Tap 4 - Fanawbuid tagsibaliwas Fakayabian

Kuat at ngay Kasugfunanan

¹ Yawi nalong sas Muisis ay sas Arun te,

² “Riruki Kuat at ngay gaban siginans Lebi at kasugfunanan, galay talanan.

³ Riruki yangay ngay mangama ke banwa tuluk safulu anggan limak safulu ay at makatu gfakamulun sas Yawi at bale.

⁴ “Kuat at ngay gaban at fakamulun galaga ngay fagagbilugun at yud e malong sis Yawi at bale.

⁵ Ay gina am galaoun siginan ay fakaragangan, Arun talamean nansakbo sas bale ramit laman namul famalabag fag ramit ay nantabun Fagsuadan Nasadian.

⁶ Ay kanya fagayu namul yangay sik masine fag balat ay sik ramit at melo ay namalanib at fantabun, ay sanya ginan, namasa sangay buksung at famuba.

⁷ “Ay nansagmak yangay ramit melo fagfatungkudan tinapay laman fanggalangun sas Yawi, sit daga salubangan, ay kanya fagayu namatungkud sas fagfatungkudan ngay fagsuadan, palantung, taya, tagbia fag taya, tikung fagsuadan fanggalangun fag fanginum, ay ngay tinapay tagsi gugats fagfatungkudan.

⁸ Sanya ginan, kanya fagayu nansagmak sik ramit maraska sat fagfatungkudan ay namalanib yangay sik masine fag balat, ay nu ntabu wan, kanya fagayu namasas buksung ngay famuba.

⁹ “Kanya fagayu nansifig ramit melo, at fagfatungkudan salung, anggan at ngay salung, ngay fanikfit, ngay fagfatungkudan salung at nagdafugan ay anggan at fagsuadan langis fag tikung.

¹⁰ Ay nansifig yangay kanya fag ngay fagagbilugun fagbaugun at balat, ay nantabing sas famuba.

¹¹ “Kanya fagayu nansuklub fagirugan sik ramit melo, sanya ginan, nansuklub yangay sik masine fag balat, ay namasas buksung ngay famuba.

¹² Ay nansifig yangay ramit melo tibak fagagbilugun tagsis Yawi at bale, ay at fanuklub sik masine fag balat, ay namasas buksung ngay famuba.

¹³ “Kanya fagayu namul fagirugan at nagdafugan, ay nansuklub fagirugan sik ramit maubian.

¹⁴ Ay namasas fagirugan fagayu at ngay fagagbilugun: fagsuadan singsing afuy, tagbia fag ngay fansaruk at ke sarangan fanguyut yamas, ay tagbia fag ngay saruk, ay ngay taya fagsuadan famaramsig fag taguk. Ay nansuklub sik masine fag balat ay nansuad sas buksung ngay famuba.

¹⁵ “Ay Arun talamean nu ntabu gsuklub bale ramit ay fagayu at ngay fagagbilugun, Kuat at ngay kasugfunanan tagbuba tuy fagayu gina glo siginan at fagtungkudan. Dewa katanya, kanya fagayu wa masine gted kafag ngay fagagbilugun at yud e malong laman di kabul. Kanya wan fag ngay fagagbilugun tagsis Yawi at bale, Kuat at ngay kasugfunanan at fagnamubaun ban.

¹⁶ “Elyasar, Arun fag fun tagfon fanggalangun at baguama, at ke fanambagun sabaliwa langis laman sa sangay salung, ay sas famaebebanglu, sas fagayu fanggalangun kayu menit laman famauseganan angku ay fanrarus fag langis. Ay kanya yangay tagalaga fagdaul bale ramit ay fagayu tagsanya fag ngay fagagbilugun.”

¹⁷ Yawi nalong sas Muisis ay sas Arun te,

¹⁸ “Lag gfabayan Kuat at ngay gaban laman wa kalyam siginans Lebi at ngay kasugfunanan.

¹⁹ Katatuy ay fakamulun laman kanya fagayu di kabul, dewa ankakbang sat yud e malong fag ngay fagagbilugun: Arun ban talamean galo anya gina gsakbo sas Yawi at bale ay gfoyung sa anya fagayu nu setain at fakamulun ay at fagnamubaun ban.

²⁰ Ay talamean nu dway galo anya fagayu, kanya fagayu wa masine gsakbo dewa sik buknga way sirut laman nanlag ngay fagagbilugun at yud e malong, laman di kabul.”

Gersun at ngay Kasugfunanan

²¹ Yawi nalong sas Muisis te,

²² “Riruki Gersun at ngay gaban galay talanan.

²³ Ngay mangama ke banwa tuluk safulu anggan limak safulu at makatu gfakamulun sas Yawi at bale.

²⁴ “Gersun at ngay gaban at fagnamubaun:

²⁵ ngay famalanib sis Yawi at bale (at ngayan yangay te, Bale Fagnangablanganan), fagayu fanuklub ay sakbawan at ngay faningding fag ramit,

²⁶ ngay famalanib alad at maligung sis bale ramit ay sis fagirugan, faningding sakbawan alad fag ramit, ngay fansiuk ay ngay fagagbilugun gina gfakamulun sis bale ramit. Kanya wan fagayu tagfakamulun sat ngay mesa fakamulun sa sangay fagagbilugun.

²⁷ Arun talamean tagfangguna Gersun at ngay kasugfunanan sabaliwa ngay fakamulun, gina gbuba ngay fagagbilugun ay gina gfakamulun. Muisis ay Arun tagfoyung sa anya fagayu at fagnamubaun ban.

²⁸ Katanya ban Gersun at ngay gaban at ngay fakamulun sis Yawi at bale. Tagfangguna ban anya fagayu Itamar, Arun tagfon fanggalangun at baguama.

Merari at ngay Kasugfunanan

²⁹ “Riruki yangay Merari at ngay gaban galay sik talanan.

³⁰ Riruki yangay ngay mangama tagtuluk safuluk banwa sitsigons limak safuluk banwa at makatu gfakamulun sas Yawi at bale.

³¹ Kata ban tuy at ngay fakamulun sis Yawi at bale: Kanya ban fagayu tagbuba at fagaloan nu kawat bale ramit, ngay famakvd, ngay turuk ay ngay fagfatungkudan.

³² Kanya yangay ban fagayu tagbuba ngay turuk alad fagtabingan ngay faningding fag ramit sis bale ramit anggan ngay fagfatungkudan, ngay fagtabingan ay ngay fansiuk. Kanya ban fagayu tagfakamulun sa sangay fagagbilugun. Am waban fag duksay tagfoyung sa anya fagayu at fagnamubaun ban.

³³ Katanya ban Merari at ngay gaban at ngay fakamulun sis Yawi at bale. Tagfangguna ban anya fagayu, Itamar, Arun tagfon fanggalangun at baguama.”

Nu Gtap Lebi at ngay Kasugfunanan

^34-48 Kata Yawi at suguan, Muisis, Arun ay Israel at ngay tagfangguna nariruk Kuat, Gersun ay Merari at ngay gaban galay sik talanan. Nariruk yangay ngay mangama tagtuluk safuluk banwa sitsigon limak safulu at banwa, at makatu gfakamulun sas Yawi at bale, kayu tuy at kayuan: Gaban At kayuan Kuat 2,750 Gersun 2,630 Merari 3,200 Nu fagayu wan, 8,580.

Gaban At kayuan

⁴⁹ Kata Yawi at suguan, Muisis nainsaful galay at sadi ay nafon at ngay mesa fakamulun ay nafoyung at fagnamubaun ban.