Takamoyung 2 - Fanawbuid tagsibaliwas Fakayabian

We Masuad Tam Fagusegananun

¹ Nafaskud kwan taguseganan nusnge wain at maylat sa angku. Dewa katanya, nasaful kwa te, takatanya we masuad.

² Ay anggan tagsawe nu kase ay taguseganan maksvn, wa yangay e masuad.

³ Ay nafaskud kwan taguseganan ginum fanlangu. Dewa au e fagsafulun, nafakamulun au kata yud e fagsafulun, aroro namatangan au te, katanya tua siring ngay taw at fakamulun at masine dewa yud ngaduge at leleg ste swa daga.

⁴ Nafakamulun kwan nusnge wain at madulo. Ay nafawat au ngay bale ay nafatanum kya sik ngay wat ubas.

⁵ Ay nafawat kyangay ngay fagaweanan, ay natanum sanya nusnge wain tagrawvg fag ngay fun kayu.

⁶ Nafawat au fagfamiluganan mamam laman tagfarugme ku ngay tanum.

⁷ Nabayad au sik ngay fagsuguan, mangama ay mangena, ay anke fagsuguan kyangay at kinsalug si ku bale. Ay sas fagayu tagbanwan sis Erusalem, angku tua tangayu ku fagbaugun.

⁸ Anke ngay ramraman au sanbung salapi ay gintu, ay tiba yak ramraman siginan ku fagagbilugun fag ngay fun ay fag ngay furuan. Ngayu ku ngay tagsaful galubad, mangama ay mangena, ay ngayu yangay ku mangena. Kanya fagayu tagfae fagusegananun sa sik mangama.

⁹ Fagayu at naguna angku at nabanwan sis Erusalem, we gfasud ku fagmaramramanun ay ku fagsafulun. Ay ku fagsafulun si tua gugat angku.

¹⁰ Fagayu at maylat sa angku anfasludan wa fia. Guseganan au ku bulan sas fagayu ku nainlufuyan. Ay fagayu ku nagwantan katanya at famonun sa angku.

¹¹ Dewa katanya, nu namatangan au fia ku ngay nafakamulun ay ku ngay nagdalanan stes fagdaul daga, we masuad.

¹² Nataw ya ban at fadogan fag fun at fagmafakamulunun? O nunda ban bunwa ebi at kinfasludan wan? Nafaskud kyangay gfaladlabian fagsafulun ay at yud e fagsafulun.

¹³ Ay nasaful kyangay te, amasine yap tua at ke fagsafulun nu gamut at yud e fagsafulun, kata yamag nu amasine yap tuas dulum.

¹⁴ Ke fagsafulun saful tua at fagnangadasugan, ay at yud e fagsafulun nu glao sa ways fagmadulumun. Dewa katanya, nasaful kyangay te, nusnga sinu kabul way.

¹⁵ Ay nalong au sa ku sadili te, at yud e fagsafulun at nadalan, gdalan kyangay ban. Nu katanya, nataw way ban ku fagsafulun at masuad? Ay gdog kyay nalong sa ku sadili te, “Anud, takatanya we masuad!”

¹⁶ Fagayu tam at ke fagsafulun ay at yud e fagsafulun gsud way ban tam kabul ay kalyam.

We Masuad nu Gugatan

¹⁷ Nu katanya, ankuri au ku leleg, aroro fagayu fakamulun stes fagdaul daga at fungfung fagidapun way. Fagayu we masuad, kata way nu gfafalo o tagmara.

¹⁸ Ankuri au fagayu ku nainkidapan ste sfagdaul daga, aroro tuy ban fagayu kafamato way sa tagtubus angku.

¹⁹ Sinu nunda at mafatuyan te, e fagsafulun ay we fagsafulun? Nusnga sinu fag taw magbilug way fagayu ku nainlufuyan ay ku nainkidapanan nafakamulun sas fagdaul ku fagmabitsugun ay ku fagsafulun. Ay fagayu ku nainlufuyan we masuad!

²⁰ Nu katanya, namatangan au te, fangulan ku ngay nainlufuyan stes fagdaul daga.

²¹ Aroro dewa o nagwantan nangagbilug fagsafulun sam amatanganan ay am fagmakatuun, kanya ban fagayu gfamato way o sat yud nainlufuyan fag taw. Ay takatanya wa yangay e masuad ay wa matuyan.

²² Nu katanya, nataw nunda ngay taw at fagmabulun nu gfakamulun gugat stes fagdaul daga?

²³ Ay fagayu at nafakamulun kaduge gleleg gfauri way at amatanganan. Nu katanya, dewa sisad yabi kanya wa katiug. Ay takatanya fagayu wa yangay we masuad.

²⁴ At masine ngay taw at fakamulun gfangon, ginum, ay gfae masuad at ngay nainlufuyan. Nasaful au te, takatanya tua tagsiginans Dius.

²⁵ Ay setain ro nu e fagfangonun tam ay nu gfae masuad tam tam ngay nainlufuyan, Dius way gfon antam?

²⁶ Aroro Dius gfae fagsafulun ay gfae fagusegananun, ay gfasik mamatanganan, fagayu tagfauseganan anya. Ay Dius gfon sa sangay taw tagfakamulun mauri ngay fakamulun laman gfaful ngay ramraman ay gfon sas fagayu tagfauseganan Dius. Nu katanya, ngay taw mauri at fakamulun fagayu we masuad. Kata way nu gfafalo tagmara.