Kadugenya, Simun Pedru malindug yay gugat sanya gfangenbung. Ngay taw nainto anya te, “O nunda bunwa yangay o kafag taw at tagadal at sadi?” Pedru gbalus te, “Duan.”

²⁶ Sanya yangay Pedru at nabasing fag mangama at lagbe, kanya tiba tungud fag tagfon fanggalangun at fagsuguan at sadi. Ay kanya nainto sas Pedru te, “O nunda bunwa o ku nalag tagalo anya sis wa tanuman?”

²⁷ Ay Pedru gdog yay nafamuag. Ay arodi vtv sik tabag natarakit.

Isus sis Pilatu at Daga Salubangan

²⁸ Ay balabag di sbalabag sirut, kafag ngay taw nataban Isus siginan Kayfas at bale sas fun Pilatu at bale daul. Ngay taw Udyu wa nasakbo sanya fag bale laman we gfangayan anya fagayu te, masuya. Aroro kanya fagayu kaylat nu kon at yafun ginanya sit fagmafulun sabaliwa Tagbarita nu Glangfe.

²⁹ Nu katanya, Pilatu naduksun ay nainto sanya fag ngay taw te, “Nataw ay nalag kafag taw at fagmauriun?”

³⁰ Ay kafag ngay taw nabalus te, “Tuy fag taw yaman e nafakamulun at mauri, wa romi nataban sa emu.”

³¹ Ay Pilatu glong sanya fag ngay taw te, “Tabani wan anya ay am wan at nanginsaful anya gfaning ay faugali.” Taw Udyu at ngay tagfangguna gbalus te, “Wami e fagmabalyananun gfaurianan nusnga sinu fag taw sas fakabulun.”

³² Anfasludan takatanya laman gfafasludan Isus at longan sabaliwa nusnga setain nu kabul ban.

³³ Ay Pilatu gdog yay gsakbo sat bale daul ay nauro Isus, ay nainto anya te, “O anud, o wan taw Udyu at Fun?”

³⁴ Ay Isus nabalus anya te, “O am longan siginan am sadili amatanganan, o mannga e nafoyung way emu?”

³⁵ Ay Pilatu nainto te, “O nunda taw Udyu au? Am ngay kaiban wan ay ay ngay fun tagfon fanggalangun at nataban emu stae. Nataw am nafakamulun?”

³⁶ Isus nabalus te, “Ku fagfagtainanan wa ste swa daga. Nu ste way ro swa daga, satu ro ku ngay fagsuguan gfawayan wan taw Udyu at ngay tagfangguna laman wa nanggamat angku. Duan, wa ste swa daga ku fagfagtainanan.”

³⁷ Ay Pilatu nalong anya te, “Nu katanya, sik fun o?” Ay Isus nabalus te, “O wan at nalong te, sik fun au. Kanya wan ku faginsalugun ay ku fagindasugun ste swa daga, laman namoyung au at matuyan. Nusnga sinu fag taw takaylat fagmatuyanun, kanya wan tagdungugan ku aringang.”

³⁸ Pilatu nainto te, “Nataw nunda fagmatuyanun?” Sanya ginan Pilatu nu nalong wan takatanya, kanya gdog yay naduksun ay nalong sa sangay taw Udyu te, “Kwe nalag tuy fag taw at asalanan.

Pilatu Nafalfas Barabas

³⁹ Gfaning ay faugali kayu ginan e fagmafulun sabaliwa Tagbarita nu Glangfe, gfalfas au sik maubungan. O kaylat am nu gfalfas au taw Udyu at Fun?”

⁴⁰ Ay kanya fag ngay taw gbarisanan guro te, “Lagi, lag gfalfas anya. Barabas yakman am fagfalfasun.” Barabas sik takamasing.