Tagfangguna 9 - Fanawbuid tagsibaliwas Fakayabian

Abimelek

¹ Sik menit, Abimelek, Gidyun at baguama nalao sas Sekem sat mina at ngay kalongan ay nalong sa anya fagayu te,

² “Nanginto am sa sangay taw Sekem te, ‘Nataw ay fakaylatun? O kaylat am Gidyun at baguama fag fituk safulu nu nanfangguna ayu, ay mannga at sadi yakman at baguama?’ Amatangani te, au ay kalongan kyangay.”

³ Nu katanya, Abimelek at kalongan fag ngay taw nafakamatoan ngay taw Sekem. Ay kanya fagayu naylat Abimelek nu nanfangguna anya fagayu, aroro kanya fagayu Abimelek at kalongan.

⁴ Kanya fag ngay taw nafon sas Abimelek fituk safuluk salapi siginans Baal-Berit fag fagsegan at bale, ay kanya nabul kafag salapi laman famayad ngay taw at yud matuyan at fakamulun laman gfaning anya.

⁵ Sanya ginan, Abimelek nalao sat mama at bale sas Ufra, ay nafabul at ngay faduksay fag fituk safulu si sik tungud gang, dewa katanya, wa nafabul at arian Utam aroro kanya nasuksuan.

⁶ Ngay taw Sekem ay taw Bet-Milu anful si sik fun kayu daul sis Sekem ay nafili Abimelek laman at fun.

⁷ Ay Utam nu nadungug takatanya, kanya naundaud sas tungud Buksul Gerisim ay nauro sanya fag ngay taw te, “Ngay taw Sekem, nu kaylat am laman Dius gdungug tua ayu, dungugani angku.

⁸ Namoyung au sa ayu sik fansulitan sabaliwa sik ngay fun kayu laman grvbvy at nanfunan anya fagayu. Kafag ngay fun kayu glong sas fun kayu ulibu te, ‘Funani emi.’

⁹ “Fun ulibu gbalus te, ‘O nunda amasine yap nu nanfunan au ayu, abat ngate, gfon au sa ayu langis laman fagnangagbilugun nu gfauseganan ngay fagsegan ay ngay taw? Duan!’

¹⁰ “Ay kafag ngay fun kayu glong sas igus fag kayu te, ‘Funani emi.’

¹¹ “Ay fun kayu igus nabalus te, ‘O nunda amasine yap nu nanfunan au ayu, abat ngate gfon au sa ayu at mataba fag rawvg? Duan!’

¹² “Sanya ginan, kanya fagayu nalong sas wat ubas te, ‘Funani emi.’

¹³ “Ay wat ubas gbalus te, ‘O nunda amasine yap nu nanfunan au ayu, abat ngate nu gfon au sa ayu fanlangu laman sa sangay fagsegan ay sa sangay taw? Duan!’

¹⁴ “Nu katanya, kanya fagayu nalong sat madugi fag tanum te, ‘Oi wan em funan.’

¹⁵ “Ay at madugi fag tanum nabalus te, ‘Nu kaylat am nu gfunan au ayu, sarirungi sa angku. Ay nu dway am kaylat, gfaduksun au afuy tagirug ngay kayu sidru sis Lebanun.’ ”

¹⁶ Utam glong te, “O anud matuyan nu gfili am Abimelek laman ay fun? O takatanya ay fakamulun matuyan sa ku mama Gidyun ay sat talanan? O ay galvngvdan tua sa ku mama at nafakamulun?

¹⁷ Amatangani te, ku mama nafawayan ngay taw Midyan laman sa ayu, ay wa nesug at leleg laman gfalangfe ayu.

¹⁸ Dewa katanya katsi, gfawayan wayam ku mama at talanan. Nafabul am ku mama at ngay baguama fag fituk safulu si sik tungud gang. Ay nafili am Abimelek laman sik fun, ku mama at baguama at sadi sit fagsuguan fag mangena, aroro kanya ay kalongan.

