Tagfangguna 8 - Fanawbuid tagsibaliwas Fakayabian

Gidyun Nafabul Seba ay Salmuna

¹ Ay sanya ginan, ngay taw Efraim nainto sas Gidyun te, “Wain am fagnafakamulunun sa emi takatanya? Wain ay fagyudun nauro emi gina am namawayan ngay taw Midyan?” Kanya fagayu maksvn nu gfabadbaboan Gidyun.

² Ay Gidyun nabalus anya fagayu te, “Nataw ku nafakamulun takafaladlabian ay nafakamulun? Dewa ay nafakamulun talay gtungud yay sas fagayu em talananan at nafakamulun.

³ Dius nafababo ayu sas Ureb ay Seeb, taw Midyan at fun tagfawayan fagdua. Nataw ku nafakamulun laman kafaladlabian katanya?” Gidyun nu nalong takatanya, ngay taw Efraim wa kauri ya.

⁴ Nu katanya, Gidyun ay at tagfawayan fag tuluk sandan nadife Liskung Urdan. Ay dewa maksvn nu kalufuy, gfataglayun yay nu gfafalo at ngay fawayan.

⁵ Kanya fagayu nu ndasug sas furuan Sukut, Gidyun naet sa sangay tagbanwan sanya te, “Foni emi tiba ay fakonun, kalunus ami ay kalufuy maksvn, aroro namafalo yay ro mi Seba ay Salmuna, taw Midyan at fun fagdua.”

⁶ Dewa katanya, ngay taw Sukut at ngay tagfangguna nabalus te, “Taguna, gamati yap Seba ay Salmuna ay nu nafagamat tua ro am, gfon ro mi ayu fakonun.”

⁷ Ay Gidyun nabalus ngay taw Sukut at ngay tagfangguna te, “Yawi ro nu nafababo tua emi Seba ay Salmuna, gfalang kban ayu tagadugiun fag ngay sanga.”

⁸ Sanya ginan, Gidyun naundaud sas Penwel ay katanya yangay at fagetun sanya fag ngay taw, dewa katanya, ngay taw Penwel at famalus kata yangay ngay taw tagsis Sukut at famalus.

⁹ Gidyun nalong sa anya fagayu te, “Nu nababo tua ro mi em ngay fawayan, kafoli yay ro mi stae laman nanrasras ay fagulitan fag bale.”

¹⁰ Ginanya, Seba ay Salmuna sis Karkur gadgaloan at ngay tagfawayan at kinsawad fag labi limak libu. Ay at ngay tagfawayan at kinbul sadik sandan duak safuluk libu.

¹¹ Gidyun ay at ngay tagfawayan nadalan sa sangay taw tagbanwan sis bale ramit sas fakamenitan baliwa sis Nuba ay Ugbea. Ay kanya fagayu nafawayan masakit ngay taw Midyan.

¹² Seba ay Salmuna nalagyu, dewa katanya, Gidyun nafafalo ay nagamat kafag duak fun, nu katanya, Seba ay Salmuna at ngay tagfawayan wa saful ya at fakamulun.

¹³ Gidyun ay at ngay tagfawayan nu noli wan siginan at fagawayanan, kanya fagayu nadalan sa tagundaud fag dalan tagsas Keres.

¹⁴ Kanya fagayu nagamat sik munama tagsiginans Sukut, ay nainto sa anya te, “Sinu ngay taw Sukut at ngay tagfangguna?” Ay kanya fag munama nariruk taw Sukut at ngay tagfangguna fag fituk safulu e fitu at ngay ngayan.

¹⁵ Sanya ginan, Gidyun ay at ngay tagfawayan anfoli sas furuan Sukut ay nalong sanya fag ngay taw te, “Ebi gina ami gdalan ste, kalufuy ami ay kalunus, ay nafalingun am emi te, ‘Wami gfon ayu fakonun yakmay am nagamat Seba ay Salmuna.’ Katsi, ste wan kanya fag dua!”

¹⁶ Gidyun nafaful furuan Sukut at ngay fagtainan ay nafaidapan gfalang siginan sik ngay sanga madugi.

