Tap 6 - Fanawbuid tagsibaliwas Fakayabian

Faugali sabaliwa sik Taw at Namakamulun laman sas Dius

¹ Yawi nasugu Muisis

² laman nanlong sa sangay taw Israel te, “Sik mangama ay mannga sik mangena nu nafatuyanan wa te, gfagbilug at sadili sa angku laman sik nafasaman,

³ kanya wa masine ginum fanlangu siginans wat ubas at rawvg ay nusnga setaw fag fanlangu. Ay wa yangay masine ginum sanggvtan, ay wat ubas at mamam. Ay wa masine kon ubas rawvg at melo ay at kin-gong.

⁴ Kaduge kanya sik nafasaman, wa masine kon nusnga setaw nu siginan ways wat ubas, dewa at bini ay at balat.

⁵ “Ay wa yangay masine gfaufo at buk kaduge yud antabu at fatuyanan sas Yawi. Ay kanya gfakamulun sas Yawi yakmay antabu at fatuyanan fag buknga. Nu katanya, fabayani way lang at buk nu kaba.

⁶ Ay kaduge yud antabu at fatuyanan sas Yawi, kanya wa masine nangakbang sat kinbul,

⁷ dewa at mama ay at mina, ay at faduksay at kinbul. Kanya wa masine gfasuya at sadili, aroro at buk wan fagtoglagan te, nafagbilug wan at leleg sas Dius.

⁸ Nu katanya, kaduge yud antabu at fatuyanan, kanya sik mafasamanan laman sas Yawi.

⁹ “At buk at fakatoglagan te, sik nafatigwanan sas Yawi. Ay nu e nbul way vtv sit akbang, at buk ansik masuya. Nu katanya, kanya faufoi wan sis fafituk menit, aroro ginanya wan nu gfasine anya.

¹⁰ Sis fawaluk menit, foni sa tagfon fanggalangun duak labikung ay mannga duak udkuruan sis Yawi at sakbawan bale.

¹¹ Tagfon fanggalangun gfon at sadi laman sik fanggalangun sa nu gfasine, ay at sadi fag fanggalangun gfon laman sik fagirugun fag fanggalangun. Takatanya fag fakamulun, famalyam asalanan siginan nu nated at kinbul. Ginanya yay fia fag menit, nu gdog gfon sas Yawi at sadili ay nu gfaba at buk.

¹² At kinlangfe fag ngay menit nu gfakamulun sas Yawi, ya kataip nu gfafasludan at fatuyanan, siginan nu gted at kinbul. Masine kanya nu gdog gfagbilug at sadili yakmay antabu at fatuyanan, ay masine yangay kanya nu namon sik riangan tama tupa laman famalyam at asalanan.

¹³ “Ay kanya fag taw nu ntabu wan at fatuyanan nu gfakamulun sas Yawi, katatuy at fakamulun: masine nu glo sas Yawi at sakbawan bale,

¹⁴ sanya nu namon sas Yawi at yud e kalong fag ngay fagbaugun: sik tupa tama tagsik banwa laman sik fagirugun fag fanggalangun, sik tupa tina tagsik banwa yangay laman fanggalangun famalyam asalanan, ay sik tama tupa laman at fanggalangun laman sas fagmanabayanun.

¹⁵ Ay kanya namon yangay at ngay fanggalangun fag fanginum ay sik bang tinapay yud e famabia at fangawat siginan at masine fag fangawat tinapay, tibak tinapay madamvl ay tiba mayangfis ay mararusan langis, kanya fagayu sik ngay fanggalangun laman famauseganan Yawi.

¹⁶ “Tagfon fanggalangun at namon sas Yawi kanya fag ngay fanggalangun, ay kanya namon yangay fanggalangun famalyam asalanan, ay gfon yangay fagirugun fag fanggalangun.

¹⁷ Sanya ginan, namon yangay sik tama tupa laman at fanggalangun laman sas fagmanabayanun gasfuan sik bang tinapay at yud e famabia. Ay namon yangay sik fanggalangun laman famauseganan Yawi, ay sik fanginum fag fanggalangun.

¹⁸ “Ay sis Yawi at sakbawan bale kanya nu gufo at buk tagfatoglag te, nafagbilug at leleg sas Dius. Kanya nangirug at buk sas fagirugan ngay fanggalangun laman sas fagmanabayanun.

¹⁹ Sanya ginan, tagfon fanggalangun namabitbitan sat ke fatuyanan fag taw, fanggalangun fag tupa at mafasamanan fag lafi, ay anggan ngay tinapay at mayangfis ay at madamvl at yud e famabia.

²⁰ Ay tagfon fanggalangun gbul kanya fag buyug ay gfabat sis Yawi at daga salubangan laman sik famauseganan fag fanggalangun. Ay kafag fanggalangun yud e malong, kanya wan ngay tagfon fanggalangun at e kwan, ay anggan yangay tupa at dubdub ay at ngay si, gfabat sas Yawi. Sanya ginan, at ke fatuyanan fag taw masine wa ginum fanlangu.

²¹ “Katanya at faugali sabaliwa at ke fatuyanan fag taw. Dewa katanya, at ke fatuyanan fag taw nu nafatuyanan way te, namasawe nu gfon fanggalangun sas Yawi, kanya masine nu gfafasludan kata at fatuyanan.”

²² Yawi nalong sas Muisis te,

²³ “Longi sas Arun talamean te, ‘Katatuyi ban ay longan gina am gdarangin ngay taw Israel:

²⁴ Yawi nangus gfon ayu fagmasineun ay gufud ayu;

²⁵ ay gfalag at fagmatuyanun ay at fakafanyun sa ayu;

²⁶ ay guseganan nangus ayu ay gfae fagmanabayanun.’

²⁷ “Siginan takatanya, Arun talamean gfatoglag sa sangay taw Israel te, sinu au, nu katanya, gfon kban fagmasineun sa anya fagayu.”