Tap 25 - Fanawbuid tagsibaliwas Fakayabian

Ngay taw Israel Naseg Baal

¹ Kaduge ngay taw Israel gbanwan sis Sitim, ngay mangama nafataladan talun Muab fag ngay mangena.

² Ay kanya fag ngay mangena nafaylatan anya fagayu laman gfon fanggalangun ay gseg tibak fagsegan ay kon kafag ngay fanggalangun laman sat fagsegan.

³ Nu katanya, ngay taw Israel naseg Baal, talun Peur at fagsegan. Ay Yawi andotama maksvn anya fagayu.

⁴ Yawi nalong sas Muisis te, “Fafuli kafag ngay taw at ngay tagfangguna ay fabuli anya fagayu si ku daga salubangan gina mamenit, laman umkalyam wan nu kadotama au sas Israel.”

⁵ Nu katanya, Muisis nalong sa sangay taw Israel at ngay taginsaful te, “Fabuli wan ngay taw at naseg Baal, talun Peur at fagsegan.”

⁶ Sanya ginan, sik taw Israel nataban sat bale ramit sik mangena tagsiginans Midyan gina Muisis ay fagayu taw Israel maful gwayway sis Yawi at sakbawan bale. Ay kanya fagayu nalag anya fag dua.

⁷ Ay Finekas, Elyasar at baguama fag tagfon fanggalangun, Arun at fufu, nu nalag anya, masakit nalao siginans fagmafulun ay nabul sik bangko.

⁸ Kanya naguyan kafag dua sasad bale ramit ay naurus anya fag dua. Ay at bangko natalfus kafag mangama ay nataglayun sa kafag mangena at suaban. Sanya ginan, anragang wan at faurianan sas Israel.

⁹ Ay dewa katanya, duak safulu e ufatk libuk taw at kinbul aroro sat faurianan.

¹⁰ Yawi nalong sas Muisis te,

¹¹ “Finekas, Elyasar at baguama ay tagfon fanggalangun Arun at fufu, nafalyam nu kadotama au ngay taw Israel. Siginan at nafakamulun takatanya, kanya nafalag te, maseganama nu gdiri ku kamasinean si sangay taw. Nu katanya, kdi nafamin anya fagayu.

¹² Ay longi sas Finekas te, kawat au sik nasadian sa anya te, gfae fagmanabayanun kban anya.

¹³ Ay siginan ban kafag nasadian, kanya ban ay anggan at ngay kasugfunanan, umsik ngay tagfon fanggalangun kabavn, aroro kanya nafalag te, maseganama nu gdiri ku kamasinean ay siginan at nafakamulun, nalyam tua ngay taw Israel at asalanan.”

¹⁴ Ay kafag taw Israel at nataban kafag mangena tagsiginans Midyan at ngayan Simri, Salu at baguama, kanya sik tagfangguna sik talanan sis Simyun at kasugfunanan.

¹⁵ Ay kafag mangena at ngayan Kusbi, Sur at baguina. Sur sik tagfangguna sik talanan fag taw Midyan.

¹⁶ Yawi nalong sas Muisis te,

¹⁷ “Tuyani ngay taw Midyan te, am fawayan ay fabuli anya fagayu,

¹⁸ aroro ebi kanya fag ngay taw natuyan ayu te, at ngay fawayan. Ebi gina am sis Peur, kafag ngay taw ay Kusbi, ngay taw Midyan at tagfangguna at baguina, nafaylatan ayu. Dewa katanya kanya fag mangena anbul gina faurianan andasug sas talun Peur.”