Uan 11 - Fanawbuid tagsibaliwas Fakayabian

Lasaru nu Kabul

¹ E sik taw at ngayan Lasaru. Kanya gbanwan sis furuan Betanya magamut at ngay faduksay Maria ay Marta.

² Maria wan at naugwag famaebebanglu ay at narus at buk sa tam Fun at darafa. Lasaru anke fakasaitun,

³ nu katanya, at faduksay fag duak mangena nafasaful sas Isus te, “Em Fun, am fakesugun am fagadgalangan e fakasaitun.”

⁴ Ay Isus nu nadungug katanya glong te, “Kanya fag fakasaitun at fungfung di sas fakabulun, nu bunway laman ngay taw mafauseganan Dius, ay mafauseganan yangay Dius at Baguama.”

⁵ Isus kesug tua Marta, Maria ay Lasaru.

⁶ Dewa katanya, Isus ya nasanya duak menit siginan nu saful te, Lasaru e fakasaitun.

⁷ Ay nu nlangfe duak menit, Isus glong sat ngay tagadal te, “Kafoli yap tam sas talun Udea.”

⁸ Ay at ngay tagadal gbalus te, “Takamoyung, o nunda bunwa ebi vtv yay ngay taw Udyu at algan nu namana emu. Wain am fakafoliun yay sanya?”

⁹ Isus glong anya te, “O nunda sik menit, wa labi duak uras? Sik taw nu glao nu swa menit tua di kataid, aroro mayamag tua.

¹⁰ Dewa katanya, sik taw nu glao nu si way sad yabi kataid way, aroro we si anya fagmayamagun.”

¹¹ Ay sanya ginan Isus glong te, “Tam faduksay Lasaru gtiug way. Glo kwan laman namulo au anya.”

¹² Ay at ngay tagadal glong te, “Em Fun, kanya nu gtiug way, kafia way ro.”

¹³ Isus at longan at masuad Lasaru anbul wan. Ay at ngay tagadal at amatanganan Isus at longan at masuad, gtiug way kata nu maugali.

¹⁴ Ay aroro katanya way at ngay tagadal at amatanganan, Isus nafayamag fia te, “Lasaru anbul wan.

¹⁵ Ay dewa au yud sanya guseganan au, laman umkaksvn nu gafanud am sa angku. Ay katsi bastam wan. Nanlag watam anya.”

¹⁶ Tumas, at sadi at ngayan te, Tagasfuan, glong sat iba fag ngay tagadal te, “Bastam laman nangabul gasfuan anya.”

Isus Tagfadog Gleleg ay Fagelelegun

¹⁷ Isus nu ndasug sas furuan Betanya, nasaful te, ufat wak menit Lasaru nu mafolian.

¹⁸ Betanya at kayayuan siginans Erusalem malgau ro tuluk libuk sangbada,

¹⁹ ay ngayuk taw Udyu at nansibo Marta ay Maria laman namasun, aroro sat faduksay at nabulanan.

²⁰ Ay Marta nu nadungug te, Isus kadasug, kanya namablang anya, ay Maria si way at bale.

²¹ Marta glong sas Isus te, “Ku Fun, nu ste di o, satu ro ku faduksay ya nbul.

²² Baliwan, nasaful au te, dewa katsi, Dius mafon emu nusnge wain am fagetun sa anya.”

²³ Ay Isus glong anya te, “Gdog yay ro gleleg am faduksay.”

²⁴ Marta gbalus te, “Nasaful au te, kanya ban gdog yay gleleg sa taguyan fag menit, gina ban fagayu taw gdog gleleg.”

²⁵ Isus glong te, “Au wan tagfadog gfaleleg ay leleg. Nusnga sinu tagafanud sa angku, dewa nbul gdog yay ban gleleg.

²⁶ Ay nusnga sinu tagleleg ay tagafanud sa angku kabavn di kabul. O gafanud o?”

²⁷ Marta gbalus te, “Sabv, ku Fun. Gafanud au te, o wan Dius at nafili fag Fun, Dius at Baguama, at fatuyanan te, takadasug ban ste swa daga.”

Isus Nawayway

²⁸ Ay Marta nu nalong takatanya, noli wan, ay nanguro at faduksay Maria, ay ginas sa anya te, “Andasug wan tam Takamoyung, guro emu.”

²⁹ Ay Maria nu nadungug, anlindug wa vtv laman namablang Isus.

³⁰ Ay ginanya Isus ya ndasug sas Betanya, si yays Marta at fagfablangan anya.

³¹ Ay tagfasun Maria fag ngay taw Udyu, nu nalag te, Maria anlindug wa vtv ay naduksun, kanya fagayu nangalo anya, aroro gamatangan te, Maria nanwayway sas fagfolian.

