Takabalu 5 - Fanawbuid tagsibaliwas Fakayabian

¹ Yawi, amatangi at kindasug sa emi, ay damai tua em nadalan fag fakaplaun.

² Tibak talun at taw nagbilug em ngay daga, ay em ngay bale.

³ Em ngay mama anbul wan, nu katanya, em ngay mina ansik ngay fagbubayun.

⁴ Gbayad way mi em fanginum ay em ngay famaygang.

⁵ Tagfafakamulun emi gfaidapan emi; mamomuy ami ay wami gfiangalay ya.

⁶ Ansik ngay fagsuguan ami sa sangay taw Igiptu ay sa sangay taw Asirya, laman e fakonun ami.

⁷ Dewa em ngay mangaguyang at ke asalanan, ami way tagafaurianan.

⁸ Ansik ngay fagsuguan ami sa sangay fagsuguan, ay we nafalangfe ya emi siginan kafag ngay taw.

⁹ Gina ami grvbvy em fakonun, ngay taw at ke ngay famawayan arvs nafabul emi sis talun at yud e taw.

¹⁰ At kaksvnan nu kalunus ami anke fakasaitun ami, ay maksvn nu garagnat ami.

¹¹ E natugtug em ngay mangena sis furuan Erusalem, ay e natugtug yangay em ngay baguina sis Uda fag ngay furuan.

¹² Ay nasiuk em ngay tagfangguna at ngay take ay narabing sa sangay kayu, ay wa nasuyu ya em ngay fagtainan.

¹³ Em ngay baguama nafabulunan gfakamulun si sangay faglubukan kata sik ngay fagsuguan, ay nafabuba sa em ngay munama at mabyat fag ngay kayu.

¹⁴ Ngay fagtainan wa nanmalunggung ya sa sangay sakbawan furuan laman namon famalun, ay at ngay baguama wa namawang ya ngay fagfawangun.

¹⁵ Wami e fagusegananun ya. Abat ngate ami mafalelegan em afud bilug, kabalu waymi.

¹⁶ Wami e fagmatuyanun ya, ay afanyuan way mi lang, aroro anke asalanan ami.

¹⁷ Nu katanya, gidapan ami gamatangan ay kadulum wan nu kamanawan ami.

¹⁸ Aroro nafabayan wan Erusalem, ay idu talun way lang tagbanwan sanya.

¹⁹ Yawi, o wan tagfunan kabavn ban, gfataglayun tua ban nu gfunan o sas fagayu kasugfunanan.

²⁰ Wain am fagyudun gamatang ya emi? Wain faglugoun nu gfabayan o emi?

²¹ Yawi, fafolii wan emi sa emu. Fafolii wan em fagmanabayanun kata nu gleleg ami ebi ginan,

²² nu ddi o gaiyan emi kabavn, ay kadotama o emi maksvn.