Tap 16 - Fanawbuid tagsibaliwas Fakayabian

Kura ay at ngay Ufud Kamabo

^1-2 Kura, Isar at baguama tagsiginans Kuat at ngay kasugfunanan, Lebi at baguama, nafamabo Muisis. Ay at nanangalo anya, Datan ay Abiram, Elyab at ngay baguama, ay Un, Pelet at baguama tagsiginans Rubin at ngay kasugfunanan. Ay nanangalo yangay anya duak sandan limak safuluk mangama takadungug, ngay tagfangguna at nafili siginan ngay taw Israel.

³ Kanya fagayu nalao sas Muisis ay Arun ay nalong te, “Maksvn nu maidap ay nafakamulun sa emi! Fagayu taw Israel yud we malong ay Yawi at kamasinean si kafag ngay taw, ay wain ay fagnafabatun ay sadili te, gtungud tuam am emi?”

⁴ Ay Muisis nu nadungug takatanya, kanya anlub laman gdarangin sas Yawi.

⁵ Sanya ginan, Muisis nalong sas Kura ay sat ngay ufud te, “Balabag ban, Yawi gfoyung nusnga sinu fia at nafili fag ngay tagfon fanggalangun tagfakamulun laman sa anya, ay gfakbang ban sit daga salubangan.

^6-7 Nu katanya, balabag ban, katatuy ay fagnamakamulunun: namul ban am ay famanus famaebebanglu, ay suadi singsing afuy ay famaebebanglu ay bubai sis Yawi at daga salubangan. Ay sumaful ban tam te, sinu Yawi at nafili at yud e malong. Am fag ngay taw Lebi nafasawe am nu gfakamulun am.”

⁸ Ay Muisis nalong yangay sas Kura te, “Am fag ngay taw Lebi, dungugani.

⁹ O nunda yam guseganan dewa am wan Israel at Dius at nafili at masine nangakbang sa at daga salubangan laman gfakamulun sit bale ramit, laman sa sangay taw Israel?

¹⁰ Yawi nafili ayu ay anggan tibak taw Lebi laman manangakbang sis Yawi at daga salubangan, ay katsi, ay fakaylatun umsik ngay tagfon am fanggalangun.

¹¹ Yawi wan ay nafayud, bunwa Arun.”

¹² Sanya ginan, Muisis nafauro Datan ay Abiram, Elyab at ngay baguama. Dewa katanya, duksay nabalus te, “Wami galo!

¹³ O nunda ya kasakan sa emu, am natabanan emi siginans talun Igiptu, sanya at masine ay maramraman fag talun, laman nangabul ami stie fag talun at yud e taw? Ay katsi, kaylat o namagtainan emi.

¹⁴ Ay wo nataban emi sat masine ay at maramraman fag talun ay wo nafon sa emi ngay gamasun ay em fagtanuman wat ubas. Katsi, wami nangalo emu aroro nafamuag o sa emi!”

¹⁵ Muisis kadotama ay nalong sas Yawi te, “Lag gbul ya ngay taw at ngay fanggalangun. Kwe asalanan sa anya fagayu; kwe nabul nusdi sadik asnu siginan anya fagayu.”

¹⁶ Muisis nalong sas Kura te, “Balabag ban, o ay am ngay ufud akbangi sis Yawi at daga salubangan sis Yawi at bale, ay anggan ban Arun nangakbang yangay sanya.

¹⁷ Ay fabubai sam ufud fag duak sandan limak safuluk taw mesa sadik famanus famaebebanglu. Ay suadi famaebebanglu ay foni sas Yawi. Am wan ay Arun at namuba famanus famaebebanglu.”

¹⁸ Nu katanya, galay at sadi nabul famanus famaebebanglu ay nafapnu singsing afuy ay famaebebanglu, ay kanya fagayu malindug gasfuan Muisis ay Arun sas Yawi at sakbawan bale.

¹⁹ Ay Kura nu namaful wan fagdaul taw Israel at ngay talananan sas Muisis ay Arun at daga salubangan sis Yawi at sakbawan bale, fagdaul taw Israel at ngay talananan nalag Yawi at kamasinean.

²⁰ Yawi nalong sas Muisis ay Arun te,

²¹ “Ayayui wan siginan kafag ngay taw laman gfabul au vtv anya fagayu.”

²² Dewa katanya, Muisis ay Arun anlub ay nalong te, “Em Dius tagfon leleg sas fagayu taw, o gfalag wo am fandotama sas fagdaul taw Israel at ngay talananan dewa sadi wayk taw at nasalan?”

²³ Ay Yawi nalong sas Muisis te,

²⁴ “Longi sa sangay taw te, ‘Ayayui wan siginans Kura, Datan ay Abiram at bale ramit.’ ”

²⁵ Muisis nalao sas Datan ay sas Abiram, ay ngay taw Israel at ngay fagtainan nanangalo anya.

²⁶ Sanya ginan, kanya nalong sa sangay taw te, “Ayayui wan siginan kafag ngay taw mauri! Ay lag gted nusnge wain at fagagbilugun, aroro nu nafakamulun ro am takatanya, umfaurianan yangay ro am gasfuan anya fagayu aroro sat asalanan.”

