Titu 2 - Fanawbuid tagsibaliwas Fakayabian

At Matuyan fag Foyungan

¹ Titu, am fagfoyungun at matuyani tua fag foyungan.

² Foyungi sat mafagtainan fag ngay mangama te, malukmei tua, ay safuli tua faragangi at sadili ay faksvni tua nu gafanud, ay esugi fagayu taw, ay agwantani.

³ Ay katanyai yangay am foyungan sat mafagtainan fag ngay mangena te, ugalii fia at masine, ay lag glong at mauri sabaliwa at iba, ay lag gmamaman fanlangu, nu bunway foyungi tua at masine,

⁴ laman mafafoyung sat mabaguina fag ngay mangena te, esugi at mesa mangama ay at ngay sisian,

⁵ ay e fagsafuluni sabaliwa nu gfakamulun at matuyan, ay fakamuluni tua fia sit bale, ay malukmei ay faningi fia at mangama, laman we gfalingun Dius at longan.

⁶ Ay foyungi yangay sa sangay baguama, laman saful tua gfaragang at sadili.

⁷ Sas fagayu am fakamulun falagi te, sik fagfaningan o, ay fagayu am foyungan matuyani dangay kata nu alaman.

⁸ Kabavn am aringang at matuyani tua laman di e kaaringang sam foyungan. Nu katanya tua, tam ngay fawayan umkapla aroro di tam e kalong.

⁹ Foyungi yangay sa sangay fagsuguan laman gfaning tua fia at ngay tagfayafun, ay gugatan gfauseganan anya, ay di kamabo.

¹⁰ Ay foyungi yangay anya fagayu te, lag gfangkamul, nu bunway matuyani tua fagayu at fakamulun laman gfalag te, masine tua at foyungan sabaliwas Dius tam Tagfalangfe.

¹¹ Ansure wan Dius at fagmagalangun tagfon fakalangfean sas fagayu taw.

¹² Ay at fagmagalangun wan tagfoyung antam te, “Ubuni wan fagmauriun ay fagayu at yud masine fag ugali sis fagdaul daga. Ay faragangi tam sadili fakaylatun, ay ugalii at matuyan, ay faningi tua tam Dius dewa tam ste yay swa daga.”

¹³ Katanya tam fakamulun kaduge tam gfanya tam fagsegun, nu kafoli tam tiba tungud tam Dius ay tam Tagfalangfe, tam Fun Isus at fagmasineun.

¹⁴ Kanya nafon at sadili laman gfalangfe antam siginan fagayu asalanan ay gfasine antam laman Dius tua tam at ngay taw takaylat gfakamulun at masine.

¹⁵ Sas fagdaul am fagmabalyananun, foyungi takatanya fagayu, ay fabitsugi sanya fag ngay taw at amatanganan, ay salagi at fagmauriun. Fakamuluni at matuyan laman nusnga sinu we gfalingun emu.