Tap 9 - Fanawbuid tagsibaliwas Fakayabian

¹ Gina taguna fag magdanun sis faduak banwa ngay taw Israel naduksun siginans talun Igiptu, ay gina kanya fagayu sit yud e taw fag talun sis Buksul Sinay, Yawi nalong sas Muisis te,

² “Longi sa sangay taw Israel te, ‘E fagmafuluni sabaliwa Tagbarita nu Glangfe si ku nafalganan fag buknga,

³ gina menit anfalyu sis falabi ufatk menit katsi fag magdanun. Faningi fia tuy fag faugali sabaliwa takatanya fag fagmafulun.’ ”

⁴ Nu katanya, Muisis nalong sa sangay taw Israel te, “E fagmafuluni sabaliwa Tagbarita nu Glangfe.”

⁵ Ay kata Muisis at longan, ngay taw Israel anful sis Buksul Sinay gina menit anfalyu sis falabi ufatk menit taguna fag magdanun. Ngay taw Israel nafakamulun takatanya kata Yawi at suguan sas Muisis.

⁶ Dewa katanya, bunwa fagayu taw Israel at nanangaful aroro ginanya fag buknga tibak taw masuya way siginan nu nated at mabulan. Ay ginanya yangay fag menit kanya fag ngay taw nanangakbang sas Muisis ay sas Arun,

⁷ ay kanya fagayu glong te, “Nated ami at kinbul ay ansik masuya ami, dewa katanya, wain am fagyudun kaylat nu nangaful ami, laman namon ami em fanggalangun sas Yawi kata em iba fag ngay taw Israel sit mafalganan fag buknga?”

⁸ Muisis nabalus anya fagayu te, “Fanyai yap Yawi nu gfoyung sa angku ku fakamulun laman sa ayu.”

⁹ Yawi nalong sas Muisis te,

¹⁰ “Longi sa sangay taw Israel te, ‘Nusnga sinu si ayu ay dewa ngay taw tagsiginan tangayayu fag talun at natuyan te, masuya, aroro nated at kinbul fag taw, masine way nangalo sas fagmafulun sabaliwa Tagbarita nu Glangfe.

¹¹ Kanya fagayu masine nu kaful nu nlangfe sik magdanun, nu nfalyu sis falabi ufatk menit, gina sis faduak magdanun. Kanya fagayu kon sik tupa gasfuan sik tinapay yud e famabia ay sik mayat fag makmak.

¹² Ay kanya fagayu wa masine gfasawad at fakonun laman sas balabag, ay wa yangay masine grufa tupa at ngay bini. Kanya fagayu masine nu gfaning tuy fag ngay faugali gina maful sabaliwa Tagbarita nu Glangfe.

¹³ “ ‘Dewa katanya, sik taw nu dway nanangaful sabaliwa Tagbarita nu Glangfe, ay kanya doma e malong ay doma nalao sa tangayayu fag talun, tuyani kanya fag taw te, bunwa ay kaiban ya, aroro kanya wa nafon at fanggalangun laman sas Yawi sit mafalganan fag buknga. Kanya umke fagidapun siginan at asalanan.

¹⁴ “ ‘Ay ay betaw nu kaylat tua nangaful sas fagmafulun sabaliwa Tagbarita nu Glangfe, kanya masine nu gfaning at ngay faugali sanya baliwa fag fagmafulun. Katanya yay at faugali laman sa sangay taw Israel ay sa sangay betaw.’ ”

Linyabu Tagsis Tungud Yawi at Bale

¹⁵ Gina Fagnansegan fag bale ramit antabu, at ngayan yangay te, Bale Fagnangablanganan, linyabu nasuklub. Kafag linyabu gyamag kata sik afuy siginan sad yabi sitsigons balabag.

¹⁶ Galay menit kanya fag linyabu gsuklub kafag bale, ay galay yabi gyamag kata sik afuy.

¹⁷ Ay kafag linyabu nu nkabat wan, ngay taw Israel gfataglayun yangay nu glao, ay linyabu nu nragang wan kanya fagayu karagang yangay nu glao.

¹⁸ Nu katanya, ngay taw Israel gfataglayun nu glao kata Yawi at suguan sa anya fagayu. Kaduge kafag linyabu sis tungud bale ramit, ngay taw ya glao.

¹⁹ Ay dewa kafag linyabu ngaduge nu sis tungud bale ramit, ngay taw Israel ya masine glao, gfanya yay Yawi at suguan sa anya fagayu.

²⁰ Tiba ginan, wa ngayuk menit linyabu nu sis tungud bale ramit, nu katanya, kanya fagayu ya glao nu seyuk menit. Yawi nu nasugu, kanya fagayu gdog yay glao.

²¹ Tiba ginan, sik yabi way linyabu nu sis tungud bale ramit ay balabag di linyabu kabat wan, ay kanya fagayu gfataglayun wan nu glao. Nusnga ginain linyabu nu kabat anggan ngay taw Israel glao yangay.

²² Ay kanya fag linyabu nu gragangan sis tungud bale ramit, nu duak menit ay mannga sik magdanun ay mannga sik banwa, kaduge yangay nya ngay taw Israel nu yud glao.

²³ Nu katanya, kata Yawi at suguan, ngay taw Israel tibaginan karagang ay gfataglayun nu glao. Ngay taw Israel nafaning Yawi at suguan sas Muisis.