¹⁷ Ay Gidyun narufa yangay sis furuan Penwel fag bale fagulitan, ay nafabul sanya fag furuan at ngay mangama, ay nafabul sanya fag furuan at ngay mangama, ay nafabul ngay mangama tagbanwan sanya fag furuan.

¹⁸ Gidyun nainto sas Seba ay Salmuna te, “Setain ay nafabul sis talun Tabur fag ngay mangama at kawalungan?” Kanya fag dua nabalus te, “Kanya fag ngay mangama kata sik fun at ngay baguama kata emu.”

¹⁹ Gidyun nalong te, “Kanya fagayu ku ngay faduksay, ku mina fia at ngay sisian. Gfatuyanan au sas Yawi, tagleleg fag Dius te, kwa ro gfabul ayu, yaman am nafabul ku ngay faduksay.”

²⁰ Sanya ginan, Gidyun nasugu sat baguama Eter te, “Fabuli anya fag dua!” Ay aroro Eter masisian yay, kanya anlimu way ay wa mafabul kafag duama.

²¹ Seba ay Salmuna glong sas Gidyun te, “Oi wan tagfabul emi, laman nu sik mangama o fia!” Nu katanya, Gidyun nafabul kanya fag dua ay nabul sis duama at ngay kamelyu at daga liug fag ngay famasine.

Gidyun at Mafilian fag Lanbung

²² Ngay taw Israel glong sas Gidyun te, “Aroro nafalangfe o emi siginan ngay taw Midyan, o ban ay am ngay kasugfunanan tagfangguna emi.”

²³ Gidyun gbalus te, “Bundi ban au ay ku ngay kasugfunanan tagfangguna ayu, nu bunway Yawi tua.

²⁴ Dewa katanya, e fagetun au sa ayu te, foni angku ay ngay sulman ay nabul siginan sangay taw Midyan.” (Ngay taw Midyan at ugali gasulmanan gintu aroro kanya fagayu taw Ismael yangay.)

²⁵ Ay kafag ngay taw nabalus te, “Kin, gfon ami emu.” Kanya fagayu narafad sik lanbung ay galay sik taw nafasanya at ba sulman at nabul siginan sangay taw Midyan.

²⁶ At nafaful gintu fag ngay sulman, at kabyatan duak safuluk fabudbungguan, ya sanya ngay famasine ay ngay dalag, ay taw Midyan at ngay fun at lanbung at masialungan, anggan at ngay famasine tagbaringbingan sit ngay kamelyu at liug.

²⁷ Gidyun nafawat sik mafilian fag lanbung siginan kafag ngay gintu, ay kanya fag lanbung nafasat furuan Ufra. Sanya ginan, ngay taw Israel nadog yay natalyuyan Dius ay naseg Gidyun at nafawat fag lanbung. Kanya sik maksvn fag famaskud sas Gidyun talanan.

²⁸ Ngay taw Israel nababo wan ngay taw Midyan, ay kafag ngay taw Midyan wa namawayan ya ngay taw Israel. Ay kaduge Gidyun gleleg, ufatk safuluk banwa taw Israel nu manabayan gbanwan.

Gidyun nu Kabul

²⁹ Sanya ginan, Gidyun, Uas at baguama, noli wan sat bale ay sanya wan nu gbanwan.

³⁰ Gidyun at sisian fituk safulu, aroro ngayu at mangena.

³¹ Gidyun e mangena yay sik fagsuguan sis talun Sekem ay e baguama at ngayan, Abimelek.

³² Gidyun anbul aroro mafagtainan wan, ay e nanamoli anya sat mama Uas at fagfolian sas Ufra, sis Abieser at ngay kasugfunanan at talun.

³³ Ay Gidyun nu nbul wan, ngay taw Israel nafamabo Dius, ay nadog yay naseg Baal. Ay kanya fagayu naseg Baal-Berit laman at fagsegan,

³⁴ ay nalyam wan nu nanseg Yawi at nafalangfe anya fagayu siginan at ngay fawayan tagsit ligung.

³⁵ Ay kanya fagayu wa nafalag famauseganan sas Erubaal (kanya Gidyun at faduak ngayan) at talnayan, dewa ngayu at nafakamulun masine sa anya fagayu.