Tap 7 - Fanawbuid tagsibaliwas Fakayabian

Ngay Fanggalangun gina Gfadante Yawi at Bale

¹ Ay Muisis nu ntabu wan nu gfasine Yawi at bale, kanya nafaramsig langis anggan sas fagayu fagagbilugun sanya. Katanya yangay at nafakamulun sas fagirugan ay sat ngay fagagbilugun.

² Sanya ginan, ngay taw Israel at ngay tagfangguna sas galay sik kasugfunanan, namon ngay fanggalangun sas Yawi. Kanya fag ngay tagfangguna at nafili laman griruk ngay taw Israel at ngay ngayan.

³ Kanya fagayu nabuba unumk faguyudan ay labi duak baka; galay sik faguyudan duak tagfangguna, ay tagsadik baka galay sik tagfangguna. Ay kanya fag ngay tagfangguna namuba kanya fagayu sas Fagnansegan fag bale ramit at daga salubangan.

⁴ Yawi nalong sas Muisis te,

⁵ “Buli wan at ngay fanggalangun laman e fagagbilugun tua sa sangay fakamulun si ku bale. Foni kanya fag ngay fanggalangun sas Lebi at ngay kasugfunanan, laman mafakamulun at mesa fakamulun.”

⁶ Nu katanya, Muisis nabul wan ngay faguyudan ay ngay baka, ay nafon sas Lebi at ngay kasugfunanan.

⁷ Ay kanya nafon duak faguyudan ay ufatk baka sas Gersun at ngay kasugfunanan laman sat fakamulun.

⁸ Ay nafon yangay ufatk faguyudan ay waluk baka sas Merari at ngay kasugfunanan laman sat fakamulun. Itamar, fun tagfon fanggalangun Arun at baguama, kanya tagfangguna anya fagayu.

⁹ Dewa katanya, Muisis we nafon faguyudan ay baka sas Kuat at ngay kasugfunanan aroro kanya wan tagbuba ngay fagagbilugun yud e malong siginans bale ramit.

¹⁰ Ebi gina gfalganan fagirugan, ngay tagfangguna nabuba yangay sanya at ngay fanggalangun.

¹¹ Yawi nalong sas Muisis te, “Galay menit, masine sik tagfangguna nu gbuba at fanggalangun laman sa nu gfalganan fagirugan.”

^12-83 Kayu tuy ngay taw at nabuba ngay fanggalangun at ngay ngayan: Taguna fag menit, Naksun, Aminadab at baguama, tagfangguna Uda at kasugfunanan. Sis faduak menit, Netanel, Suar at baguama, tagfangguna Isakar at kasugfunanan. Sis fatuluk menit, Elyab, Kelun at baguama, tagfangguna Sebulun at kasugfunanan. Sis faufatk menit, Elisur, Sedeur at baguama, tagfangguna Rubin at kasugfunanan. Sis falimak menit, Selumiel, Surisaday at baguama, tagfangguna Simyun at kasugfunanan. Sis faunumk menit, Elyasaf, Dewel at baguama, tagfangguna Gad at kasugfunanan. Sis fafituk menit, Elisama, Amyud at baguama, tagfangguna Efraim at kasugfunanan. Sis fawaluk menit, Gamaliel, Pedasur at baguama, tagfangguna Manase at kasugfunanan. Sis fasiamk menit, Abidan, Gidyuni at baguama, tagfangguna Benamin at kasugfunanan. Sis fasafuluk menit, Akyeser, Amisaday at baguama, tagfangguna Dan at kasugfunanan. Sis falabi sadik menit, Pagyel, Ukran at baguama, tagfangguna Aser at kasugfunanan. Sis falabi duak menit, Akira, Enan at baguama, tagfangguna Naftali at kasugfunanan. Galay sik tagfangguna gbuba at fanggalangun: sik palantung mawatan siginans sanbung salapi at kabyatan sik fabudbungguan ay gwabilug, ay sik taya fagsuadan famaramsig fag taguk, at fangawat salapi, at kabyatan waluk sandank fabudbungguan kata tagfon fanggalangun at nagbilug fag famabudbungguan. Ay galay sik taya, mapnu at masine fag ngay fangawat tinapay at mafasuglatan langis laman famauseganan fanggalangun sas Yawi. Galay sik tagfangguna gbuba yangay sik palantung mawatan siginans gintu, at kabyatan sadik sandan duak safuluk fabudbungguan, mapnu famaebebanglu; sik riangan tama baka, sik tama daul tupa, ay sik riangan tupa tama tagsik banwa, limak tama daul tupa, limak tama kambing tagsik banwa laman fanggalangun famalyam asalanan.

⁸⁴ Kayu tuy ngay taw Israel at tagfangguna fag labi dua at fanggalangun laman sa nu gfalganan fagirugan fanggalangun: labi duak tagbia fag palantung, labi duak tagbia fag taya mawatan siginans sanbung salapi, ay labi duak palantung at mawatan siginans gintu.

⁸⁵ Galay sik tagbia fag palantung at mawatan salapi kabyat sik fabudbungguan ay gwabilug, ay sik takarufa fag taya at mawatan salapi kabyat waluk sandank fabudbungguan. Ay nu fagayu wan kabyat duak safulu e waluk fabudbungguan kata ngay tagfon fanggalangun at nagbilug fag fabudbungguan.

⁸⁶ Kanya fag labi duak fagsuadan mawatan siginans gintu mapnu famaebebanglu ay galay at sadi at kabyatan sadik sandan duak safuluk fabudbungguan kata ngay tagfon fanggalangun at nagbilug fag fabudbungguan. Ay nu fagayu wan sadik libu ufatk sandan ufatk safuluk fabudbungguan.

⁸⁷ Ngay fagbaugun laman fanggalangun fag fagirugun: labi duak riangan baka, labi duak tupa tama ay labi duak riangan tupa tagsadik banwa, gasfuan ngay fanggalangun laman famauseganan Yawi. Ay fanggalangun famalyam asalanan: labi duak tama kambing.

⁸⁸ Fanggalangun fag fagirugun fag ngay fagbaugun laman sas nasadian: duak safulu e ufatk tama daul baka, unumk safuluk tupa tama, unumk safuluk riangan kambing ay unumk safuluk riangan tupa tagsadik banwa.

⁸⁹ Muisis nu gsakbo sas Yawi at bale laman namakamatoan Yawi, kanya nadungug sik aringang gfakamatoan anya siginans wabilug duak awatan at ke fakfak, sis tungud suklub Fagsuadan Nasadian. Sanya Yawi nu gfakamatoan Muisis.