Takabalu 4 - Fanawbuid tagsibaliwas Fakayabian

¹ Ngay taw tagbanwan sis furuan Erusalem ankata sik gintu at yud masine ya, ay kata yangay at mafanud fag ngay gang tagrapyagan way lang sa sangay dalan.

² Ebi, kanya fagayu dewa kata sik gintu, katsi kata way lang sik tikung at mawatan siginans lifak.

³ Ngay idu talun gfasusu tua at ngay riangan, dewa katanya, ku ngay taw madot way sat ngay sisian, gfaning tagbia fag manuk tagsis talun at yud e taw.

⁴ At ngay ngenge at leplep andafut wan sat ngay bibig. Ngay sisian get fakonun, dewa katanya, we gfon.

⁵ Ebi fag ngay taw takon tua gugat at mataba, katsi gakabulun wan sas fanlunus si sangay dalan. Ay at kin-gurang sas fagmaramramanun, katsi gfanrvbvyan way lang sas wa nakaurian.

⁶ Ku ngay kaiban nu gafaurianan, aksvn yap ngay taw Suduma at nadalan fag faurianan. Dius nafauri wa vtv kanya fag furuan ay we nagubuk ya.

⁷ Ebi furuan Erusalem at ngay fun mataglu oma ay mabitsug. Ay kanya fagayu malaksi oma kata sik abue ay sik susu bilug. Ay at ngay fingi gradraskaun oma kata at mafanud fag ngay gang, ay at ngay buk kata gang gmedmeloun.

⁸ Dewa katanya, katsi kanya fagayu alayung yap sik uing, ay wa katoglag ya si sangay dalan, ay maksvn wan nu maniwang kata sik kayu at kinyango.

⁹ Amasine yap sik taw at kinbul sis fagawayanan, nu gamut at kinbul sis fanlunus tagarimanan way nu kabul aroro we fakonun.

¹⁰ Ay sat kindasug fag faurianan sa ku ngay iba, dewa at mafangesug fag ngay mina nafatama wan at ngay mesa sisian ay naon, aroro maksvn nu kalunus.

¹¹ Yawi andotama maksvn furuan Erusalem, ay kanya nairug kafag furuan anggan at ngay fagfatungkudan turuk.

¹² Ngay fun sas fagdaul daga anggan at ngay fagfunanun wa gafanud te, ngay fawayan masakbo sas Erusalem at ngay sakbawan.

¹³ Andasug takatanya, aroro sa sangay taglong ay sa sangay tagfon fanggalangun at asalanan nu gfabul ngay taw at yud e asalanan.

¹⁴ Ay katsi kanya fagayu gfantedan way lang sa sangay dalan kata sik ngay yud glag. Ay at ngay lanbung gatagukun wan, nu katanya, we mananted ya anya fagayu.

¹⁵ Ngay taw guro sa kafag ngay tagfon fanggalangun te, “Ayayui wan! Masuya wayam. Lag am gted emi.” Nu katanya, kanya fagayu nalao wan sa tibak talun, dewa katanya, we naylat anya fagayu.

¹⁶ Yawi nafasaruayan ay wa nagubuk ya anya fagayu. Ay nusnga sinu we gsuyu ya ngay tagfon fanggalangun ay ngay tagfangguna.

¹⁷ Gyawyawa wan nu kamanawan ami at kadugean nu gfanya ami em ngay fagadgalangan fag talun nu ggubuk emi. Ay gulit ami gugat si em fagulitan laman gfanya em ngay fagadgalangan fag ngay talun at yud ngap makatu gfalangfe emi.

¹⁸ Em ngay fawayan glag way em ngay leleganan, ay wami maduksun ya sa em ngay dalan. Matapan way lang em ngay menit, ay munakbang wan em fakatabuan.

¹⁹ Tagfafalo emi fag ngay fawayan asakit yap sik bio. Ay kanya fagayu gfafalo emi sa sangay buksul ay nanbalabag emi sat yud e taw fag talun, laman namawayan.

²⁰ Kanya fagayu nagamat em fun, Yawi at nafili, em fagsegun at namangguna emi sa em fawayan fag ngay talun.

²¹ Am fag ngay taw Edum tagbanwan sis Us, katsi useganani ay fanagsagi, aroro Yawi namaurianan yangay ban ayu. Umfaurianan yangay ban am ay umke fakaplaun.

²² Am fag ngay taw tagbanwan sis furuan Erusalem, gakatabuun wan nu gfaurianan ayu. Ay wa ban glugo ya Yawi gfauli wan ayu siginan ay fagatabananan fag talun. Ay am fag ngay taw Edum, Yawi ban gfaurianan ayu. Aroro sa ay ngay asalanan, kanya ban gfasure ay fagmauriun.