Tagfangguna 7 - Fanawbuid tagsibaliwas Fakayabian

Gidyun Nababo ngay Taw Midyan

¹ Balabag di, Erubaal (tuy Gidyun at faduak ngayan) masurip nu kafulo gasfuan at ngay fagsuguan tagfawayan ay anful sis bulbug Karud, ay ngay taw Midyan maful sis fawalan fag alvngvdan datag munakbang sis buksul Mure.

² Yawi nalong sas Gidyun te, “Ngayu am ufud. Kanya ro fagayu nu nababo at ngay fawayan gamatangan te, nababo ami taw Midyan siginan em sadili fagmakatuun, ay bunwa siginan angku.

³ Nu katanya, longi sa anya fagayu te, ‘Nusnga sinu takalimu, masine wan glao ste ginans Buksul Gilyad ay ulii wan.’ ” Gidyun nu nalong takatanya, duak safulu e duak libuk taw at noli, at sawad safulu way langk libu.

⁴ Ay Yawi nalong sas Gidyun te, “Ngayu yay at kinsawad. Tabani anya fagayu sasad liskung ay namaskud au anya. Namaskud au anya fagayu te, seyu ro at nangalo emu ay at yud nangalo.”

⁵ Nu katanya, Gidyun nataban at sawad fag ngay taw sasad liskung. Ay sanya Yawi nalong te, “Fasamani fagayu at natas mamam sat daluap ay ginum kata sik idu, ay fasamani yangay tagtudan nu ginum.”

⁶ Ay at nainum natas at daluap, tuluk sandan, ay tiba nu ginum gtudan way.

⁷ Ay Yawi nalong sas Gidyun te, “Siginan kanya fag tuluk sandank taw namalangfe au ay namababo ayu sa sangay taw Midyan. Ay at sawad faulii wan sat ngay mesa furuan.”

⁸ Ay Gidyun nafauli wan at sawad ay nabul yay kanya fagayu at ngay fetus ay at ngay budyung. Ngay taw Midyan at fagmafulan sis lod buksul, ay Gidyun fag gaban sis tungud buksul.

⁹ Ginanya fag yabi, Yawi nalong sas Gidyun te, “Falganani! Nanakbo am ngay taw Midyan at fagmafulan, aroro namababawan au anya fagayu sa ayu.

¹⁰ Nu kalimu way o nansakbo, tabani am fagsuguan Pura ay loi sa sangay taw Midyan at fagmafulan,

¹¹ ay dungugani tagsanya fag ngay taw at ngay nalong, ay nu nadungug ro wo, umbitsug am amatanganan.” Nu katanya, kanya fag dua nalao sas taw Midyan at fatuan fagmafulan, ay sanya e ngay tagfawayan laman gulit.

¹² Ngay taw Midyan, taw Amalek, ay tiba yak kasugfunanan maful sis lod buksul sis fakamenitan baliwa, at kayuan kayu sliung. Ay at ngay kamelyu kayu slagnas sis tigyangan dagat.

¹³ Ay kafag duama nu sanya wan, nadungug duak taw nu gkamatoan. At sadi nalong te, “Nataginfan au, sik tinapay at mabalulang nadagingan sabaliwa tam fagmafulan ay naiklas at sadi tam bale ramit, ay kanya fag bale ramit ankiklas wan.”

¹⁴ Ay at usama nabalus te, “Am taginfan at masuad we tiba nu bunway Gidyun at fiso, Uas at baguama, kanya sik taw Israel. Dius namababo Gidyun sa antam fag ngay taw Midyan.”

¹⁵ Gidyun nu nadungug at kamatoanan sabaliwa at taginfan ay at masuad, kanya naseg Dius. Ay duama anfoli sat ngay ibama sat fagmafulan ay nalong sat ngay ufud te, “Falganani! Aroro Yawi gfababo antam sa sangay taw Midyan.”

¹⁶ Gidyun nafud sas tuluk afud at ngay fagsuguan fag tuluk sandan, ay nafon sas galay at sadi budyung ay tikung ke salung sad basad.

¹⁷ Ay kanya nalong sa anya fagayu te, “Damai gugat angku. Ay nu si wami tam fawayan at fatuan fagmafulan, fakamuluni ro nu setain ku fakamulun.

¹⁸ Ami fag gaban nu nafawang wami em ngay budyung, anggan am katanyai yangay ay fakamulun sis day fagmafulan, fabiai nu guro am te, ‘Sas Yawi ay sas Gidyun!’ ”

¹⁹ Ay nu kawabilug yabi wan, Gidyun ay at ngay tagfawayan fag sadik sandan andasug sat fawayan at day fagmafulan. Gina ngay taw Midyan at ngay tagfawayan natubus tagulit at fagmafulan, Gidyun ay at ngay tagfawayan nafawang at ngay budyung ay narufa at ngay ba tikung.

²⁰ Katanya yangay tibak gaban at nafakamulun. Ay kaduge gbitbitan at ngay salung sit wala fag daluap, ay at budyung sit siun fag daluap, kanya fagayu nauro te, “Gfawayan watam laman sas Yawi ay sas Gidyun!”

²¹ Galay at sadi malindug sit day fawayan at fagmafulan, ay at ngay fawayan gfanguroan glagyu.

²² Ngay taw Israel fag tuluk sandan kaduge gfawang at ngay budyung, Yawi nafasagsagan ngay taw Midyan at ngay amatanganan, ay kanya fagayu gbadbasingan sit fagmafulan. Ay tiba nalagyu sabaliwas Bet-Sita munakbang sas Serera sitsigons Abel-Mekula munakbang sis Tabat.

²³ Sanya ginan, Gidyun nafauro ngay taw Israel siginan Naftali, Aser, ay Manase at ngay kasugfunanan laman namafalo ngay taw Midyan at ngay tagfawayan.

²⁴ Gidyun nasugu yangay sik ngay tagfosuk longan sas Efraim at fagagbilugun fag ngay buksul laman nanlong te, “Balabagi sis Liskung Urdan anggan sas liskung sirut Bet-Bara laman ngay taw Midyan wa malangfe sanya.” Ay fagayu mangama sis Efraim nafaning at suguan, ay kanya fagayu nanangulit sas Liskung Urdan sitsigons liskung sirut Bet-Bara.

²⁵ Ay kanya fagayu nagamat Ureb ay Seeb, ngay taw Midyan at fun tagfawayan fag dua. Ay nafabul Ureb si sik gang at nafangayan te, “Ureb fag Gang,” ay nafabul yangay Seeb sis fagturisan wat ubas at nafangayan te, “Seeb fag fagturisan rawvg ubas.” Ay ngay taw Efraim gfataglayun nu gfafalo ngay taw Midyan. Sanya ginan, kanya fagayu nabuba Ureb ay Seeb at alfuyu sas Gidyun sas dife Liskung Urdan.