Titu 3 - Fanawbuid tagsibaliwas Fakayabian

Tagafanud at Ugali

¹ Famatangani sanya fag ngay taw te, faningi tam fun ste swa daga ay at ke ngay fagmabalyananun. Faningi anya fagayu, ay mafalganani fia fakamuluni at masine.

² Ay foyungi te, lag glong at mauri sas nusnga sinu, ay lag gbadbaboan, ay manabayani tua, ay malukmei fia sas fagayu taw.

³ Ebi taguna wa tam mamatanganan, ay kamabo tam, ay gadayan tam, ay nafagsuguanan tam tam bilug at fakaylatun ay fagayu at mauri ste swa daga. Tam ugali mauri, ay gfangalabian tam, ay fagayu taw kadotama antam, ay kadotama yangay tam anya fagayu.

⁴ Ay Dius tam Tagfalangfe at fagmagalangun ay at fakesugun gina nsure,

⁵ kanya nafalangfe antam, bunwa siginan tam ngay nafakamulun at masine nu bunway siginan tua nu kafanyu antam. Anlangfe tam siginan nu gfegus antam gina tam nadog ansalug ay siginan at Masine fag Falad at nafon antam at bagu fag ugali.

⁶ Siginan tam Fun Isus tam Tagfalangfe, Dius nafon sa antam at Masine fag Falad,

⁷ laman siginan Dius at fagmagalangun kanya gtap antam kata nu yud tam e asalanan, laman magbilug tam tam fagsegun fag leleg at yud e fakatabuan.

⁸ Matuyan kanya fag foyungan. Kaylat au nu gugatan o gfoyung takatanya sas fagayu tagafanud sas Dius, laman kanya fagayu maseganama nu gfakamulun at masine. Kata kanya at masine ay at ke tungkul sas fagayu taw.

⁹ Ay o, saruyi at yud e tungkul fag longan, ay nu ginsaful sabaliwa ngay mangaguyang at ngay ngayan, ay fagbadbaboanun sabaliwa Muisis at Faugali. Takatanya fagayu we tungkul.

¹⁰ Salagi nusnga sinu fag taw tagfainkafudan ayu. Nu nafoyung o anya dua ginan, ay nu dyay gfaning am longan, lag gfadkaylatan ya anya.

¹¹ Aroro saful wo te, kanya mauri way, ay at asalanan gfalag te, kanya gsalan.

At Suguan Taguyan

¹² Gsugu au sa ayu Artemas ay mannga Tikiku ay kanya nu ndasug sanya, adasugi wa vtv stae sfuruan Nikupulis aroro ste kyay ban katsi fag abagat.

¹³ Ay ugatani gubuki Senas tam tagwabilug ay anggan Apulus, laman duama kataglayun nu glao. Ay tuyani fia te, kasakan tua fagayu at fagayudanun.

¹⁴ Ay foyungi sa tam ngay faduksay te, fakamuluni tua at masine laman fagayu di e gayudan, ay laman ban di nfangulan ay leleg.

¹⁵ Ku ngay ufud iste glong emu te, O manabayan tuo? Ay longi yangay sas fagayu takesug antam sas fagafanudun te, O manabayan tuam? Sumawa nangus fia ayu Dius at fagmagalangun.