Tap 8 - Fanawbuid tagsibaliwas Fakayabian

Nu Gfatungkud ngay Salung

¹ Yawi nalong sas Muisis te,

² “Longi sas Arun te, Nu gfatungkud fituk salung, fatungkudi nu inda ngay salung at fagmafayamagun sis salubangan fagfatungkudan.”

³ Nu katanya, Arun nafatungkud ngay salung sas fagfatungkudan ay at damlag nayamag sis salubangan fagfatungkudan, kata Yawi at suguan sas Muisis.

⁴ Ay fagdaul fagfatungkudan salung siginans daga ay sat tungud mawatan gintu, kata Yawi at nafalag sas Muisis.

Nu Gfadante Lebi at ngay Kasugfunanan

⁵ Yawi nalong sas Muisis te,

⁶ “Fasamani Lebi at ngay kasugfunanan siginan ngay taw Israel, ay fasinei.

⁷ “Katatuy am fakamulun nu gfasine o anya fagayu: faramsigi sa anya famasine fag mamam, ay ufoi fagayu at sigyu tagsis fagdaul at afud bilug, ay bakbaki at ngay lanbung.

⁸ Sanya ginan, foni anya fagayu sik riangan baka tama, ay at masine fag fangawat tinapay at mafasuglatan langis laman sik famauseganan fanggalangun sas Yawi. Ay foni yangay sik riangan baka tama laman sik fanggalangun famalyam asalanan.

⁹ “Sanya ginan, fafuli ngay taw Israel, ay fatigwanani Lebi at ngay kasugfunanan si ku bale at salubangan.

¹⁰ Tabani Lebi at ngay kasugfunanan sa ku daga salubangan, ay ngay taw Israel namasa sangay taw Lebi at tungud alfuyu at ngay daluap.

¹¹ Arun at namakamulun laman namatigwanan anya fagayu sa ku daga salubangan, kata at mafilian fag fanggalangun siginan sangay taw Israel, laman kanya fagayu mafafakamulun sa angku.

¹² “Sanya ginan, Lebi at ngay kasugfunanan namasat fanggalangun fag duak tama baka at tungud alfuyu at ngay daluap, laman at fanggalangun sa angku. At sadi at fanggalangun laman sa nu gfasine, ay at sadi at fagirugun fag fanggalangun laman famalyam at ngay asalanan.

¹³ Falindugi anya fagayu sas Arun talamean at daga salubangan, ay fatigwanani laman sa angku.

¹⁴ Takatanya fag fakamulun mafasaman o Lebi at ngay kasugfunanan siginan sa sangay taw Israel laman sa angku.

¹⁵ “Ay nu nafili wo Lebi at ngay kasugfunanan, kata sik mafasamanan fag fanggalangun laman sa angku, kanya fagayu mafakamulun wan sa ku bale.

¹⁶ Siginan sangay taw Israel at kasugfunanan ngay taw Lebi wan at mafasamanan laman sa angku, fantubus ngay taw Israel at ngay baguama tiba kaka.

¹⁷ Aroro ngay taw Israel at ngay baguama tiba kaka au wan tagagbilug, dewa taw ay fagbaugun. Gina au gfamin taw Igiptu at ngay baguama tiba kaka, nafasaman kwan taw Israel at ngay baguama tiba kaka laman sa angku.

¹⁸ Nafili kwan Lebi at ngay kasugfunanan fantubus taw Israel at ngay baguama tiba kaka.

¹⁹ Sas fagayu taw Israel, nafili au Lebi at ngay kasugfunanan laman taggubuk Arun talamean. Kanya fagayu gfakamulun si ku bale laman gfalyam ngay taw Israel at ngay asalanan, laman di e kadasug sa anya fagayu ngay malimu, dewa nanangakbang sa ku bale.”

²⁰ Nu katanya, Muisis ay Arun ay ngay taw Israel nafakamulun sas Lebi at ngay kasugfunanan kata Yawi at suguan sas Muisis.

²¹ Ngay taw Lebi nafasine at bilug ay nabakbak at ngay lanbung. Ay Arun nafasaman anya sis Yawi at daga salubangan laman sik mafasamanan fag fanggalangun, ay Arun nafakamulun laman gfalyam at ngay asalanan, laman gtuyan te, masine wan.

²² Sanya ginan, Lebi at ngay kasugfunanan gfakamulun wan sis Yawi at bale gina Arun talamean at tagfon fanggalangun. Ay kanya fagayu nafakamulun takatanya kata Yawi at suguan sas Muisis.

²³ Yawi nalong sas Muisis te,

²⁴ “Katatuy ngay faugali laman sa sangay taw Lebi at ngay kasugfunanan: Sik taw Lebi duak safulu e limak banwa nu namasigad namakamulun sa ku bale,

²⁵ ay nu gfaragang gfakamulun limak safuluk banwa. Ay kanya nu nafaragang wan at fakamulun,

²⁶ kanya masine nu nanggubuk at kaiban fag ngay taw Lebi laman sik tagulit sas bale ramit, dewa katanya, kanya wa gfakamulun ya tibak fakamulun si ku bale. Kanya wan am fagnamoyungun fag ngay faugali sa sangay taw Lebi, laman at fagnamaningun ban kabavn.”