²⁷ Nu katanya, ngay taw anyayu siginans Kura, Datan ay Abiram. Datan ay Abiram naduksun ay namalindug sas sakbawan bale ramit gasfuan at ngay talanan.

²⁸ Muisis nalong sa sangay taw te, “Siginan takatanya, sumaful am te, Yawi nasugu angku laman gfakamulun takatanya fagayu, ay bunwa ku fakaylatun.

²⁹ Ay kanya ro fag ngay taw nu kabul nu maugali tua, Yawi wa nasugu angku.

³⁰ Dewa katanya, Yawi ro nu gfakamulun at madulo, nu nafakarang way daga, ay naon anya fagayu, gasfuan fagayu at ngay fagagbilugun ay gfataglayun sas mabulan at fagbanwanan, sumaful ro am te, kafag ngay taw kamabo Yawi.”

³¹ Ay Muisis nu ntabu gfoyung, daga ankarang sis Datan ay Abiram at fagmalindugan,

³² ay daga naon anya fag dua anggan at ngay talanan, gasfuan Kura at ngay ufud fagayu, ay fagayu at ngay fagagbilugun.

³³ Kanya fagayu gleleg gina daga kon anya fagayu anggan at ngay fagagbilugun. Sanya ginan, anfoli wan at daga ay nafamin wan kafag talananan.

³⁴ Fagayu taw Israel anyayu nu nadungug at uroan, aroro nu glong ro, daga kon yangay anya fagayu.

³⁵ Sanya ginan, Yawi nafadasug afuy, ay nafamin Kura at ufud fag duak sandan limak safuluk taw, gina girug famaebebanglu fag fanggalangun.

³⁶ Yawi nalong sas Muisis te,

³⁷ “Longi sas Elyasar, tagfon fanggalangun, Arun at baguama te, ‘Buli at kinkirug fag ngay taw at nagbilug fag ngay fagirugan, aroro kafag ngay fagirugan di e malong.’ Ay longi yangay te, ‘Ukasi fayayui at ngay singsing afuy

³⁸ siginan at fagirugan at kinkirug fag ngay taw aroro sat asalanan. Bebei kafag ngay famanus yakmay anlafi, ay awati kata fanuklub sas fagirugan fanggalangun aroro kanya fagayu nafon fanggalangun sas Yawi ay nafa yud e malong at ngay famanus. Kanya fag fanuklub fagirugan fanggalangun umsik famararang sa sangay taw Israel.’ ”

^39-40 Nu katanya, kata Yawi at suguan siginans Muisis, tagfon fanggalangun Elyasar nabul ngay famanus famaebebanglu mawatan siginans tansu, at kinkirug fag ngay taw at nabuba, ay nabebe ay nawat sik fanuklub fagirugan fanggalangun. Kanya wan at famararang sa sangay taw Israel ay we taw manangakbang sas fagirugan laman girug at famaebebanglu laman sas Yawi, bunway Arun at ngay kasugfunanan, laman wa kafasludan sa anya kata at kinfasludan sas Kura ay sat ngay ufud.

⁴¹ Dewa katanya, balabag di, fagayu taw Israel nafayud yangay Muisis ay Arun ay nalong te, “Nafabul wam Yawi at ngay taw.”

⁴² Ay gina ngay taw masadi gfayud Muisis ay Arun, kanya fagayu nabanawan sas Yawi at bale ay nalag linyabu nu gsifig masakit ay Yawi nafalag at kamasuloan.

⁴³ Nu katanya, Muisis ay Arun nalao sas Yawi at bale at aturunan,

⁴⁴ ay Yawi nalong sas Muisis te,

⁴⁵ “Ayayui sanya ginan fag ngay taw aroro gfamin kwan anya fagayu.” Ay duksay namalub.

⁴⁶ Sanya ginan, Muisis nalong sas Arun te, “Buli am famanus famaebebanglu ay suadi singsing afuy siginans fagirugan fanggalangun. Suadi yangay famaebebanglu ay fasakiti bubai sa sangay taw ay irugi sik fanggalangun laman sas Yawi laman famalyam at ngay taw at ngay asalanan, aroro Yawi andotama ay gfasigad wan nu gfaurianan.”

⁴⁷ Nu katanya, Arun nafaning Muisis at suguan sa anya ay natarung nangakbang sa sangay taw. Gfasigad wan ngay taw nu gafaurianan, dewa katanya, Arun nafon famaebebanglu fag fanggalangun laman famalyam ngay taw at ngay asalanan.

⁴⁸ Kanya namalindug sis wabilug tagleleg yay ay at mabulan fag ngay taw, ay kafag faurianan anragang wan.

⁴⁹ At kinbul labi ufatk libu fituk sandan, ya katap sanya at kinbul aroro sas Kura at asalanan.

⁵⁰ Nu ntabu wan, Arun anfoli wan sas Muisis sis Yawi at sakbawan bale, aroro anragang wan at faurianan.