Takamoyung 7 - Fanawbuid tagsibaliwas Fakayabian

Ngay Famamatang sabaliwas Leleg

¹ At matuyan fag ngayan gtungud yay at mabyat fag ngay famaebebanglu nu kabayad, ay fakabulun fag menit amasine yap gina kasalug fag menit.

² Amasine yap at nanlag at kinbul nu gamut sa sik tagbia fag ngay falganan, aroro fagayu ban kabul way. Ay fagayu nangus tagleleg yay gamatangan tua gugat takatanya.

³ Fakabaluun amasine yap tua fagmabayanun, aroro fakabaluun gfasine tua taw at leleg.

⁴ At ke fagsafulun fag ngay taw gamatangan gugat sas fakabulun, dewa katanya at ngay yud e fagsafulun, at fagamatanganun sa way lang sfagmabayanun.

⁵ Amasine yap tagdungugan at ke fagsafulun at famararang nu gamut tagdungugan at yud e fagsafulun at famauseganan.

⁶ At yud e fagsafulun nu kase, kata sik dugi nu e natungu taglutik. Ay takatanya we masuad.

⁷ Sik taw ke fagsafulun nu nafamuag way, kanya kata way sik yud e fagsafulun. Nu nabul wo famaylatanun, nafauri wo am fagmasineun.

⁸ Amasine yap tagfatabu wan nu gamut tagfasigad yay. At magwanta amasine yap tua takamatungudun.

⁹ Lag am gfangauri aroro takatanya at yud way e fagsafulun at ugali.

¹⁰ Lag o glong te, “Wain ebi fagtungudun tua katsi nu manabayan?” Aroro kanya fag fagintoun we masuad.

^11-12 Fagsafulun masine kata sik famonun, ay gsud e fanggubukun sas fagayu tagbanwan sas fagdaul daga. Ay at kamafanudan nu ggubuk kata yay salapi. Dewa katanya, tagtungud sas fagayu fagsafulun gdiri tua ngay taw.

¹³ Amatangani Dius at ngay nafakamulun. Sinu at mafasine at nafasik mauri?

¹⁴ Useganani, nu manabayan tua nu mabanwan o. Dewa katanya, nu gidapan way o, amatangani te, Dius wan tagfakamulun tuy fag duak kaugalian. Laman wa tam saful takadasug ban balabag.

¹⁵ Kaduge au gleleg at yud e masuad, nalag au fagayu nusnga setaw. At matuyan fag taw masakit nu kabul dewa matuyan at fakamulun, ay at mauri fag taw ngaduge nu gleleg aroro sat fagmauriun.

¹⁶ Lag o gtuyan am sadili te, matuyan o ay e fagsafulun, aroro nu nafakamulun way o takatanya, gfauri way o am sadili.

¹⁷ Ay lag yangay gfakamulun at mauri ay dangay yud e fagsafulun, aroro manbul o vtv.

¹⁸ Lag o gfasawe siginan nu gfakamulun o takatanya, fakasakani tua, aroro fagayu tagsuyu Dius wa gfasawe fagayu nusnga setaw.

¹⁹ At ke fagsafulun fag taw at fagmafakamulunun gtungud yay safuluk tagfangguna sis furuan daul.

²⁰ Sas fagdaul daga we taw tagfakamulun tua gugat at masine, ay at yud anke asalanan.

²¹ Lag o gdungugan fagayu taw at longan sabaliwa emu, aroro tibaginan ban am fagsuguan way am dungganan tagaringang at mauri sabaliwa emu.

²² Aroro saful way o te, anggan o, ngayu ginan nu nalong o at mauri sabaliwa am ngay iba.

²³ Nafaskud kwan gamatangan fagayu takafasludan stes fagdaul daga siginan ku fagsafulun. Nu glong kro saful kway ay aroro mangaro duan.

²⁴ Kwa nyamag at ngay takafasludan aroro maidap kamatangan. Ay nusnga sinu fag taw we makatu kayamag.

²⁵ Dewa katanya, gfataglayun au gamatangan ay gfanginsaful, laman umke fagsafulun au ay mafabalus au ku ngay fagintoun, ay laman sumaful au te, se aksvn tagfakamulun at mauri nu yud mamatanganan, ay se aksvn nu mauri at yud mamatanganan at amatanganan.

²⁶ Nasaful au te, sik takamaylatan fag mangena amauri yap tua fakabulun. Kanya nu kesug kata sik sangdaw ay at take nu gugwan emu kata sik salambitan. Ay ngay taw at matuyan sas Dius masaruyan tua kanya fag mangena. Dewa katanya, at mauri fag taw gatabanan way.

^27-28 Au fag takamoyung glong au te, “Namatangan au fia fagayu nusnge wain, laman grvbvy au famalus ku ngay fagintoun. Dewa katanya, kwa nasaful at famalus ku ngay fagintoun. Ay nasaful au sik mafanud, nalag au sadik libuk mangama, ay kayu kanya sadi way at matuyan, ay si sik libuk mangena nusdi sadi we matuyan.

²⁹ Tagtungud sas fagayu, nasaful au te, Dius nawat ngay taw e fagmatuyanun, dewa katanya, ngay taw gamatangan ngayuk balyawvtan laman umsik mauri.”