Takamoyung 8 - Fanawbuid tagsibaliwas Fakayabian

¹ We mafasud sik taw at ke fagsafulun at mafayamag tua nusnge wain. Taw at ke fagsafulun mafauseganan tua ngay kamatan ay mafalyam tua nu kabalu.

Faningi Fun

² Faningi tua fun at faugali aroro nafatuyanan o sas Dius te, gfakamulun tua ban o takatanya.

³ Lag o gfabayan am fanambagun sas fun ay lag o galo ngay taw tagamatangan at mauri laman gfauri anya, aroro fun e fagmakatuun gfakamulun at fakaylatun.

⁴ Fun nu nasugu, mabalyanan ay we masalag.

⁵ Ay nusnga sinu tagfaning at ngay suguan di gafaurianan. Sik taw at ke fagsafulun saful way te, ginanya ay setain sik fakamulun nu kafakamulun.

⁶ Aroro fagayu nusnga setaw mesa tua e buknga ay e mesa balyawvtan nu kafakamulun, dewa maksvn ngay taw at fagsalubangun.

⁷ Aroro nusnga sinu we saful takadasug, ay we malong te, katanya takadasug.

⁸ Nu setain taw nu yud mafaragang tagmara, wa yangay mafaragang nu kabul. Kata nu sis awayan, kanya wa makafoli ya. Ay at fagmauriun wa mafalangfe anya siginans fakabulun.

⁹ Nalingaman au fagayu nusnge wain tagstes fagdaul daga, nalag au ngay taw ke fagmakatuun gfauri at iba.

¹⁰ Nalag kyangay nu namoli ngay taw mauri, kanya fagayu ebi ataw tagsakbo gugat sat yud e malong fag furuan Erusalem ay gfakamulun gugat sanya at mauri. Ay fagayu tagbanwan sanya gfauseganan yay anya fagayu dewa nafakamulunan at mauri sanya. Takatanya fagayu we masuad.

¹¹ Way nafaurianan vtv sik taw at nafakamulun at mauri, at ngay iba gamatangan yangay at nanfakamulun mauri.

¹² Sik taw at nasalan sadik sandan ginan, ay dewa yay ngaduge nu gleleg, nasaful au te, amasine yap ban sik taw takalimu tua Dius at fakadasugan.

¹³ Sik taw at mauri at yud kalimu Dius wa ngaduge nu gleleg. Kata way sik aninu at masakit kalyam.

¹⁴ At maidap stes fagdaul daga tibaginan at masine way fag ngay taw tagafaurianan at faurianan ma sat mauri fag taw. Ay at mauri way fag ngay taw tagbul at famonun laman sat matuyan fag ngay taw. Takatanya wa yangay e masuad.

¹⁵ Nu katanya, nu sa way angku, amasine yap sik taw nu guseganan kaduge gleleg. We masine ya laman sa anya stes fagdaul daga nu bunway tagfangon, taginum, ay taguseganan. Siginan takatanya kanya guseganan tua dewa gidapan kaduge gleleg stes fagdaul daga Dius at nafon anya.

¹⁶ Kaduge au gidapan gamatangan fagayu takafasludan stes fagdaul daga, nasaful au te, kaksvn kanya ngay taw nu gugatan gfakamulun kayu menit ay yabi.

¹⁷ Nalag kyangay Dius at ngay fakamulun stes fagdaul daga. Ay nusnga sinu wa makatu gamatangan takatanya. Dewa nusnga setain kanya fag taw at fakamulun laman gamatangan, kanya wa sumaful. Dewa tagsaful fag ngay taw glong te, saful way, at matuyan, kanya wa saful.