Uan 12 - Fanawbuid tagsibaliwas Fakayabian

Sik Mangena Nafatayuk Famaebebanglu sas Isus

¹ Unum yak menit ay kadasug wan fagmafulun sabaliwa Tagbarita nu Glangfe. Ay Isus andasug sas furuan Betanya, sas Lasaru at furuan. Lasaru, Isus at nafadog nafaleleg.

² Nu katanya, e nafalganan sik yafun laman sas Isus, ay Lasaru gfasfuan gfangon. Ay Marta tagfalganan at ngay fakonun.

³ Ay Maria nabul sik baringan sirut famaebebanglu at yud e suglat, mawatan siginan sik tanum nardu, at mabyat nu kabayad. Ay kanya naugwag sas Isus at darafa ay at fangarus at buk wan. Ay sanya fag basad bale maksvn nu mabebanglu.

⁴ Ay Udas Iskariute, Isus at tagadal ay at namoyung ban Isus sat mauri fag ngay taw, nalong te,

⁵ “Fangulan. Wain at fagyudun nafalao kafag famaebebanglu ay gfon at nagbulan sa sangay taw at yud e kwa? At kayuan kanya at famayad kayu sik taw at nagbulan at nafakamulun sik banwa.”

⁶ At fagnalongun katanya, bunwa te, kafanyu at ngay yud e kwa, nu bunway kanya sik tagfangkamul way. Aroro kanya wan tagalaga at salapi, tibaginan gbul wan tiba.

⁷ Ay Isus gbalus te, “Lag gsalag anya. At fagnaugwagun kafag famaebebanglu sa ku bilug, laman sik famamatang sabaliwa nu e namoli ban angku.

⁸ Aroro at ngay yud e kwa ste way gugat. Dewa katanya, nu magamut au si ayu, bunwa kabavn.”

Taw at Algan Gfabul Lasaru

⁹ Ay sik ngay taw Udyu nadungug te, Isus sis furuan Betanya. Nu katanya, kanya fagayu nalao sanya, bundi lang Isus at fagnanlagun nu bunway anggan tua Lasaru, Isus at nafadog nafaleleg.

¹⁰ Aroro katanya, ngay fun tagfon fanggalangun anke algan yangay namabul anggan Lasaru.

¹¹ Aroro ngayuk taw Udyu at kinsaman siginan kafag ngay taw ay at nafanud sas Isus, aroro siginan at kinfasludan sas Lasaru.

Isus Nasakbo sas Erusalem Kata sik Fun

¹² Balabag di, ngayuk taw at kinful sas fagmafulun, nadungug te, Isus ro sas Erusalem.

¹³ Ay kafag ngay taw nanamul sik ngay don taya maragbuk laman namablang Isus, ay nauro te, “Fauseganani Dius! ‘Mauseganan takadasug sas Dius at fagmabalyananun.’ Ay mauseganan taw Israel at Fun.”

¹⁴ Ay Isus nalag sik riangan asnu ay nasakay, kata Dius at Rirukan te,

¹⁵ “Ngay taw Erusalem, lag kalimu! Damai, ay Fun kadasug wan! Kanya gsakay si sik riangan asnu.”

¹⁶ Isus at ngay tagadal ya nyamag sabaliwa kafag rirukan. Gina ya Isus anfoli sas banwa, kanya fagayu nu gsaful te, katanya at marirukan sabaliwa anya ay at kinfasludan sa anya.

¹⁷ Ngay taw at nalag Isus nu gfadog gfaleleg Lasaru siginans fagfolian, kanya yay fag ngay taw at nabarita sabaliwas Isus.

¹⁸ Nu katanya, ngayuk taw at namablang Isus, aroro nadungug te, kanya nafakamulun at mabalyanan fag fakamulun.

¹⁹ Ngay taw Fariseu gkamatoan te, “Amatangani, wa tam masalag ya. Damai, fagayu taw galo wa anya.”

Tibak Taw Griegu Grvbvy Isus

²⁰ Ay e sik ngay taw yangay Griegu at nasas fagmafulun sas Erusalem laman nanseg Dius.

²¹ Ay kanya fagayu nanangakbang sas Felipe tagsiginans furuan Betsaida sis talun Galilea, ay glong anya te, “Sama, kaylat ami gyalagun Isus.”

²² Felipe nalo sas Andres ay nafasaful kafag ngay taw at fagetun, ay duama nalo sas Isus ay nafasaful yangay takatanya.

²³ Ay Isus gbalus anya te, “Andasug wan at buknga laman gfasure Taw at Baguama at fagmasineun.

²⁴ Matuyan nu glong au ayu te, sik bvtang nu dyay e natanum ay anbul, kanya sik bvtang yay gugat. Ay kanya nu nbul wan, gtugbung ay ngayu ban nu grawvg.

²⁵ Ay nusnga sinu takesug way at leleg, umkalyam way ban at leleg. Ay nusnga sinu at yud kesug at leleg ste swa daga, kanya ban e leleg tua kabavn.