¹⁹ Nu gamatangan am nu matuyan tua ay nafakamulun sa ku mama at talanan, guseganan tuam nangus Abimelek ay kanya guseganan yangay nangus ayu.

²⁰ Ay nu dway katanya, Abimelek nangus gfabul ayu kata sik afuy nu girug. Ay am fag ngay taw tagsiginans talun Sekem ay tagsiginans talun Bet-Milu gfabul yangay am Abimelek kata afuy nu girug.”

²¹ Sanya ginan, Utam nalagyu sas Beer ay sanya wan nu gbanwan aroro kalimu at faduksay Abimelek.

²² Nu nlangfe tuluk banwa Abimelek nu gfunan ngay taw Israel,

²³ Dius naylat Abimelek ay sis Sekem fag ngay taw nu gawayan, nu katanya, ngay taw Sekem nafamabo.

²⁴ Anfasludan takatanya laman famasud sas Abimelek ay sa sangay taw Sekem at nagubuk nu gfabul Gidyun at baguama fag fituk safulu.

²⁵ Ginanya, e ngay taw Sekem nasas buksul laman nanuksuan ay namalabag Abimelek, ay nangago ngay taw tagdalan sanya at ngay famubaun. Ay e nafansulit takatanya sas Abimelek.

²⁶ Ginanya fag buknga, Ebed at baguama Gaal nanamanwan sas Sekem gadgaloan at ngay faduksay. Ay ngay taw Sekem naylat anya.

²⁷ Gina fanrawvgan ubas, ngay taw nawat fanlangu siginans rawvg ubas. Ay kanya fagayu anke fagmafulun ay nafauseganan at fagsegan sit fagsegan at bale. Ay kaduge kon ay ginum fanlangu, ngay taw gfalingun Abimelek.

²⁸ Ay Gaal glong te, “Sinu nunda Abimelek? Ay wain nunda tam fagnamaningun anya? O nunda kanya bunwa Gidyun at baguama? Nu katanya, wain tam fagsuyuun anya ay at fagsuguan Sebul? Kamur tua nangus, ay mangaguyang at kasugfunanan, ay fagnamaningun.

²⁹ Nu au di ay tagfangguna, matuyan, nangaiyan kro Abimelek. Ay glong kro sa anya te, ‘Falganani am ngay tagfawayan, ay nangawayan tam.’ ”

³⁰ Sebul fag tagfangguna sis furuan daul, nu nadungug Gaal at longan, andotama maksvn.

³¹ Nu katanya, Sebul nasugu masuksuk sik ngay tagfosuk longan laman nanlong sas Abimelek te, “Gaal ay at ngay faduksay nastie stalun Sekem laman namanwan ay namaylatan ngay taw laman namawayan emu.

³² Nu katanya, katsi ro sad yabi, tabani am ngay tagfawayan ay nanuksuani sasad araw, sis day furuan daul.

³³ Ay balabag ban, menit nu nsure, sakboi wa vtv sas furuan. Ay Gaal ban ay at ngay taw nu gfawayan way emu, fakamuluni am fakaylatun sa anya fagayu.”

³⁴ Ginanya fag yabi Abimelek ay at ngay tagfawayan nalao, ay nafud sas ufatk gaban at ngay tagfawayan, ay nasuksuan sas day furuan Sekem.

³⁵ Kanya fagayu nu nalag te, Gaal naduksun ay namalindug sis sakbawan furuan daul, Abimelek anggan at ngay ufud naduksun siginan at fagsuksuanan laman namawayan.

³⁶ Gaal nu nalag Abimelek ay at ngay tagfawayan, nalong sas Sebul te, “Damai! E ngay taw kadasug siginans tungud buksul.” Ay Sebul gbalus te, “Am nalag, ngay buksul way at ngay aninu gfaning sik ngay taw.”

³⁷ Gaal gdog yay glong te, “Damai ngani! E ngay taw yangay gtagbung siginans wabilug duak buksul, ay e ngay taw gdalan munakbang sis taginsaful at fagagbilugun fag fun kayu daul.”

