Tagfangguna 5 - Fanawbuid tagsibaliwas Fakayabian

Debura ay Barak at Alubad

¹ Gina nababo fag menit, Debura ay Barak, Abinuam at baguama nalubad. Katatuy at alubad:

² Segi Yawi! Aroro Israel at ngay tagfangguna nafangguna ay ngay taw Israel guseganan tua gfaning.

³ Am fag ngay fun ay fag ngay tagfangguna, dungugani! Galubad ami ngay famauseganan sas Yawi, Israel at Dius!

⁴ Yawi, gina o nalo siginans Buksul Seir, ay naduksun siginans talun Edum, daga nauigan ay narak maksvn.

⁵ Yawi, ngay buksul nauigan sim daga salubangan. O wan Israel at Dius at kinsure sis Buksul Sinay.

⁶ Gina Samgar, Anat at baguama, ay Yael at buknga, we nanlao sa tagbia fag ngay dalan. Ngay taw nu glao, sa way at mabaraud fag ngay dalan.

⁷ Ay wa ngayu tagbanwan sis Israel at ngay furuan, yakmay au, Debura, andasug, taw Israel at mina.

⁸ Ngay taw Israel nu naseg tibak fagsegan, sit talun anke awayan. Ay nusdi sadi kafag ufatk safuluk taw Israel we famalabag ay bangko.

⁹ Ay guseganan au sas Israel at ngay tagfangguna, ay anggan sa sangay taw Israel at nafaning tua at ngay tagfangguna. Segi Yawi!

¹⁰ Am fag ngay taw at maramraman tagsakay sit malaksi fag ngay asnu, ay at malunggung sit masine fag ngay faglunggungan, ay anggan am at yud e kwa fag ngay taw taglao way, dungugani!

¹¹ Ngay tagalaga tupa gfansulitan sis tigyangan ngay bubun, sabaliwa Yawi ay ngay taw Israel nu gbabo. Ay ginanya yay, Yawi at ngay taw nanangadgaloan sas furuan daul at sakbawan, ay kanya fagayu glong te,

¹² “Debura, glo watam! Ay kaduge ro tam glao, galubad watam sik alubad tagfauseganan Dius. Ay o, Barak, Abinuam at baguama, alindugi wan ay nanggamat o am ngay fawayan.”

¹³ Nataban au Yawi at ngay taw at kinsawad, ay natagbung ami siginan sangay buksul, laman namawayan ami takadungug ay at mabalyanan fag ngay taw.

¹⁴ Tiba sanya siginans Efraim fag talun, ebi ngay taw Amalek at fagagbilugun fag daga, ay tiba siginans Benamin at kasugfunanan. Ngay fun tagfawayan siginans Makir ay Sebulun fag ngay kasugfunanan nanangalo laman namawayan.

¹⁵ Ay anggan ngay tagfangguna tagsiginans Isakar at kasugfunanan nanangalo yangay Debura ay Barak sa sangaba datag. Dewa katanya, Rubin at kasugfunanan wa masadi, nu katanya, kanya fagayu wa mafatuyan te, nangalo yay ay mannga duan.

¹⁶ Rubin at kasugfunanan, wain ay fakaylatun kafamato magamut ngay tupa? O ay fakaylatun, kaylat am gugat gdungug ngay tagalaga nu giful gfanata at ngay tupa? Matuyan wam e fagmasadiun, nu katanya, wam namatangan ya te, o nangalo yayam, ay mannga duan ya.

¹⁷ Gad at kasugfunanan anfamato yangay sas fakamenitan baliwa Urdan. Ay Dan at kasugfunanan anfamato way sit fagfakamulunan sa sangay sakayan lino. Ay Aser at kasugfunanan anfamato way sis tigyangan dagat sit fagbanwanan.

¹⁸ Dewa katanya, Sebulun ay Naftali at kasugfunanan wa nesug at leleg sa nu gfawayan.

¹⁹ Kanaan at ngay fun andasug sas furuan Taanak tagsis tigyangan Liskung Megidu, laman namawayan ngay taw Israel. Dewa katanya, kanya fag ngay fun we nabul nusdi sadik salapi.

²⁰ Bundi lang Israel at nafawayan Sisera, anggan tua ngay galeme.

²¹ Ay sis Liskung Kisun kafag ngay taw anlimus, kafag liskung sanya wa gugat. Siginans Dius at nafon angku fag fagmabitsugun, gfataglayun au gfawayan.

²² Ay katsi, kadungug tua at ngay kabayu nu kadkalungan.

²³ Sanya ginan, Yawi at tagbarita nalong te, “Faidapani Merus! Ay faidapani yangay tagbanwan sanya, aroro kanya fagayu wa nagubuk gina Yawi gfawayan at mabalyanan fag ngay taw.”

²⁴ Mauseganan tua Yael, Keber at mangena, fag taw Ken, gtungud yay tibak mangena tagbanwan si sangay bale ramit.

²⁵ Gina Sisera naet sa anya mamam, at nafon susu bilug tua, at masuadan sit mafanud fag fagsuadan.

²⁶ Sanya ginan, kanya nabul sik famulpug ay fagtabingan lubyang bale ramit, ay napulpug Sisera at dangasan.

²⁷ Sisera anbul ay matangda way lang sis Yael at daga salubangan.

²⁸ Sisera at mina gbanawan gugat sit fagbanawanan, wa kagwanta ay ginto te, “Wain ku baguama fagyudun kadasug ya?”

²⁹ Ay at ke fagsafulun fia at fagsuguan fag ngay mangena nabalus anya. Ay katanya yay gugat at longan sat sadili te,

³⁰ “Malgau kanya glugo nu gbul ay nu gafud nusnge wain at nabul siginan at fagawayanan: sadi ay duak mangena sas galay sik tagfawayan, ay at mabyat fag lanbung laman sas Sisera, ay sat mina tagridrirukanun fia fag lanbung.”

³¹ Yawi, am ngay fawayan nangus umkamin wan. Dewa katanya, fagayu takesug emu, umkata nangus fia menit nu kasure at maksvn nu masulo. Ay anke fagmabayanun sis talun Israel kaduge ufatk safuluk banwa.