Tagfangguna 2 - Fanawbuid tagsibaliwas Fakayabian

Yawi at Tagbarita sis Bukim

¹ Yawi at Tagbarita nalao sas Gilgal ay nataglayun sas Bukim, ay nalong sa sangay taw Israel te, “Nafaduksun au ayu siginans talun Igiptu ay nabuba stae fag daga ku nafatuyanan sa ay ngay mangaguyang. Ay nafatuyanan au te, ‘Kwa ban kalyam ku nasadian sa ayu.’

² Nalong kyangay sa ayu te, ‘Lag am nangawat ay nasadian sa sangay tagbanwan sanya fag daga, abat ngate, rufai wan at ngay fagirugan.’ Dewa katanya, nataw ay nafakamulun? Wam nafaning ku longan!

³ Nu katanya, kwa ban gaiyan ngay tagbanwan si ay daga. Kanya ban fagayu kata sik dugi si ay dalan ay at ngay fagsegan ban kata sik famaskud sa ayu.”

⁴ Ngay taw Israel nu nadungug takatanya, kanya fagayu nawayway maksvn.

⁵ Ay kanya fagayu nafangayan sanya fag talun te, Bukim. Ay sanya nu gfon fanggalangun laman sas Yawi.

⁶ Sanya ginan, Uswe nafalao ngay taw Israel, ay galay sik kasugfunanan nalao laman nangagbilug at ngay mesa daga.

⁷ Ay kaduge Uswe gleleg, kanya fagayu gfaning tua Yawi. Ay dewa Uswe anbul wan, kanya fagayu gfataglayun tua nu gfaning Yawi kaduge Israel at ngay fagtainan gleleg, at nalag Yawi at nafakamulun madulo sas Israel.

⁸ Yawi at fagsuguan Uswe, Nun at baguama, nu kabul, at banwa sadik sandan safulu.

⁹ Ay at iba nanamoli anya sat fagagbilugun fag daga sis Timnat-Eres, tagsis Efraim at fagagbilugun fag ngay buksul, sas wala fag alvngvdan buksul Gaas.

Ngay Taw Israel Anragang nu Gfaning Yawi

¹⁰ Ginanya fag ngay talad kasugfunanan nu nbul wan, at fadogan fag ngay kasugfunanan wa natoglag Yawi, dewa nasaful Yawi at nafakamulun fag ngay madulo sa sangay taw Israel.

¹¹ Ngay taw Israel nafakamulun at mauri sas Yawi at daga salubangan, ay naseg Baal fag fagsegan.

¹² Ngay taw Israel natalyuyan Yawi, at ngay mangaguyang at Dius, at nafaduksun anya fagayu siginans talun Igiptu. Ay kanya fagayu nafaning ay naseg sit ligung fag ngay taw at ngay fagsegan. Kanya fagayu nafadotama Yawi,

¹³ aroro natalyuyan Yawi ay nafaning Baal ay Asturet fag ngay fagsegan.

¹⁴ Ankugat yay Yawi nu kadotama ngay taw Israel Nu katanya, kanya nafabayan ngay tagfangkamul laman namul at ngay ramraman. Ay Yawi nafabayan yangay at ngay fawayan sit ligung nu namawayan anya fagayu ay kanya fagayu wa makatu gbalabag at ngay sadili.

¹⁵ Ngay taw Israel galay namawayan, Yawi at faggubukun at ngay fawayan way, kata ebi at nalong. Nu katanya, ngay taw Israel maksvn nu gidapan.

¹⁶ Sanya ginan, Yawi nasugu ngay tagfangguna laman namalangfe ngay taw Israel siginan kafag ngay tagfangkamul.

¹⁷ Dewa katanya, kanya fagayu wa nadungugan at ngay tagfangguna. Abat ngate, at ngay fakamulun kata way sik tagfaebayad fag mangena siginan nu gseg tibak fagsegan. Kanya fagayu natalyuyan masakit Yawi at ngay suguan, ay wa kata at ngay mangaguyang at nafaning tua.

¹⁸ Yawi nagubuk tua fagayu at nasugu fag ngay tagfangguna ay nafalangfe ngay taw Israel siginan at ngay fawayan kaduge ngay tagfangguna gleleg, ay anfanyu tua, aroro nalag at ngay nakalpan siginan at ngay nafaidapan ay at nafauri anya fagayu.

¹⁹ Ay kanya fag ngay tagfangguna nu nbul wan, ngay taw Israel gdog yay kafoli sat mauri fag fakamulun ay gdog yay gseg tibak fagsegan aksvn yap at ngay mangaguyang at fagmauriun. Ay kanya fagayu wa kaylat gubun at ngay fakamulun at mauri ay at fakamaogatunun.

²⁰ Nu katanya, Yawi nu kadotama ngay taw Israel ankaksvn, ay glong te, “Aroro tuy fag ngay taw nafamabo ku nasadian sat ngay mangaguyang ay wa nafaning ku ngay suguan,

²¹ kwa ban gaiyan ngay taw Uswe at nayud nafaiyan ebi gina gleleg.

²² Ay nangagbilug kban kafag ngay talun at ngay taw laman at fanginsaful sa sangay taw Israel te, o gfaning tua ku ngay suguan kata at ngay mangaguyang.”

²³ Katanya Yawi at fagyudun naiyan kafag ngay taw, ay at fagyudun nafagbilug anya fagayu sas Uswe.