Takamoyung 6 - Fanawbuid tagsibaliwas Fakayabian

¹ Ay e nalag au sik yud masine at kindasug sas fagdaul daga tagfaidapan ngay taw.

² Dius nafon sa tibak taw at ngay fakaylatun at fakatogdungugun, ngay fagagbilugun ay ngay ramraman. Dewa katanya, Dius wa naylat kafag ngay taw nu gagbilug takatanya fagayu, abat ngate, tiba way ktaw at nagbilug takatanya fagayu. Takatanya wa masine ay we masuad.

³ Nalong au te, amasine yap tua sik ngenge at kinbul gina kasalug nu gamut sik taw tangaduge nu gleleg ay anke ngenge yay sadik sandan, ay kanya ngap wa nke fagmabayanun ay wa nanamoli ya anya sat masine fag fagfolian.

⁴ Dewa yud e masuad kanya fag ngenge at nasalugan, ay dewa sis buknga fagfolian ay wa kamatang,

⁵ ay dewa yud nalag at mayamag, ay deyud namatang leleg, kanya amabayan yap tua kanya fag taw

⁶ at yud e fagmabayanun sat nabul nusnga setaw ay dewa duak libuk banwa nu gleleg. At mafanud sadi way fagayu taw at fakadasugan.

⁷ Taw gfakamulun laman e fakonun, dewa katanya, kanya ya guseganan.

⁸ Nu katanya, nataw at ke fagsafulun at fagmatungudun at yud e fagsafulun? Nataw at yud e kwa at nabul dewa nasaful gbalyawvtan kaduge mabanwan?

⁹ Duan, we masuad! Kata way nu nafafalo tagmara! Nu katanya, useganani wan nusnge wain tagsi emu, abat ngate o gamatangan gugat ngay nusnge wain yud e si emu.

¹⁰ Fagayu takadasug sas fagdaul daga ay sa sik taw, siginan ebi mafalganan wan. Nu katanya, we tungkul tam nafabadbaboan Dius, aroro kanya gtungud tua antam nu mabalyanan.

¹¹ Ay kaduge tam gfabadboan, kayu way tam ngay aringang at yud e masuad. Ay nataw at fanambagun takatanya?

¹² We taw nasaful at masine laman sa sik taw yud ngaduge ay at yud e masuad at leleg, kanya kalyam way kata aninu. Ay sinu at malong sa anya takafasludan ban sas fagdaul daga gina kanya anbul?