Tagfangguna 3 - Fanawbuid tagsibaliwas Fakayabian

At Kinsawad fag ngay Taw sis Kanaan

¹ Yawi nafasawad tibak taw sis Kanaan laman at famaskud ngay taw Israel at yud batang namawayan.

² Yawi nafakamulun takatanya laman gfoyung sa sangay taw Israel at kasugfunanan at yud batang namawayan.

³ Kayu tuy Yawi at nafasawad: ngay taw Filistia tagbanwan sis limak furuan anggan at mesa tagfangguna, fagayu taw Kanaan, taw Sidun, taw Kib ay tagbanwan sis Lebanun fag ngay buksul siginans buksul Baal-Ermun sitsigons Lebu-Kamat.

⁴ Yawi nafasawad kafag ngay taw laman gfaskud ngay taw Israel te, o gfaning tua at ngay suguan at nafon sat ngay mangaguyang siginans Muisis.

⁵ Nu katanya, ngay taw Israel magamut gbanwan ngay taw Kanaan, taw Ket, taw Amur, taw Peres, taw Kib, ay ngay taw Ebus.

⁶ Ngay taw Israel naylat at ngay baguama nu kamubay tagsanya fag ngay taw at baguina, ay nafon yangay at ngay baguina sanya fag ngay taw laman at mangena, ay ngay taw Israel naseg kanya fagayu at ngay fagsegan.

Utniel

⁷ Ngay taw Israel nafakamulun at mauri sis Yawi at daga salubangan, ay nalyam nu gseg at Dius Yawi, ay naseg Baal ay Asera.

⁸ Nu katanya, Yawi ankaksvn nu kadotama ngay taw Israel, ay nafabayan talun Aram-Naaraim at fun Kusan-Resataim nu gbabo anya fagayu. Nu katanya, ngay taw Israel nafagsuguanan ngay taw Kusan-Risataim kaduge waluk banwa.

⁹ Sanya ginan, ngay taw Israel naet gubuk sas Yawi. Ay Yawi nasugu sik taw at ngayan Utniel, Kenas at baguama, laman namalangfe ngay taw Israel. Kenas, Kaleb at arian.

¹⁰ Ay siginan Yawi at Falad at gubuk, Utniel nafangguna ngay taw Israel laman namawayan. Ay Yawi nafababo Utniel sas Kusan-Risataim, Aram at fun.

¹¹ Nu katanya, ngay taw Israel manabayan tua kaduge ufatk safuluk banwa. Ay Utniel anbul wan.

Eud

¹² Ngay taw Israel nadog yay nafakamulun at mauri sas Yawi at daga salubangan. Nu katanya, Yawi nafababawan ngay taw Israel sas Eglun, talun Muab at fun.

¹³ Ay taw Amun ay taw Amalek nagubuk fun Eglun laman namawayan taw Israel, ay kanya fagayu nababo. Nu katanya, fun Eglun nagbilug furuan Eriku.

¹⁴ Ngay taw Israel nafagsuguanan fun Eglun kaduge labi waluk banwa.

¹⁵ Ngay taw Israel nadog yay naet gubuk sas Yawi. Ay Yawi nasugu sik taw laman namalangfe ngay taw Israel. Kanya at ngayan Eud, Gera at baguama siginans Benamin at kasugfunanan. Kanya sik taw at mawala. Ngay taw Israel nasugu Eud laman namon at ngay famayad sas Eglun, Muab at fun.

¹⁶ Gina Eud galoun, nawat sik fiso tagsumbalian at uyup, at kabaan gwabilug sangbada. Ay nataud sit siun baliwa fag balangbang sit daga lanbung.

¹⁷ Ay Eud nu ndasug nafon at ba famayad sas fun Eglun, kanya sik taw mataglu.

¹⁸ Sanya ginan, Eud nu nafon wan at ba famayad, nafauli wan at ngay fadgaloan, ay Eud nanangufud yay.

¹⁹ Ay nu ndasug sat fagsegan fag ngay gang sis Gilgal, kanya anfoli sas fun Eglun, ay nalong te, “Mesug fag fun, e fagyalongun au sa emu sik masuksuk.” Ay fun Eglun nalong sat ngay fagsuguan te, “Duksuni yap.” Ay fagayu at ngay fagsuguan naduksun wan,

²⁰ ay Eud ankakbang sas fun Eglun. Ginanya fun Eglun malunggung gfiangalay sit tiba tungud fag suluk at marios. Ay Eud glong te, “E nalong kyay sa emu.” Ay fun nu nlindug,

²¹ Eud at wala fag take naranggut at fiso tagsit siun fag balangbang, ay naurus fun Eglun at ungdan,

²² ay natalfus sat guyuy. Aroro fun Eglun mataglu, anggan at angkap anfalyu wan, ay kanya wa naranggut ya at fiso.

²³ Sanya ginan, Eud naduksun wan ay nafaksvn sakbawan nu madingdingan.

²⁴ Ay nu nalo wan, fun at ngay fagsuguan anfoli wan ay manlag di at ngay dingding sakbawan maksvn nu madingdingan. Nu katanya, namatangan te, at fun sas alangan way.

²⁵ Ay kanya fag ngay fagsuguan gfanya sis day sakbawan. Ay nu ngaduge wan, wa kabayan, aroro at fun wa gluang sakbawan. Sanya ginan, kanya fagayu nanamul fanluang, ay nananluang sakbawan, ay manlag di at fun anbul wan matangda sad salug.

²⁶ Kaduge kafag ngay fagsuguan gfanya, Eud nalagyu wan. Ay kanya nadalan sa sangay fagsegan fag ngay gang ay nalao sas Seira.

²⁷ Ay nu ndasug sas Efraim fag ngay buksul, kanya nauyup at budyung laman guro ngay taw Israel laman namawayan. Sanya ginan, Eud nafangguna ngay taw Israel nu gtagbung siginan kafag ngay buksul.

²⁸ Eud nalong sa anya fagayu te, “Aloi angku aroro Yawi gfababo wan ayu sa ay ngay fawayan fag ngay taw Muab.” Ay ngay taw Israel nafaning Eud, ay maful sis fagdifean Liskung Urdan laman we malao sas Muab, ay nusdi sadik taw Muab we nadife.

²⁹ Ay ginanya fag menit, kanya fagayu at nafabul safuluk libuk taw Muab at magaras ay at maseganama. Ay we nalagyu nusdi sadi.

³⁰ Ginanya fag menit, taw Israel nagbilug talun Muab. Ay sanya ginan, ngay taw Israel manabayan kaduge waluk safuluk banwa.

Samgar

³¹ Samgar, Anat at baguama, at natubus Eud laman tagfangguna. Kanya nafalangfe taw Israel ay nafabul unumk sandank taw Filistia. At famabul at fanreres baka fag tulag.