Takamoyung 9 - Fanawbuid tagsibaliwas Fakayabian

¹ Namatangan au fia fagayu nusnge wain, ay nasaful au te, Dius galaga fagayu taw at matuyan ay at ke fagsafulun, anggan at ngay fakamulun. Dewa katanya, kanya fagayu wa saful te, o at fakadasugan ban sa tuas fakafanyun ay mannga sa ways fandotaman.

² Nusnga sinu fag gaban taw sadi way at fakadasugan, ngay taw at masine ay mauri, at matuyan ay at yud matuyan, at masine ay tagasalanan ay tagfon at fanggalangun ay at yud gfon at fanggalangun. Gsud way at matuyan ay at yud matuyan ay tagfauri ay yud gfauri.

³ Katatuy at yud masine takafasludan stes fagdaul daga, katanya yay ban fagayu at fakatabuan. Ay bundi lang takatanya; ngay taw at fagamatanganun kaduge gleleg fagmauriun way lang ay fagyudun mamatanganan, ay sanya ginan kanya kabul yangay.

⁴ Kaduge sik taw gleleg e fagsegun yay. Kata sik faydayuanan te, “Amasine yap sik tagleleg fag idu nu gamut sik mabulan fag liun.”

⁵ At mafanud, fagayu taw saful way te, kabul. Dewa katanya, at kinbul wa saful ya, ay we fagmabulun ya at fagnamulun, ay wa yangay e gamatang ya anya fagayu,

⁶ ay nalyam wan nu mafangesug, nu kadotama ay nu gfangalabianun, at ugali gina gleleg. Ay wa yangay saful ya fagayu takadasug stes fagdaul daga.

⁷ Useganani, fangoni, ay mamami fanlangu, aroro kanya Dius at fakaylatun am fakamulun.

⁸ Manabayan tua ban o nangus gugat.

⁹ Manabayani magamut am mangena, kaduge Dius at nafon emu fag leleg at yud e masuad stes fagdaul daga. Aroro o wan tagagbilug am nainlufuyan kaduge o stes fagdaul daga.

¹⁰ Fakamuluni am fakamulun kaksvn am fagmakatuun, aroro sa ban at ngay kinbul at fagbanwanan am fakadasugan wo e fakamulun ya. Ay sanya wa yangay e gamatangan ya ay wa yangay e mamatanganan ya ay e fagsafulun.

¹¹ E nalag kyay fia stes fagdaul daga. Bunwa fagayu at masakit gtarung tagbabo, ay bunwa fagayu at mabitsug tagbabo nu gfawayan. Ay bunwa fagayu at ke fagsafulun at ke fakamulun laman at fagbulan at fagayudanun, ay bunwa fagayu ke fagsafulun at maramraman, ay bunwa fagayu ke fagmakatuun tagbabo. Aroro galay sik taw mesa e kayaunanan.

¹² Dewa katanya, kanya wa saful te, ginanya nu kadasug at mafalganan fag buknga laman sa anya. Kanya kata way sik manuk tungud kinsangdaw, ay kata at kin-gamat sas fanggamat albon. Kadasug way lang masakit sat mauri fag taw at mauri fag buknga kata nu kagamat sas sangdaw.

Amasine yap Fagsafulun nu Gamut Yud Mamatanganan.

¹³ E sadi yak fafaskudanan fag fagsafulun ku naylatan.

¹⁴ E sik furuan sirut at yud ngayu tagbanwan sanya. Ay at mabalyanan fag fun gadgaloan at ngay nanamawayan ay natunglu kanya fag furuan.

¹⁵ Ay sanya fag furuan e sik mangama at ke fagsafulun, dewa katanya, kanya sik yud way e kwa. Ay kanya ro mafalangfe way at furuan siginan at fagsafulun. Dewa katanya, we namatang anya.

¹⁶ Nalong au te, amasine yap tua ke fagsafulun nu gamut ke fagmabalyananun, dewa katanya, we gfae mafanud sik taw at maidap ke fagsafulun ay we gdungugan at ngay longan.

¹⁷ Sik taw at ke fagsafulun nu garingang, masine tua nu kadungug, nu gamut sik tagfangguna yud e fagsafulun nu guro.

¹⁸ Fagsafulun nu mafanud, gtungud tua fagagbilugun fag ngay famawayan. Dewa katanya, sik tagasalanan grasras way nusnge wain at masine.