Takamoyung 4 - Fanawbuid tagsibaliwas Fakayabian

¹ Nadog au nalag ngay nu e kamalingun stes fagdaul daga. Nalag au ngay tagafalingunan nu gwayway ay at yud ya e gfasun, aroro tagfalingun mabalyanan.

² Nu katanya, nalong au te, amasine yap at kinbul nu gamut tagleleg.

³ Dewa katanya, gtungud yay nu masine at yud ansalug ay at yud yay nalag at mauri ste sfagdaul daga.

⁴ Nalag kyangay taw nu gugatan gfakamulun fagayu sas fagdaul at fagmakatuun aroro galabian at ngay iba. Fagayu takatanya we masuad, kata way nu gfafalo tagmara.

⁵ Ngay taw at momuy we fagsafulun, nu katanya, gakabulun wan sas fanlunus.

⁶ Amasine yap fakonun dewa way sik galumut nu manabayan tua, abat ngate ngayuk fakonun ay maksvn nu gidapan gfakamulun ay fagayu wa nke masuad. Kata way nu gfafalo o tagmara.

⁷ Gdog kyay fia e nalag stes fagdaul daga at yud e masuad.

⁸ E sik taw tagsadilian way kaduge gleleg. Kanya we sisian ay we faduksay. Dewa katanya, kanya wa gfaragang nu gfakamulun ay ya guseganan at ramraman. Ay kanya nalong te, “Kwe buknga ya guseganan aroro maksvn nu gfakamulun au. Dewa katanya, kwa ban e fagfatigwanan ya fagayu ku ngay nainlufuyan.” Ay takatanya we masuad! Ay maksvn nu mabalu takatanya fag leleg.

⁹ Amasine yap at ke faudgufudan nu gamut nu tagsadilian, aroro ayu yap at fagmafakamulunun.

¹⁰ At sadi nu nlub e namalindug tua. Ay mafanyuan way sik taw tagsadilian nu nlub, aroro we ggubuk ya anya.

¹¹ Ay nu marios gtaladan am gtiug ay kedkenbungan. Dewa katanya, nu gsadilian way o, tain ro nu kaenbung o?

¹² Nu sadi way o, gababawan way o vtv, ay nu e ufud tuo, diam gababawan. Kata yangay sik lubid at maidap glifung nu tulu wan at fangawat.

¹³ Sik baguama at yud e kwa, at ke fagsafulun tua, kanya amasine yap sa sik fun at mafagtainan at yud e fagsafulun ay at yud kaylat gafoyungan.

¹⁴ Kanya fag baguama dewa ankubung, umsik fun, dewa katanya kanya fag fun at mafagtainan umsik maidap dewa maramraman siginan nu kasalug.

¹⁵ Dewa katanya, nalag au te, ngayu bank taw ste swa daga tagalo kanya fag baguama at nangungbus kanya fag fun.

¹⁶ Ay dewa ban yud katap ya at fagfunanun, at fadogan ban fag kasugfunanan wa guseganan anya. Ay anggan takatanya we masuad, kata way nu gfafalo o tagmara.