Takamoyung 5 - Fanawbuid tagsibaliwas Fakayabian

Lag Gabanganan nu Gfatuyanan o sas Dius

¹ Gina am glao sas Dius at bale dirii tua ay ngay fakamulun. Masine tua nu sanya o nu mafalganan tuo gfaning Dius, ay bundi kata sik taw at yud saful masine ay mauri nu sabaliwa nu gfon at fanggalangun.

² Lag gabanganan nu garingang o. Ay nu namatuyanan o sas Dius amatangani tua. Amatangani te, Dius si tuas banwa ay o ste way o sdaga. Nu katanya, dirii tua nu garingang o.

³ Nu setain sik taw nu masakit gtaginfan gina ngayu at fagamatanganun, katanya yangay nu masakit way nu garingang o, am aringang kata way sik taw at yud e fagsafulun.

⁴ Nu nafatuyanan o sas Dius, fafasludani tua vtv. Fafasludani am ngay fatuyanan sa anya, aroro kanya wa guseganan at yud e fagsafulun yud gfafasludan at ngay fatuyanan.

⁵ Lag ngap o gfatuyanan, nu dway o gfafasludan.

⁶ Lag o gasalanan siginan am aringang, ay lag o nanlong sa tagfon fanggalangun tagsis Yawi at bale te, bunwa am algan. Aroro Dius kauri nu nafakamulun way o takatanya ay gfayud e tungkul fagayu am ngay nainlufuyan.

⁷ Tangayu fag taginfan ay fag aringang we masuad. At masine, suyui tua Dius.

Ramraman We Masuad

⁸ Lag o kadulo dewa o e nalag si ay furuan ngay yud e kwa nu gafalingunan, ay nu yud gfon fagmabayanun ay fagmakatuun. Aroro tagfaidapan kanya fag ngay yud e kwa, sik tagfangguna, ay e gfadiuganan yangay kafag tagfangguna tiba yak tagfangguna tagtungud tua anya.

⁹ Dewa katanya, funan tua tangayu at fagmabulun nusnga setaw siginan at yud e kwa fag ngay taw at ngay daga.

¹⁰ Ngay taw tagfangalabian salapi ay tiba yak ramraman, bunwa ban kabavn nu guseganan. Wa yangay e masuad takatanya.

¹¹ Kaduge am ramraman kaayu, kaayu yangay am fagfaloan. Nu katanya, am ngay ramraman we fanambagun sa emu, nu bunway gdama way o lang.

¹² Sik tagfakamulun masine tua nu gtiug, at fakonun dewa alay ay ngayu, dewa katanya, at maramraman wa katiug aroro sat ramraman.

¹³ Nalag au at yud masine ste sfagdaul daga. Taw gfaful ramraman ay kanya gfauri way anya.

¹⁴ At ramraman namin wan aroro nafalao way sat yud matuyan, ay wa nke sawad ya sat ngay sisian.

¹⁵ Watam e lanbung gina tam kasalug siginan tam mina at ungdan, ay katanya yangay ban gina tam kabul. Ay wa ban tam mabuba tam ngay nainlufuyan.

¹⁶ Ay katatuy ya at mauri nu kamatang gina tam kasalug wa tam e buba, ay anggan ban gina tam kabul wa tam yangay e buba. Nu katanya, nataw ya ban famangsi tam nainlufuyan? Wa ban e masuad takatanya kata way nu gfafalo tam tagmara.

¹⁷ Kaduge tam gleleg ngayu tam fagidapun, fagmauriun, fakasaitun ay tam fakauriun.

¹⁸ Dius at nafon antam tam leleg ste swa daga wa ngaduge. Nu katanya, namatangan au te, sik taw masine nu gfangon ay nu ginum ay nu guseganan at nainlufuyan, aroro kanya fagayu, anya wan.

¹⁹ Dius gfon sas galay sik taw ngay fagagbilugun ay ramraman. Ay kaylat kafag ngay taw nu gagbilug kafag ngay ramraman, laman mafabul at fagagbilugun ay guseganan sat ngay nainkidapanan. Kanya Dius at fon sa anya fagayu.

²⁰ Ay aroro Dius nafae fagusegananun tua ngay taw nu gfakamulun sas nusnge wain at mafauseganan, kanya fag ngay taw wa gamatangan ya te, wain fagyudun ngaduge at ngay leleg.