Tap 20 - Fanawbuid tagsibaliwas Fakayabian

Mamam at Kinsure siginan sik Gang

¹ Ay ebi taguna fag magdanun, fagdaul taw Israel andasug sas Sin fag talun at yud e taw ay ngay taw gbanwan sis Kades. Sanya yay Miryam anbul ay anfoli.

² We mamam sanya, nu katanya, ngay taw nanangakbang sas Muisis ay Arun.

³ Ay kanya fagayu nafayud Muisis ay nalong te, “Masine yay nung ami anbul gasfuan em ngay kaiban sanya yay sis Yawi at daga salubangan.

⁴ Wain am fagnatabanun Yawi at ngay taw ste sas talun at yud e taw? O laman umbul ami gasfuan em ngay fagbaugun?

⁵ Wain am fagnafaduksunun emi siginans talun Igiptu ay nataban ste fag talun at yud e tungkul? We trigu, igus ay pumigranata! We mamam yangay em fanginum!”

⁶ Nu katanya, Muisis ay Arun nalao siginan sangay taw ay nasas Yawi at sakbawan bale ay namalub laman gdarangin. Sanya ginan, duksay nalag Yawi at kamasuloan.

⁷ Yawi nalong sas Muisis te,

⁸ “Buli am tulag ay fafuli fagayu taw. Kaduge ngay taw gdama emu, sugui sa sik gang te, ‘Faduksuni mamam,’ ay mamam umsure. Siginan takatanya, gfon am mamam sa sangay taw laman e fanginum tua anggan at ngay fagbaugun.”

⁹ Nu katanya, Muisis nabul at tulag siginans Yawi at daga salubangan, sis Yawi at bale, kata Yawi at suguan sa anya.

¹⁰ Sanya ginan, Muisis ay Arun nafaful fagayu taw sas fagunan gang, ay Muisis nalong sa anya fagayu te, “Am fag ngay taw takamabo, dungugani. O masine nu gfon ami sa ayu fanginum ste ginan fag gang?”

¹¹ Sanya ginan, Muisis nafabat at tulag, ay nafalang kafag gang dua ginan, ay tagbia fag mamam nafamilugan sanya ginan, ay kafag ngay taw, ay anggan at ngay fagbaugun nainum.

¹² Dewa katanya, Yawi nalong sas Muisis ay Arun te, “Aroro wam gafanud sa angku nung au gfalag ku kamasinean sa sangay taw Israel at daga salubangan, bunwa ban am tagfangguna anya fagayu sas talun ku fagnamonun sa anya fagayu.”

¹³ Sanya fag talun at ngayan te, Meriba, aroro ngay taw Israel nafamabo Yawi ay sanya yay fia Yawi nu gfalag at kamasinean.

Ngay Taw Edum wa Gfabayan nu Gdalan ngay Taw Israel

¹⁴ Kaduge ngay taw Israel gbanwan sis Kades, Muisis nasugu ngay tagfosuk longan sas Edum at fun ay glong te, “Katatuy at longan siginan am ngay kaiban, ngay taw Israel: Saful o fagayu em nadalan fag fagidapun.

¹⁵ Em ngay mangaguyang nalo sas talun Igiptu, ay ngaduge nu nabanwan ami sanya. Ngay taw Igiptu nafaidapan emi, anggan yangay em ngay mangaguyang.

¹⁶ Dewa katanya, naet ami gubuk sas Yawi ay kanya nadungug yay emi. Kanya nasugu sik tagbarita ay nafaduksun emi siginans talun Igiptu. Katsi, ste ami sis Kades, sik furuan munakbang sim fagagbilugun fag talun.

¹⁷ Nu masine sa emu, aylati nu gdalan ami sam talun. Wami gdalan sa ay ngay gamasun ay sa ay ngay tanuman wat ubas, ay wami ginum sa ay ngay bubun. Gdalan way lang mi sas dalan urungan ay wami gdalan sa tibak dalan yakmay ami anlangfe siginan am fagagbilugun fag talun.”

¹⁸ Dewa katanya, katatuy Edum at fun at famalus te, “Lag gdalan ste sa em talun. Nu nadalan wayam stae, namawayan ami ayu.”

¹⁹ Ngay taw Israel gbalus te, “Gdalan way lang mi sam dalan; ay nung way romi nainum mamam anggan em ngay fagbaugun, gfon ro ami emu famayad. Nu katanya, gdalan way lang mi.”

²⁰ Edum at fun nabalus yangay te, “Wa masine nu gdalan am ste!” Sanya ginan, Edum at fun nafaful at ngay maseganama fag ngay tagfawayan laman namawayan ngay taw Israel.

²¹ Aroro ngay taw Edum wa kaylat ngay taw Israel nu gdalan, ngay taw Israel nananrvbvy way lang tibak dalan.

Arun Anbul

²² Fagayu taw Israel nalao siginans Kades, ay andasug sas buksul Ur.

²³ Sanya sas buksul Ur, munakbang sis Edum at fagagbilugun, Yawi nalong sas Muisis ay Arun te,

²⁴ “Andasug wan at buknga Arun nu nangagamut sat ngay kaiban at mabulan. Wam masakbo sas talun ku fagnamonun sa sangay taw Israel aroro am fag dua, kamabo wayam ku suguan ayu gina au gfasure mamam sas Meriba.

²⁵ Muisis, tabani Arun ay at baguama Elyasar sas buksul Ur.

²⁶ Sanya ginan, buli siginans Arun at bilug at lanbung laman sa sik tagfon fanggalangun ay fasuluni sas Elyasar, aroro Arun umbul sanya fag buksul.”

²⁷ Muisis nafaning Yawi at suguan sa anya. Kanya fag tulu naundaud sas buksul Ur kaduge ngay taw gbanawan.

²⁸ Sanya ginan, Muisis nabul lanbung siginans Arun ay nafasulun sas Elyasar. Arun anbul sanya sis tungud buksul. Sanya ginan, Muisis ay Elyasar natustus siginans buksul.

²⁹ Ay fagayu taw nu nasaful te, Arun anbul wan, kanya fagayu nafalag te, kabalu, kaduge tuluk safuluk menit.