Titu 1 - Fanawbuid tagsibaliwas Fakayabian

¹ Au, Pablu, Dius at fagsuguan, ay tam Fun Isus at nasugu. Nasugu angku laman gfaksvn au Dius at nafili fag ngay taw at fagafanudun, ay gfasaful sa anya fagayu at fagmatuyanun sabaliwa nu gugali tua gfaning Dius.

² Tuy fag fagsafulun ay fag fagafanudun tagfon antam fagsegun te, e leleg ban tam at yud e fakatabuan. Kanya fag leleg Dius at nafatuyanan gina yay yud e fagdaul daga, ay kanya di kamuag.

³ Ay katsi wan Dius at nafalganan fag buknga nu gfasure at foyungan sabaliwa kafag leleg. Ay Dius tam Tagfalangfe nafatigwanan sa angku laman kamoyung au kafag foyungan.

⁴ Griruk au sa emu, Titu, at matuyan ku sisian sas fagafanudun. Sumawa nangus fia emu Dius tam Mama ay tam Fun Isus tam Tagfalangfe at fagmanabayanun ay at fagmagalangun.

Titu at Fakamulun sis Furu Kreta

⁵ Nafamato au emu sis Kreta laman namasine o ku nayud nafatabu. Kata ku suguan emu, filii tagfagtainan si sangay furuan.

⁶ Am fagfiliun at yud tua e kafoyung te, mauri, ay sadi way at mangena. Ay at ngay sisian gafanud tua, ay di kamabo ay di kamaogatun.

⁷ At masine sik fagtainan di e kafoyung te, mauri, aroro kanya sik fagfatigwanan Dius at fakamulun. Ay kanya di kamabatun, ay di gfangadotama, ay di glanguan, ay di kamawayan, ay di gfangalabian salapi.

⁸ Nu bunway kanya gfasakbo tua sat bale nusnga sinu fag taw, ay kaylat tua at masine, ay malukme tua, ay matuyan sat ngay iba, ay galo fia Dius ay saful tua gfaragang at sadili.

⁹ At masine kanya nu maksvn tua fia nu gamatangan sat matuyan fag foyungan kata at nadungug, laman mafaksvn at ngay iba at fagafanudun ay gfasaful sa takauri at matuyan te, kanya gsalan.

¹⁰ Aroro ngayu tagfasagsagan ay tagfandaya at iba siginan at yud matuyan fag longan, kaugat wan ngay taw taglong te, fae fakatoglagani.

¹¹ At masine salagi wan fagayu tagfakamulun takatanya, aroro gfauri way tibak talanan at fagafanudun. Kanya kaylat gfoyung at yud masine, laman gbul ngayuk salapi.

¹² Ay sik taglong siginans furu Kreta nalong te, “Ngay taw Kreta kamuag, ay at ugali mauri kata ngay mangilafang, ay kanya fagayu momuy ay gfangkumon.”

¹³ Matuyan kafag taglong at longan. Nu katanya, faksvni nu gsalag o anya fagayu, laman gugali tua at masine gfaning at fagafanudun,

¹⁴ ay laman wa gfaning ya ngay taw Udyu at ngay mangaguyang at foyungan, ay tiba yak taw at nasaruy at matuyan at foyungan.

¹⁵ Sa sik taw at ke masine fag amatanganan, fagayu nusnge wain masine tua. Dewa katanya, sat mauri ay at yud gafanud fag taw, fagayu nusnge wain we masine, aroro at amatanganan mauri way,

¹⁶ ay glong te, “Toglag wami Dius.” Dewa katanya, we famatuyan sit fakamulun, ay maksvn nu mauri ay kamabo ay fagayu at fakamulun we masine.