Uan 14 - Fanawbuid tagsibaliwas Fakayabian

Isus Tam Dalan

¹ “Lag am gafanawa. Afanudi sas Dius ay afanudi yangay sa angku.

² Si ku Mama at bale ngayu fag suluk. Kwa ro nafoyung sa ayu te, glo kwan laman namalganan ay fagbanwanan nu dway katanya.

³ Ay fagayu ban nu nfalganan wan, kafoli kban ay nantaban ayu, laman nu inda kwan, sanya yangay am.

⁴ Saful wam dalan sa ku fagnangadasugan.”

⁵ Ay Tumas glong anya te, “Em Fun, wami saful am fagnangadasugan ban, tain ban nu saful ami dalan?”

⁶ Isus glong anya te, “Au wan dalan ay at matuyan ay leleg. We taw madasug sa ku Mama nu dakway ban tumaban.

⁷ Nu gtoglag tuam angku, gtoglag yangay am ku Mama. Ay siginan yay katsi, gtoglag wam ay nalag anya.”

⁸ Ay Felipe glong anya te, “Em Fun, falagi emi am Mama, ay kasakan wa ro.”

⁹ Isus gbalus te, “Felipe, ngaduge wan nu galo au ayu. O nunda yo natoglag angku? At nalag angku nalag yangay ku Mama. Wain yay am fagnalongun te, ‘Falagi emi am Mama’?

¹⁰ O nunda yo gafanud te, si au ku Mama ay ku Mama si yangay angku? Ku ngay foyungan bundi siginan angku nu bunway siginan tua ku Mama tagsi angku, ay kanya yangay tagfakamulun at fakamulun.

¹¹ Afanudi ku longan te, si au ku Mama ay ku Mama si yangay angku. Nu dway am gafanud katanya, afanudi siginan ay nalag at madulo fag ngay fakamulun.

¹² Matuyan nu glong au ayu te, nusnga sinu tagafanud sa angku mafafakamulun yangay kata ku nafakamulun, ay gtungud yay kanya, aroro sa kwa ku Mama.

¹³ Ay nusnge wain ay fagetun sa ku ngayan, gfakamulun au laman au, at Baguama, gfalag au sa sangay taw te, ku Mama mabalyanan.

¹⁴ Matuyan, nusnge wain ay fagetun sa angku sa ku ngayan, gfakamulun au.

At Masine fag Falad nu Kadasug

¹⁵ “Nu kesug tuam angku, gfaning tuam ku ngay suguan ayu.

¹⁶ Ay nanget au sa ku Mama laman gfon sa ayu sadi yak Tagfasun, laman ay ufud ban kabavn.

¹⁷ Kanya fag Tagfasun, Dius at Falad tagfoyung sabaliwa at matuyan. Ngay taw tagfaning fagdaul daga at ugali wa gfaning anya, aroro wa glag ay wa gtoglag anya. Ay am, toglag wam anya aroro gbanwan si ayu ay gufud ban gugat ayu.

¹⁸ “Kdi gfabayan ayu, nu katanya, di ban kata sik ngay sisian at yud e galaga. Kafoli kyay ban sa ayu.

¹⁹ Wa ban glugo ya, tagste ban swa daga fag ngay taw ban sas fagdaul daga wa glag ya angku. Ay dewa katanya, am, lumag yay ban am angku. Ay aroro gleleg au, anggan ban am, gleleg yangay am.

²⁰ Ay ginanya ban fag menit sumaful am te, si au ku Mama, ay si wam angku, ay si kyangay ayu.

²¹ Nusnga sinu tagfaning ku ngay suguan, kanya kesug angku. Takesug angku, ku Mama kesug yangay anya. Kesug kyangay kafag taw ay namasure au ku sadili sa anya.”

²² Ay Udas, bunwa Iskariute fag Udas, glong sas Isus te, “Em Fun, wain am fagsaun lang emi nu gfasure o am sadili, ay bunwa sas fagayu taw ste swa daga?”

²³ Ay Isus glong te, “Takesug angku gfaning tua ku longan, ay ku Mama kesug anya, ay gbanwan ami magamut si anya.

²⁴ At yud kesug angku, kanya wa gfaning ku ngay longan. Kafag ngay longan ay nadungug bunwa siginan angku, nu bunway siginan tua ku Mama at nasugu angku.

²⁵ Kaduge tam magamut yay, gfoyung au sa ayu takatanya fagayu.

²⁶ Dewa katanya, at Masine fag Falad, fag Tagfasun, ku Mama at fagsuguun sa ku ngayan, kanya tagfoyung ban ayu fagayu nusnge wain, ay tagfamatang yangay ban sa ayu ku ngay foyungan.

²⁷ Lag am gafanawa ay lag kalimu, aroro gfamato au sa ayu fagmanabayanun. Ku fon sa ayu fag fagmanabayanun, di kata tagste sfagdaul daga at fon fag fagmanabayanun.

²⁸ Nafoyung au sa ayu te, glo kwan, ay kafoli kyay ban sa ayu. Nu kesug tuam angku, guseganan tuam nangus nu glo au sa ku Mama, aroro ku Mama gtungud tua angku.

²⁹ Gina yud anfasludan takatanya, gfoyung kwa sa ayu, laman ban nu nfasludan wan, gafanud tuam sa angku.

³⁰ Kwa gfaaba ya ku nalong sa ayu, aroro ste swa daga at fun kadasug wan. Kanya we fagmabalyananun sa angku.

³¹ Gfakamulun au takatanya laman ngay taw tagste swa daga sumaful te, kesug au ku Mama, ay gfakamulun au kata at suguan angku. Bastam, glo watam ste ginan.”