Tap 17 - Fanawbuid tagsibaliwas Fakayabian

Arun at Tulag

¹ Yawi nalong sas Muisis

² laman nanlong sa sangay taw Israel te, “Galay sik tagfangguna sat galay kasugfunanan gfon sa emu sik tulag, ay riruki ngay taw at ngayan sanya. Fagayu at tulag, labi dua.

³ Sas Lebi at tulag, riruki Arun at ngayan, aroro masine nu e sik tulag sas galay tagfangguna at ngay kasugfunanan.

⁴ Folii kanya fagayu sa ku basad Bale, sis Fagsuadan Nasadian at daga salubangan nu inda nu gfalag au ku sadili sa emu ay sas Arun.

⁵ Ay si ban ku nafili fag taw at tulag sik don gtugbung, ay siginan takatanya, umragang ban ngay taw Israel nu kamayud sa emu ay sas Arun.”

⁶ Nu katanya, Muisis nafoyung takatanya fagayu sa sangay taw Israel, ay galay sik tagfangguna sas galay sik kasugfunanan nafon anya tulag. Fagayu at tulag, labi dua anggan yangay Arun at tulag.

⁷ Muisis nafoli fagayu at ngay tulag sis Yawi at daga salubangan sanya sas Fagsuadan Nasadian at bale.

⁸ Balabag di, Muisis nasakbo sas bale ramit nu inda Fagsuadan Nasadian nu mafasakboan ay nalag Arun at tulag, tagfamatang Lebi at kasugfunanan, bundi lang anke don nu bunway anke barugwak ay narawvg sik almendru malesanan.

⁹ Sanya ginan, Muisis nafaduksun fagayu at tulag ay nafalag sa sangay taw Israel. Ngay taw nalag kafag ngay tulag, ay galay sik tagfangguna sis galay kasugfunanan nabul at tulag.

¹⁰ Yawi nalong sas Muisis te, “Folii Arun at tulag sas Fagsuadan Nasadian at daga salubangan laman kanya wan at famararang sa sangay takamabo te, kanya fagayu umbul nu dway yud gfaragang nu kamabo sa angku.”

¹¹ Ay Muisis nafakamulun Yawi at suguan sa anya.

¹² Ngay taw Israel nalong sas Muisis te, “Umbul waban ami ste!

¹³ Aroro nusnga sinu takakbang sas Yawi at bale umbul. O umbul yaban ami fagayu?”