Takamoyung 12 - Fanawbuid tagsibaliwas Fakayabian

¹ Gina yay o masisian amatangi tua at nawat emu, ay gina yud andasug at maidap nu glong o te, “Wa manabayan ya nu gleleg au.”

² Amatangi anya gina menit, magdanun ay galeme gakafalyuun kata linyabu nu nafarum.

³ Kadasug ban sik menit am take tumadtaruyan ay am ngay tud umlukme, ay nu yud o mafaon ya aroro am bagang gsadsadian way lang, ay nu gadarafun o;

⁴ ay gina o yud bangan gdungug ya, dewa fanlubuk gawang, ay ngay manuk tungud nu guni ay tagsaful galubad nu galubadan;

⁵ ay kagawan ban o nangundaud sa tangabat fag buksul, ay kayudbak waban o gsadilian glao sa sangaba dalan; ay nu gubanun waban o, ay gina ban o yud bangan malao ya, ay way ban o gamatangan ya fagayu am fakaylatun. Ay sa ban taguyan, glao wo sam fagbanwanan yud katabu ay ngayu ban takabalu emu sa sangay dalan.

⁶ Nu katanya, amatangi tua gugat Dius kaduge o gleleg, kaduge yud anlifung salambitan fag salapi ay kaduge yud anrufa fagsuadan at mawatan siginans gintu, ay gina yud anlifung fagsuadan mamam at salod sis bubun, ay yakmay bubun at fantabun anrufa.

⁷ Ay nu katanya, nangafoli o sas daga, am fakasigadan, ay am falad umfoli wan sat nafon emu fag Dius.

⁸ Takamoyung nalong te, we masuad! Matuyan wan fagayu we masuad!

Nu Gsuyu ay nu Gfaning Dius

⁹ Saman ya kanya fag takamoyung at fagsafulun, kanya nafoyung yay sa sangay taw kata at fagsafulun. Ay namatangan tua fia at ngay nalong.

¹⁰ Kanya naugatan tua naringang at matuyan fag ngay longan, ay fagayu at rirukan matuyan ay mafanud.

¹¹ At ke fagsafulun at ngay aringang kata sik tagalaga fagbaugun at bangko at matares laman galaga at ngay fagbaugun ay kata paku at matarukan. Dius nafon antam takatanya laman tam tagulit.

¹² Ku sisian, dirii yangay takatatuy: nu griruk we fakatabuan, ay malufuy way tagsawe nu gadal.

¹³ Katsi, natap wo fagayu, ay kata ya tuy ku fangatulun taguyan: Alimui Dius ay faningi at ngay suguan, aroro katanya galay sik taw at fakamulun.

¹⁴ Aroro Dius ban ginsaful tam ngay nafakamulun, at masine ay at mauri, at masure ay at masuksukan.