²⁶ Nusnga sinu takaylat nangafagsuguanan angku, aloi angku. Ay nusnga nday au, anggan kanya sanya yangay. Ay ku Mama gfauseganan nusnga sinu tagfaning angku.

Isus Gfoyung sabaliwa nu Kabul Ban

²⁷ “Katsi maksvn nu gafanawa au. O glong au te, ‘Mama falangfei angku siginan ku fagnandalanun ban fag fagidapun’? Duan, ku fagindasugun laman nandalan au takatanya.

²⁸ Mama, fasurei am fagmasineun.” Ay sik aringang andasug siginans banwa ay glong te, “Nafasure kwan ay gdog kyay ban namasure.”

²⁹ Ay tagsanya fag ngay taw nadungug ay glong te, “Glingsi!” Ay tiba glong te, “Sik tagbarita nafakamatoan anya.”

³⁰ Ay Isus glong anya te, “Kanya fag aringang at fagindasugun bunwa laman sa angku nu bunway laman sa ayu.

³¹ Katsi Dius ginsaful fagayu taw ste swa daga sabaliwa at nafakamulun. Ay katsi fagdaul daga at fun gaiyanan ban.

³² Ay nu e nafabat angku siginans daga, namakbang kban fagayu taw sa angku.”

³³ At fagnalongun katanya laman gfasaful te, setain ban nu kabul.

³⁴ Ngay taw gbalus anya te, “Muisis at Faugali at foyungan emi te, Dius at nafili fag Fun gbanwan ban kabavn. Wain am fagnalongun te, ‘E gfabat ban Taw at Baguama’? Sinu nunda ‘Taw at Baguama’?”

³⁵ Isus glong sa anya fagayu te, “Wa ban glugo ya fagmayamagun nu si ayu. Fataglayuni nu glao am kaduge mayamag, laman diam gaduluman. Nusnga sinu taglao sad dulum wa glag at dalan.

³⁶ Kaduge ste fagmayamagun, afanudi sas fagmayamagun, laman gbanwan am sas fagmayamagun.” Isus nu nalong wan takatanya, nalo sanya ginan ay nasuksuan.

Ngay Taw Udyu wa Gafanud sas Isus

³⁷ Isus nafakamulun at ngay mabalyanan fag fakamulun tagfatoglag te, kanya siginans Dius. Ay dewa kafag ngay taw nalag, wa gafanud sa anya.

³⁸ Nu katanya, anfasludan Dius at taglong Isayas at longan te, “Ku Fun, sinu at nafanud sa em foyungan, ay dada tam Fun nu gfasure at fagmabalyananun?”

³⁹ Nu katanya, kanya wa nakatu gafanud aroro Isayas nalong yangay te,

⁴⁰ “Dius nafayud glag kafag ngay taw, ay nafaogat at ngay amatanganan. Ay Dius glong te, Nafakamulun au takatanya, laman kafag ngay taw ban wa glag ay wa gtogdungug, ay wa ban kafoli sa angku laman namafia au anya fagayu.”

⁴¹ Isayas at fagnalongun katanya aroro nalag Isus at fagmasineun ay nafoyung sabaliwa anya.

⁴² Dewa katanya, ngayuk taw Udyu at tagfangguna at nafanud sa anya, ay kanya fagayu wa gfasaful sas nusnga sinu aroro kalimu te, ngay taw Fariseu manangaiyan ban anya fagayu siginans bale fakafulan,

⁴³ aroro kanya fagayu kaylat taw nu gfauseganan anya abat ngate, Dius tagfauseganan.

⁴⁴ Isus maksvn nu guro te, “Nusnga sinu tagafanud sa angku bundi lang sa angku nu gafanud nu bunway anggan tua sat nasugu angku.

⁴⁵ At nalag angku nalag yangay anggan at nasugu angku.

⁴⁶ Ku fagindasugun laman sik fagmayamagun au ste swa daga, laman ban tagafanud sa angku di gbanwan sis dulum.

⁴⁷ Nusnga sinu at nadungug ku ngay longan ay wa gfaning, kdi gfaurianan anya. Aroro ku fagindasugun kwa nanfaurianan nusnga sinu fag taw ste swa daga, nu bunway laman namalangfe au anya.

⁴⁸ Nusnga sinu takauri angku at yud kaylat gfaning ku longan, e gfauri ban anya. Ku foyungan fag ngay longan tagfauri takatanya fag ngay taw sa taguyan fag menit.

⁴⁹ Aroro ku foyungan bundi siginan ku sadili, nu bunway siginan tua ku Mama at nasugu angku. Kanya wan at nafon angku ku fagnanlongun ay ku fagnamoyungun.

⁵⁰ Ay nasaful au te, ku Mama at ngay suguan gfon leleg at yud e fakatabuan. Nu katanya, gfoyung au nusnga setaw ku Mama at nafoyung sa angku.”