Tap 21 - Fanawbuid tagsibaliwas Fakayabian

Ngay Taw Kanaan Nababawan

¹ Arad at fun, tagsis Negeb sis talun Kanaan, nu nadungug te, ngay taw Israel kadasug ay gdalan sas Atarim, kanya nafawayan anya fagayu ay natabanan tiba.

² Sanya ginan, ngay taw Israel nafatuyanan sas Yawi te, “Nu gfon o kanya fag ngay taw sa em daluap, nangiklas ami at ngay furuan laman sik fanggalangun sa emu.”

³ Yawi nadungug ngay taw Israel at fagetun ay nafon sa anya fagayu ngay taw Kanaan. Ngay taw Israel nafamin wan anggan at ngay furuan laman fanggalangun sas Yawi, nu katanya, nafangayan kafag furuan te, Kurma.

Ule at Mawatan siginans Tansu

⁴ Siginans buksul Ur, ngay taw Israel glao ay nadalan sis dalan tagsas Dagat Maraska laman namaligung furuan Edum. Dewa katanya, ngay taw kalufuy ya nu glao,

⁵ nu katanya, kanya fagayu nafayud Dius ay Muisis. Ay nalong te, “Wain am fagnafaduksunun emi siginans talun Igiptu, laman umbul waymi ste sis talun at yud e taw at yud e mamam ay at yud e fakonun! Wami kaylat ya kon tuy fag mana.”

⁶ Nu katanya, Yawi nafadasug ngay ule ay kafag ngay ule nagat anya fagayu, ay ngayu at kinbul.

⁷ Ngay taw nalo sas Muisis ay nalong te, “Nasalan ami gina ami gfayud Yawi ay emu. Darangini emi sas Yawi, ay fayayui siginan emi tuy fag ngay ule.” Nu katanya, Muisis nadarangin laman sa sangay taw.

⁸ Sanya ginan, Yawi nalong sas Muisis te, “Awati sik ule siginans tansu ay fabati sa sik fungfung tulag. Nusnga sinu at nagatan ule damai sas tansu fag ule laman di kabul.”

⁹ Nu katanya, Muisis nawat sik ule siginans tansu ay nafabat sa sik fungfung tulag. Ay fagayu at nagatan nadama sas tansu fag ule ay di nbul.

Nu Glao sas Muab

¹⁰ Ngay taw Israel gfataglayun nu glao ay nabanwan sas Ubut.

¹¹ Siginans Ubut, kanya fagayu nalao sas Iye-Abarim, sis talun at yud e taw sis Muab at fakamenitan baliwa ay nabanwan sanya ay wa glugo.

¹² Sanya ginan, kanya fagayu glao ay nabanwan sas Liskung Sered.

¹³ Ay siginans Sered, nalao yangay ay nabanwan sas Liskung Arnun, sis talun at yud e taw munakbang sa sangay taw Amur at fagagbilugun. Arnun, kanya wan at fungfung sis wabilug ngay taw Muab ay ngay taw Amur at talun.

¹⁴ Katatuy at kinfasludan at fagnarirukun sas fafil gina Yawi gfawayan furuan Waeb tagsis talun Supa, ay sis Liskung Arnun,

¹⁵ anggan sat ligung fag ngay datag munakbang sis furuan Ar ay sis fungfung Muab.

¹⁶ Siginans Arnun, ngay taw Israel nataglayun sas Beer at bubun nu inda Yawi nu glong sas Muisis te, “Fafuli ngay taw ay gfon au anya fagayu mamam.”

¹⁷ Ay sanya wan ngay taw Israel nu galubad te, “Gfataglayun ban nangus gfon mamam ste fag bubun! Galubad tam sabaliwa tuy fag bubun

¹⁸ tam ngay mangaguyang ay takadungug fag ngay taw at nafaali siginan at fagmabalyananun.” Siginans talun at yud e taw, ngay taw nalao sas Matana;

¹⁹ siginans Matana, kanya fagayu nalao sas Nakalyel; siginans Nakalyel, nalao sas Bamut;

²⁰ ay siginans Bamut, nalao sas tagubungan sis Muab nu inda nu gbanawan talun at yud e taw siginans tungud buksul Pisga.

Fun Sikun ay Ug Nababawan

²¹ Katsi, Israel nasugu sik ngay tagfosuk longan sas Sikun, ngay taw Amur at fun. Katatuy at foyungan:

²² “Nu masine sa emu, fabayani nu gdalan ami sam talun. Wa ban mi gdalan sa ay ngay gamasun ay sa ay ngay tanuman wat ubas, ay wa ban mi ginum si ay ngay bubun. Ay nu glao ban mi si way gugat sdalan urungan ay wa ban mi gsaruy yakmay ban mi anlangfe am talun.”

²³ Dewa katanya, fun Sikun wa naylat ngay taw Israel nu gdalan sat talun. Abat ngate, kanya nafaful at ngay tagfawayan ay nalao sas talun at yud e taw laman namawayan ngay taw Israel. Ay kanya fagayu nu ndasug sas Yaas, nafawayan ngay taw Israel.

²⁴ Dewa katanya, ngay taw Israel nafabul anya fagayu ay nagbilug at talun siginans Arnun sitsigons Liskung Abuk. Dewa katanya, si way tsigons fungfung talun Amun aroro sanya maaladan.

²⁵ Nu katanya, ngay taw Israel nagbilug ngay taw Amur at furuan fagayu ay anggan furuan Kesbun ay fagayu furuan ayu sirut sit ligung, ay kanya fagayu nabanwan sanya.

²⁶ Kesbun, talun Amur at furuan daul. Ay ebi, kanya nababo Muab at fun ay nagbilug fagayu at furuan sitsigons Arnun.

²⁷ Kanya wan ngay tagalubad at fagnalongun te, “Loi sas furuan Kesbun, ay sas fun Sikun at furuan ay fadogi yap awati.

²⁸ Ginanya, Kesbun at ngay tagfawayan namawayan kata sik tagbia fag afuy, ay nafamin furuan Ar sis Muab fag talun ay naiklas at tangabat fag ngay talun sis Arnun.

²⁹ Afanyuan wam ngay taw Muab! Am ngay tagseg Kemus, nababawan wam. Kemus nafabayan way lang at ngay sisian gina Sikun, ngay taw Amur at fun gtaban.

³⁰ Dewa katanya katsi, nababo watam ngay taw Amur. Anrasras wan furuan Kesbun anggan Dibun, Nufa ay Medeba.”

³¹ Nu katanya, ngay taw Israel gbanwan wan si sangay taw Amur at talun.

³² Sanya ginan, Muisis nasugu sik ngay taw laman nanginsaful sas furuan Aser, ay ngay taw Israel nagbilug kafag furuan ay anggan tagsit ligung fag ngay furuan ayu sirut, ay naiyan ngay taw Amur tagbanwan sanya.

³³ Sanya ginan, kanya fagayu nataglayun sas talun Basan, ay nu ndasug sas furuan Edrei, Ug, Basan at fun ay at ngay tagfawayan nafawayan anya fagayu.

³⁴ Ay Yawi nalong sas Muisis te, “Lag o kalimu fun Ug, aroro namababawan kwan anya sa emu, anggan at ngay taw ay fagdaul at talun. Fakamuluni sa anya kata am nafakamulun sas Sikun, ngay taw Amur at fun, tagfunan sis Kesbun.”

³⁵ Nu katanya, ngay taw Israel nafabul Ug, anggan at ngay baguama ay fagayu at ngay taw, yakmay we nafasawad. Ay ngay taw Israel nagbilug Ug at talun.