Tap 5 - Fanawbuid tagsibaliwas Fakayabian

Nu Gfasine Fagmafulan

¹ Yawi nalong sas Muisis te,

² “Sugui sa sangay taw Israel te, faduksuni siginans fagmafulan nusnga sinu fag taw at ke fakasaitun maksvn: kata tagabangbang, ay sik taw at natuyan te, masuya aroro nated way sik mabulan, ay mannga siginan at fakasaitun nu e gduksun siginan at lulu.

³ Faduksuni anya fagayu, dewa mangama ay mangena, laman di gfasuya ay fagmafulan, nu inda nu gbanwan au magamut ayu.”

⁴ Nu katanya, ngay taw Israel nafaduksun siginan at fagmafulan fagayu ke fakasaitun, kata Yawi at suguan sas Muisis.

⁵ Sanya ginan, Yawi nalong sas Muisis te,

⁶ “Longi sa sangay taw Israel te, ‘Nusnga sinu fag mangama ay fag mangena at nafamabo Yawi, siginan nu gfakamulun at mauri sat faduksay, kanya e asalanan.

⁷ Masine kanya nu gfoyung at nafakamulun mauri ay masine yangay kanya nu gfon at kasakan fag famayad sat nafauri fag taw ay gfamut yay duak kayu at nabul.

⁸ Dewa katanya, at nafauri fag taw nu nbul wan ay nu dway e kalongan ya laman tagbul at famayad, kanya fag famayad foni sas Yawi ay fatigwanani sa sangay tagfon fanggalangun gasfuan sik tupa laman sik fanggalangun famalyam kafag taw at asalanan.

⁹ Ngay taw Israel at fanggalangun fagayu at yud e malong, kanya wan ngay tagfon fanggalangun at fagagbilugun.

¹⁰ Kafag ngay fanggalangun yud e malong ngay tagfon fanggalangun wan at fagagbilugun.’ ”

Faurianan sa Takamatugtug fag Mangena

¹¹ Yawi nalong yangay sas Muisis te,

¹² “Longi sa sangay taw Israel te, ‘Sik mangama nu nsulup way te,

¹³ at mangena kamatugtug, ay nu dway e gfatuyan,

^14-15 masine nu gtaban at mangena sas tagfon fanggalangun, dewa yud nafakamulun at mauri. Masine nu namon duak fabudbungguan fangawat tinapay. Lag gfasuglat langis ay mannga famaebebanglu aroro tuy sik fanggalangun sat nasulupan.

¹⁶ Tagfon fanggalangun gtaban kafag mangena sa angku,

¹⁷ sanya ginan, tagfon fanggalangun namasa sik takarufa fag fagsuadan mamam, ay namasanya dafug siginans Bale Fagnansegan at salug.

¹⁸ Ay tagfon fanggalangun nu nafalindug wan kafag mangena sa ku daga salubangan, fasinei kafag mangena at buk ay fabitbitani fanggalangun sat nasulupan laman sumaful te, o anud kafag mangena e asalanan. Sanya ginan, tagfon fanggalangun nanbitbitan takarufa fag fagsuadan mamam ke mamam mayat laman famauri,

¹⁹ ay kanya fag tagfon fanggalangun namatuyanan ay nanlong sa kafag mangena te, “Laman ro nu ddi o nafakamulun mauri siginan nu gfataladan o sik mangama, at mauri ro wa katayuk sa emu.

²⁰ Ay nu nafakamulun way o at mauri siginan nu gfataladan o tibak mangama,

²¹ gfatuyan au te, Dius gfaurianan emu gina ban o yud gsisian ya fag buknga, kanya sik famasaful sa sangay taw.

²² At mauri nangus tagsiginans mamam umtayuk sam bilug laman wo gsisian ya.” Sanya ginan, kafag mangena glong te, “Anud, umfasludan nangus takatanya!”

²³ “ ‘Tagfon fanggalangun griruk tuy fag famauri sa sik fagrirukan ay namegus sa sik mamam mayat.

²⁴ (Nu nafainum wan sanya fag mangena kafag mamam mayat tagbuba famauri, kanya gtaban anya sat maksvn fag fagidapun.)

²⁵ Nu ntabu wan, tagfon fanggalangun gbul sanya ginan fag mangena at fanggalangun sat nafasulupan at mangama, ay tagfon fanggalangun gfabat si ku daga salubangan ay namuba sas fagirugan.

²⁶ Tagfon fanggalangun namul sik galumut fanggalangun laman ginsaful kafag mangena te, o e asalanan o ay duan, ay kanya nangirug sas fagirugan. Sanya ginan, namainum sanya fag mangena mamam.

²⁷ Nu matuyan way nafauri at sadili siginan nu nafamabo at mangama, at nainum fag mamam tagtaban anya sat maksvn fag fagidapun. Kanya ban wa gfafion ya ay Dius at famauri umsik famasaful sas fagayu taw.

²⁸ Dewa katanya, kanya nu ddi nafauri at sadili, famauri wa gtayuk anya, ay kanya gfafion tua ban.

²⁹ “ ‘Katatuy at faugali sabaliwa sik mangama nu kasulup way at mangena. Sik mangena nu nafauri at sadili siginan nu nafataladan tibak mangama,

³⁰ ay mannga sik mangama nu kasulup way at mangena, tagfon fanggalangun masine nu gfalindug kafag mangena sa ku daga salubangan ay fakamuluni tuy fag suguan sa anya.

³¹ At mangama wa kataip, dewa katanya, at mangena nu e asalanan way, kanya gafaurianan.’ ”