Takabalu 2 - Fanawbuid tagsibaliwas Fakayabian

¹ Fun Dius natabun furuan Erusalem sik tagbia fag linyabu, aroro maksvn nu kadotama. Kanya nafalyam Israel at fagmasineun, kata nu nafatong sas daga siginans banwa. Ay nafabayan wan at bale.

² Ay kanya narasras yangay ngay taw Israel at fagbanwanan. Ay siginan at dotama, kanya narufa yangay furuan Erusalem at alad. Ay nafaragang wan sanya fag fagfunanun, ay nafaragang yangay ngay tagfangguna ay nafae fakaplaun.

³ Ay at kaksvnan nu kadotama, kanya nafalyam wan ngay taw Israel at fagmabalyananun ay nafababawan. Kata sik afuy, kanya nafamin ngay taw Israel ay anggan fagayu nusnge wain tagsit ligung.

⁴ Ay kanya gfatiuan at banyas sat ngay taw kata nu at fawayan. Ay nafabul wan at fagfanagsagun fag ngay taw. Ay kanya nafadasug sa sangay taw Israel at dotama kata sik afuy.

⁵ Fun Dius naiklas Israel kata nu at fawayan, ay naiklas yangay ngay furuan at alad, ay anggan fun at alad bale. Ay nafamut yay kafag ngay taw at fakabaluun ay at fagwaywayun.

⁶ Kanya narasras at bale kata way nu sik tanum. Ay kanya nafalyam siginan sangay taw Erusalem at amatanganan ngay fagmafulun ay Famiangalay fag Menit. Ay at kaksvnan nu kadotama kanya naiyan wan ngay fun ay anggan ngay tagfon fanggalangun.

⁷ Fun Dius narasras yangay at fagirugan fanggalangun ay anggan at Bale. Ay kanya nafarasras sat ngay fawayan at ngay dingding, ay kafag ngay fawayan naudguroan sis Yawi at bale kata nu e fagmafulun.

⁸ Yawi anke algan nanrasras furuan Erusalem at alad. Kanya nafalganan laman namakamulun takatanya. Ay nafataglayun at algan.

⁹ Erusalem at ngay sakbawan alad anrasras wan. Yawi nalifung wan ay narasras at ngay faningding sakbawan. Ay at fun anggan at ngay tagfangguna natabanan wan sa tangayayu fag talun. We saful ya Yawi at faugali, ay ngay taglong we taginfan ya siginans Yawi.

¹⁰ Ngay tagfangguna sis Erusalem maragangan malunggung sis daga, ay nafasat ngay alfuyu dafug, ay nasulun saku, laman gfalag te, kabalu. Ay at ngay baguina garungan aroro kapla.

¹¹ Nawayway au ay ku ngay mata anbuksul. Maksvn wan nu gafanawa au ay ku amatanganan kata nu nrapyag, aroro sat kindasug fag faurianan sa ku ngay kaiban. At ngay sisian ay at ngay ngenge anmomuy gina si sangaba dalan.

¹² Kanya fagayu gwayway get fakonun ay mamam sat ngay mina. Aroro maksvn wan nu mamomuy, kata sik ngay tagfawayan at natayukan, ay kanya fagayu garimanan kabul gina at mina gsalilian.

¹³ Furuan Erusalem, nataw ya ku fagmafalongun sa emu? Dada ya nu gfaladlabian au emu? Am ngay natayukan ngabasad wan kata dagat. Sinu ya ban at mafafia emu?

¹⁴ Ay ngay taglong at ngay taginfan wa mafanud. Ay kanya fagayu wa nafoyung ya sa ayu ay ngay asalanan, laman diam gatabanan. Ay at foyungan sa ayu at yud way matuyan.

¹⁵ Ngay taw tagdalan ayu gifulan ay gfablangan at ngay daluap, laman gfalingun ayu. Kanya fagayu glong te, “O tuy oma fag furuan at nalong te, ‘We gtungud nu masine ay fagdaul daga at fagfanagsagun.’?”

¹⁶ Am ngay fawayan gfalingun emu, gifulan ay gfaringgit at ngay bagang ay glong te, “Katsi narasras watam furuan Erusalem! Katsi wan fag menit tam fagfanyaun, ay anfasludan wan!”

¹⁷ Yawi nafakamulun kata at algan. Kanya nafafasludan at nalong. Ay wa nfanyu ya giklas furuan Erusalem! Kanya nafae fagusegananun am ngay fawayan, ay nafabayan nu kamatungudun sat ngay fagmabalyananun.

¹⁸ Ngay taw tagsis Erusalem, uroi sas Fun Dius. Kayu menit ay yabi, waywayi falibisani ay ngay liasun kata sik liskung nu gfamilugan. Lag gfaragang nu gwayway am.

¹⁹ Afuloi sis buknga yabi ay eti gubuk sas Fun Dius. Ay longi wan sa anya fagayu ay fagamatanganun, fakatai nu gbusbus am mamam. Ay darangini fabati ay ngay take laman sa ay ngay sisian at mamomuy kalunus tagsi sangaba dalan.

²⁰ Yawi, damai tua emi. Amatangani nu sinu am fagfauriananun. At kaksvnan nu kalunus ami, at ngay mina naon wan at ngay ngenge. Ay nafabul wan ngay tagfon fanggalangun ay ngay taglong sim bale.

²¹ Ay at kinbul fag ngay sisian ay fag ngay fagtainan grapyagan si sangaba dalan. Ay anggan ngay baguama ay ngay baguina anbul sis fagawayanan. Andotama o anya fagayu, nu katanya, wo nfanyu ya gfabul.

²² Nataban o ngay fawayan laman nansumbalian namawayan angku, kata nu gtaban o anya fagayu sa sik fagmafulun. Gina o nafadasug am dotama, we nalagyu ay we nlangfe ya, ay fagayu anbul wan. Ku ngay fawayan nafabul wan ku nafasalug ay ku nafagurang fag ngay sisian.