Tagfangguna 4 - Fanawbuid tagsibaliwas Fakayabian

Debura ay Barak

¹ Eud nu nbul wan, ngay taw Israel nadog nafakamulun at mauri sas Yawi at daga salubangan.

² Nu katanya, Yawi nafabayan fun Abin tagsiginans Kasur nu nangagbilug ngay taw Israel. Abin, taw Kanaan at fun. Kanya at ngay tagfawayan at fun, Sisera, ay gbanwan sis Karuset-Aguyim.

³ Sisera e siamk sandank faguyudan fangawayan mawatan sanbung, ay kanya nafaidapan maksvn ngay taw Israel kaduge duak safuluk banwa. Nu katanya, ngay taw Israel gdog yay naet gubuk sas Yawi.

⁴ Ginanya fag buknga, tagfangguna ngay taw Israel, Debura, Lapidut at mangena, ay kanya Dius at taglong.

⁵ Ngay taw Israel nu kaylat way gyafasineun at ngay malong, glao sas Debura sas layag at lanbung, tagsis wabilug Rama ay Betel sis Efraim at fagagbilugun fag ngay buksul.

⁶ Sik menit, Debura nafauro Barak, Abinuam at baguama, tagsiginans Kedes, Naftali at kasugfunanan at fagagbilugun fag talun. Barak nu ndasug, Debura nalong anya te, “Yawi, Israel at Dius, e suguan emu te, namaful o safuluk libuk mangama siginan Naftali ay Sebulun at kasugfunanan, ay tabanani anya fagayu sas Buksul Tabur.

⁷ Namasagsagan au Sisera, fun Abin at fun tagfawayan, nu glao sas Liskung Kisun, gfaudgufudan at ngay tagfawayan ay at ngay kabayu at ke ngay faguyudan. Ay namababo au anya fagayu sa ayu sanya.”

⁸ Ay Barak nalong sas Debura te, “Nu sanya tua ro wo, anggan ro au, ay nu dway ro wo sanya anggan au kwa sanya.”

⁹ Ay Debura nabalus te, “Sabv, nangalo kro emu, dewa katanya, wa ro sa emu nu kafon famauseganan, aroro Yawi namababawan Sisera siginan sik mangena.” Ay Debura nanangalo Barak sas Kedes.

¹⁰ Barak nafauro Naftali ay Sebulun at kasugfunanan, ay at nanangalo safuluk libuk taw. Ay Debura galo yangay.

¹¹ Keber fag taw Ken ansaruayan siginan at kaiban ay nawat at bale ramit munakbang si tagbia fag fun kayu sis Saananim, munakbang sis Kedes. (Ngay taw Ken, Muisis at ifag Kubab at ngay kasugfunanan.)

¹² Ay e nalong sas Sisera te, “Barak nalo wan sas Buksul Tabur,”

¹³ nu katanya Sisera nafaful siamk sandank kabayu ke faguyudan mawatan sanbung, ay anggan at ngay tagfawayan. Ay kanya fagayu nalao siginans Karuset-Aguyim sas Liskung Kisun.

¹⁴ Ay Debura nalong sas Barak te, “Katsi wa fag menit Yawi nu namababo emu sas Sisera. Ay kanya yangay ro taggubuk emu.” Nu katanya, Barak natagbung siginans Buksul Tabur gadgaloan at ngay tagfawayan fag safuluk libu.

¹⁵ Barak ay at ngay tagfawayan nu gfawayan wan, Yawi nafasagsagan Sisera ay anggan at ngay tagfawayan ay at mafananadan gsakay sis kabayu at faguyudan. Nu katanya, Sisera natos siginans faguyudan ay nalagyu.

¹⁶ Barak ay at ngay tagfawayan nafafalo Sisera ay at ngay tagfawayan at mafananadan gsakay sis faguyudan. Kanya fagayu nafafalo sitsigons Karuset-Aguyim ay nafabul at ngay fawayan, ay we nlangfe nusdi sadi.

¹⁷ Ay Sisera nalagyu sas Yael, Keber at mangena at bale ramit, aroro Abin, talun Kasur at fun ay Keber fag talanan ggadgalangan.

¹⁸ Yael nafablang Sisera ay nalong te, “Gewan, sakboi sa ku bale ramit, lag kalimu.” Nu katanya, Sisera nasakbo sat bale, ay Yael natabun anya sik umut.

¹⁹ Sisera nalong sas Yael te, “Foni angku mamam, gurungan au kadanum.” Nu katanya, Yael naluab at fagsuadan susu bilug ay nafainum Sisera, ay nu nainum wan, kanya gdog yay natabun.

²⁰ Sisera nalong te, “Malindug o si sakbawan bale ramit. Ay nu e ndasug, ay ginto te, ‘O ste e tibak taw?’ longi te, ‘Duan.’ ”

²¹ Ay aroro Sisera maksvn nu kalufuy, kanya natiug ngabasad. Ay gina gtiug, Yael nabul sik fagtabingan lubyang bale ramit ay famulpug, ay narimanan nangakbang sas Sisera. Ay Yael napulpug at ba fagtabingan lubyang sas Sisera at dangasan, ay antalfus ay antaruk sas daga, nu katanya, Sisera anbul wan.

²² Barak ay at ngay tagfawayan nu ndasug laman nanrvbvy Sisera, Yael nafablang anya, ay nalong te, “Gewan, namalag au ayu ay fagrvbvyun fag taw.” Nu katanya, Barak nanangalo anya ay nalag Sisera nu mafolian lang, ay matalfusan sit alfuyu sik fagtabingan lubyang.

²³ Ginanya fag menit, Dius nafababo ngay taw Israel sas fun Abin tagsiginans Kanaan.

²⁴ Barak ay at ngay tagfawayan gfataglayun nu gfawayan, yakmay nafabul Abin, Kanaan at fun.