³⁸ Sebul gbalus anya te, “Katsi, inday am nafamaneganamaun? O nunda bunwa o at nalong te, ‘Ay wain, sinu Abimelek laman namaning tam anya?’ Katsi, ste wan am fagfalingunun! Loi wan ay namawayan wo anya!”

³⁹ Nu katanya, Gaal nafaful ngay taw Sekem ay nafawayan Abimelek.

⁴⁰ Ay Gaal nalagyu ay Abimelek nanamafalo. Ay ginanya, ngayu at kinbul ay grapyagan way lang anggan wa sas sakbawan furuan daul.

⁴¹ Sanya ginan, Abimelek nabanwan yay sis talun Aruma. Ay Sebul naiyan Gaal anggan at ngay faduksay siginans Sekem.

⁴² Balabag di, Abimelek nadungug te, ngay taw Sekem glaklo sat ngay gamasun.

⁴³ Nu katanya, kanya nafud sas tuluk afud at ngay tagfawayan ay nalao sas gamasun laman namawayan. Ay kanya fagayu nu nalag ngay taw Sekem nu gduksun siginans furuan, kanya nafawayan wa vtv.

⁴⁴ Abimelek fag gaban gfanya sis sakbawan furuan kaduge at duak gaban tagfawayan gfabul ngay taw Sekem sis gamasun.

⁴⁵ Fagngabak menit Abimelek ay at ngay tagfawayan nu gfawayan. Kanya nagbilug kafag furuan ay nafabul fagayu tagbanwan sanya. Sanya ginan, Abimelek ay at ngay tagfawayan naiklas wan kafag furuan ay nafafaragfag barara sanya.

⁴⁶ Ngay taw tagbanwan sis bale ngabat tagsis Sekem nu nadungug takatanya, kanya fagayu nananuksuan sas El-Berit fag fagsegan at bale at maligung dingding alad.

⁴⁷ Ay Abimelek nu nasaful takatanya,

⁴⁸ kanya nataban at ngay tagfawayan sas buksul Salmun. Ay kanya fagayu nu ndasug sanya, Abimelek nabul sik wase ay nalifung ngay sanga ay nafasanan. Ay nalong sat ngay tagfawayan te, “Sakiti, fakamuluni kata ku fakamulun.”

⁴⁹ Ay kanya fagayu nanamul yangay ay nanangalo Abimelek ay nafoli at ngay ba sanga sis day El-Berit at bale dingding alad, ay nasalung. Nu katanya, fagayu taw tagbanwan sis bale ngabat sis Sekem anbul. Fagayu at kinbul nu anggan wa mangena sadik libu.

⁵⁰ Sanya ginan, Abimelek ay at ngay ufud nalao sas furuan Tebes ay nagbilug yangay kanya fag furuan.

⁵¹ Dewa katanya, sanya e sik bale ngabat ay mogat, ay ngay taw Tebes nananuksuan sanya. Ay kanya fagayu nadingding kafag bale at sakbawan, ay naduksun sas tungud bale.

⁵² Ay gina Abimelek ankakbang sanya fag bale ngabat at sakbawan laman nangirug,

⁵³ sik mangena nafatong sas Abimelek sik gang fanligis trigu ay natukan at alfuyu.

⁵⁴ Ay kanya nauro wa vtv tagbuba at famabul ay nalong te, “Fabuli angku siginan am fiso laman ro ngay taw wa glong te, sik mangena way at nafabul angku.” Nu katanya, at tagfawayan nafabul anya.

⁵⁵ Abimelek at ngay tagfawayan nu nalag te, kanya anbul wan, kanya fagayu noli wan.

⁵⁶ Siginan at kinfasludan, Dius nafasud Abimelek at nafakamulun mauri sat mama Gidyun, aroro kanya nafabul at ngay faduksay fag fituk safulu.

⁵⁷ Dius nafasud yangay ngay taw Sekem sat fagmauriun. Nu katanya, anfasludan Utam, Gidyun at baguama at nalong sa baliwa kafag ngay taw.