Tap 12 - Fanawbuid tagsibaliwas Fakayabian

Miryam ay Arun Ankuri Muisis

¹ Miryam ay Arun ankuri Muisis aroro Muisis andadwa sa sik mangena tagsiginans talun Kus.

² Ay kanya fag dua nalong te, “Ay wain? O nunda Muisis way lang Yawi at fagfakamatoanun? Kanya gfakamatoan yangay emi.” Ay Yawi nadungug duksay at longan.

³ (Muisis, nu kamababaun gtungud tua fagayu taw sas fagdaul daga.)

⁴ Nu katanya, Yawi masakit nafakamatoan Muisis, Arun ay Miryam, ay kanya nalong te, “Am fag tulu duksuni ay loi sas Yawi at bale.” Ay kanya fag tulu nalao sanya.

⁵ Sanya ginan, Yawi andasug, siginan sik linyabu takata sik turuk malindug sit Bale at sakbawan, ay kanya nauro duksay Arun ay Miryam. Ay duksay nu nkakbang,

⁶ Yawi nalong te, “Dungugani angku! Nu e taglong kdi si ayu, garingang kro sa anya siginans taginfan.

⁷ Dewa katanya, di katanya nu gfakamatoan au ku fagsuguan Muisis, takamangguna ku ngay taw.

⁸ Nu gfakamatoan au anya gsalubangan mandi mi, aroro nu garingang au sa anya mayamag tua. Ay kanya kata wa nu nalag angku. Nu katanya, wain ay fagmalongun am at mauri sa ku fagsuguan Muisis?”

⁹ Yawi andotama duksay ay nalo wan.

¹⁰ Ay tagsis tungud bale ramit fag linyabu nu nalyam wan, Miryam anke bangbang, ay gladlaksiun wan at balat. Ay Arun nu nalag,

¹¹ kanya nalong sat faduksay Muisis te, “Arian, lag yap gfaurianan emi, dewa ami nafakamulun at yud matuyan sa emu.

¹² Lag gfabayan ta faduksay Miryam, kata sik ngenge at mabulan wan gina kasalug, ay takadan sik baltak at bilug.”

¹³ Nu katanya, Muisis nafainfanyuan sas Yawi te, “Ku Dius, gfainfanyuan au sa emu te, fafiai yap ku faduksay Miryam.”

¹⁴ Yawi nabalus Muisis te, “O nunda at mama nu natufe anya sit mata laman gfae mauri, o kanya wa mabaluanan kaduge fituk menit? Nu katanya, faduksuni anya siginans fagmafulan ay to sanya yap kaduge fituk menit, ay nu nlangfe wan fituk menit, kanya masine wa gsakbo.”

¹⁵ Nu katanya, nafaduksun Miryam siginans fagmafulan ay kanya nabanwan sanya kaduge fituk menit. Ay kaduge Miryam sis day fagmafulan, ngay taw ya gfataglayun nu glao.

¹⁶ Ay Miryam nu nfoli wan sas fagmafulan, ngay taw nalao siginans Aserut, ay kanya fagayu andasug sa sik talun at yud e taw sis Paran.