³² Ay Maria nu ndasug sas Isus, namalub sat salubangan ay glong anya te, “Ku Fun, nu ste di o, satu ro ku faduksay ya nbul.”

³³ Ay Isus nu nalag Maria ay at ngay ufud fag ngay taw Udyu nu gwayway, kanya gafaningan ay maksvn nu kabalu.

³⁴ Ay Isus ginto te, “Dada nu gfoli am anya?” Kanya fagayu gbalus te, “Em Fun, wainyayo, damai.”

³⁵ Isus gwayway.

³⁶ Ay kanya fag ngay taw Udyu glong te, “Damai, maksvn nu kesug Lasaru.”

³⁷ Ay tibak taw glong te, “In fag taw mafafia at yud glag. Wain at fagyudun masalag Lasaru nu kabul?”

Isus Nafaleleg Lasaru

³⁸ Isus nu ndasug sas fagfolian gdog yay anbalu. Kafag fagfolian sik luib, ay at faningding sik gang.

³⁹ Isus glong te, “Buli at faningding fag gang.” Ay Marta glong te, “Ku Fun, kanya nu mabulan ufat wak menit, basung wa ro.”

⁴⁰ Isus glong te, “O nunda kwa nalong emu te, nu gafanud tuo sa angku lumag o Dius at fagmasineun?”

⁴¹ Ay kanya fag ngay taw nabul kafag faningding. Isus natangda ay glong te, “Mama, guseganan au sa emu, aroro gdungug tuo angku.

⁴² Saful au te, gdungug tuo gugat angku. Ku fagnalongun katanya laman tagligung angku fag ngay taw gafanud te, o wan at nasugu angku.”

⁴³ Isus nu nalong wa katanya, nauro daul te, “Lasaru, duksuni!”

⁴⁴ Ay Lasaru aro taw at mabulan, naduksun, at daluap ay at darafa masifigan yay sik ngay ramit aba ay at mata masifigan yay sik fangarus fangenit. Isus gsugu sa sangay taw te, “Buli tagsifig anya fag ramit, laman ro malao.”

E Algan Namabul Isus

⁴⁵ At nasibo Maria duksayan fag ngay taw Udyu, ngayu at nafanud nu nalag Isus at nafakamulun.

⁴⁶ Ay tibak taw nalo sa sangay taw Fariseu laman namasaful Isus at nafakamulun.

⁴⁷ Ay sanya ginan ngay fun tagfon fanggalangun ay ngay taw Fariseu nafauro taw Udyu at ngay tagfangguna, ay glong te, “Tain ban tam fakamulun? Kanya fag taw gfakamulun ngayuk madulo.

⁴⁸ Nu dway ban tam kasalag, fagayu ban taw gafanud sa anya. Abandi ban manga ngay taw Ruma umdasug ay nanrasras Dius at bale ay namauri antam anggan tam talun.”

⁴⁹ Ay at sadi sanya, Kayfas, fag tiba tungud fag tagfon fanggalangun ginanya fag banwa, glong te, “Wam e fagsafulun.

⁵⁰ O wam gamatangan ya te, amasine yap sik taw lang takabul laman sas fagdaul talun at taw, nu ddi ngap ban fagayu taw kamin?”

⁵¹ At fagnalongun katanya bundi lang siginan at sadili amatanganan, nu bunway Dius tua at nafon anya. Aroro kanya at tiba tungud fag tagfon fanggalangun ginanya fag banwa, kanya nafoyung te, Isus ban nangabul laman sas fagdaul talun at ngay taw,

⁵² ay bundi lang sanya fag talun at ngay taw nu bunway namasadi fagayu Dius at ngay sisian at tagrapyagan sas fagdaul daga.

⁵³ Siginan ngay ginanya, kafag ngay tagfangguna at algan namabul Isus.

⁵⁴ Ay Isus wa galagan ya ngay taw Udyu, nu bunway nasa way sik furuan at munakbang sis talun at yud e taw. Kafag furuan at ngayan Efraim. Ay Isus gbanwan sanya magamut at ngay tagadal.

⁵⁵ Nu munakbang wan taw Udyu at fagmafulun sabaliwas Tagbarita nu Glangfe, ngayuk taw takadasug siginan sangay talun tagligung Erusalem, laman namasine at ngay sadili gfaning at kaugalian.

⁵⁶ Kafag ngay taw grvbvy Isus. Ay gina kanya fagayu sis Dius at bale, gidgintoan te, “Tain nu gamatangan am? O kanya ban manga kadasug sas fagmafulun?”

⁵⁷ Ay at ngay fun tagfon fanggalangun ay ngay taw Fariseu e suguan te, “Nusnga sinu fag taw nu nasaful te, sanya Isus, fasafuli wa vtv sa emi laman ro nanggamat ami anya.”