Takabalu 3 - Fanawbuid tagsibaliwas Fakayabian

¹ Gina Yawi kadotama, anfaurianan kyangay.

² Kanya naiyan ay nafalao angku sat madulum abat ngate sat mayamag,

³ ay malayun nu gfaurianan angku kayu menit ay yabi.

⁴ Ay kanya nafamomuy ku bilug ay nalifung ku ngay bini.

⁵ Ay nafae fakabaluun, ay nafae fagidapun angku kata at maubungan fag taw.

⁶ Ay naiyan angku sat madulum, kata sik taw taglugo wan nu mabulan.

⁷ Ay nasiuk angku salambitan ay naubung laman kwa malagyu.

⁸ Dewa au nadarangin laman get gubuk sa anya, kanya wa nabalus angku.

⁹ Ay kanya nafabalabag ngay gang ayu daul sa ku dalan, ay nafasik mabaraud.

¹⁰ Ay kanya kata sik mela at malimu tagfandaya laman nanggamat angku.

¹¹ Ay natangagan angku siginan sad dalan, ay nagat ay naubun wan.

¹² Kanya naton at godun ay nafatiuan sa angku.

¹³ Ay nafana angku ay at banyas natalfus sa ku baga.

¹⁴ Ku ngay kaiban kase angku. Ay buktung menit kanya fagayu galubad gfalingun angku.

¹⁵ Yawi nafadasug sa angku at maksvn fag fagidapun.

¹⁶ Ku ngay bagang anringo wan, aroro kanya nafaon sa angku lagnas, ay nasiad angku.

¹⁷ Kwe fagmanabayanun ya, ay nalyam kwan ku kayaunanan at masine.

¹⁸ Ay nalong au te, “Kwe fagmabitsugun ya, ay kwe fagsegun ya siginans Yawi.”

¹⁹ Kwa magwanta ya at kindasug sa angku fag fagidapun ay fag faurianan.

²⁰ Ay nu gamatangan kway gugat takatanya, kamomuy kwan.

^21-22 Dewa katanya, nu namatang au Yawi nu mafangesug ay nu mafangafanyu yud e fakatabuan, kafoli yay ku fagsegun.

²³ Galay menit, kanya gfasure at fagmatuyanun.

²⁴ Nu katanya, glong au sa ku sadili te, “Yawi wan tagfon angku fagayu ku fagayudanun, ay gafanud au sa anya.”

²⁵ Yawi matuyan tua sas fagayu taw tagafanud ay at ke fagsegun siginan anya.

²⁶ Masine tua tagagwantan gfanya Yawi nu gfalangfe.

²⁷ Masine tua sik taw siginan nu masisian nu saful tua gfaning.

²⁸ Kaduge Yawi gfoyung antam, maragangani ay amatangani tua.

²⁹ Suyui tua Yawi, ay dangay yud e fagsegun.

³⁰ Nu e nafalang at sadi am fingi fasalubangi yap at sadi am fingi. Ay aylati way am ngay fawayan dewa gfalingun emu.

³¹ Aroro Fun Dius ban di gaiyan antam kabavn.

³² Kanya dewa gfaurianan antam, gfalag sa antam at fakafanyun ay nu kesug yud e fakatabuan.

³³ Aroro kanya wa kaylat nu gafaurianan tam ay gidapan.

³⁴ Tiba Tungud fag Dius wa kaylat nu e gfauri ngay taw at maubungan,

³⁵ ay wa yangay kaylat nu e gfayud e masuad ngay taw at fagmatuyanun.

³⁶ Ay sik taw nu dway kaylat gfalfas at yud e asalanan fag taw, tam Fun Dius saful way takatanya fag ngay fakamulun.

³⁷ Fun Dius nu dway kaylat, we kafasludan nusnge wain.

³⁸ Tiba Tungud fag Dius at ke algan fagayu takafasludan, at masine ay at mauri.

³⁹ Nu katanya, wain tam fakauriun nu gfaurianan antam, aroro sa tam ngay asalanan?

⁴⁰ Amatangani nu mabanwan tam, ay afolii sas Yawi.

⁴¹ Ay luangi tam ngay amatanganan ay fabati tam ngay take sa tam Dius tagsis banwa ay longi te,

⁴² “Yawi, anke asalanan ami ay nafamabo emu, ay wo nafalyam ya em asalanan.

⁴³ Ay andotama o emi, ay wo nfanyu ya gfaurianan ay gfabul emi.

⁴⁴ Natabun o emu sik ngay linyabu, laman wo gdungug em ngay darangin.

⁴⁵ Tibak talun nu glag nafakata o emi sik fagukasun.

⁴⁶ Ay em ngay fawayan nafalingun emi.

⁴⁷ Ay nadalan ami sat maksvn fag fagmalimuun, fag fagafanawaun, fag fanrasras ay fag faurianan.”

⁴⁸ Ku liasun nanting aroro sa ku ngay kaiban at nadalan fag faurianan.

⁴⁹ Ay gwayway kway gugat,

⁵⁰ yakmay Yawi nadama stie sdaga.

⁵¹ Anmomuy au maksvn, aroro sat kindasug sa sangay mangena tagsi em furuan.

⁵² Ku ngay fawayan nafafalo angku kata sik manuk tungud, deyud au nafakamulun at mauri sa anya fagayu.

⁵³ Kanya fagayu nafaskud namabul angku siginan nu gfana angku ngay gang, ay nu gfatong angku sa sik bubun.

⁵⁴ Arvs napnut kwan, ay nu glong kro kabul kwan.

⁵⁵ Yawi, gina au sisad basad bubun, nauro au emu.

⁵⁶ Ay nadungug tuo nu gfainfanyuan au get gubuk sa emu.

⁵⁷ Ay andasug tuo, ay nafasun angku te, lag au kalimu.

⁵⁸ Fun Dius, nagubuk tuo angku sa ku fagidapun, ay nafalangfe tuo ku leleg.

⁵⁹ Yawi, nalag o ku ngay fawayan nu gfakamulun sa angku at mauri. Nu katanya, fatuyani te, matuyan ktua.

⁶⁰ Saful way o kanya fagayu nu namasud sa angku, ay at ngay algan sa angku.

⁶¹ Yawi, nadungug o kanya fagayu nu gfalingun angku, ay nasaful o at ngay algan sa angku.

⁶² Fagngabak menit kanya fagayu gkamatoan laman namaurianan angku.

⁶³ Damai, kanya fagayu dewa malunggung ay malindug, galubadan gfalingun angku.

⁶⁴ Yawi, faurianani wan anya fagayu kata at nafakamulun.

⁶⁵ Ay faogati at ngay amatanganan ay faurii anya fagayu.

⁶⁶ Yawi, aroro sa am dotama, fafaloi anya fagayu ay fabuli, laman kanya fagayu kalyam wan siginans fagdaul daga.