Tagfangguna 16 - Fanawbuid tagsibaliwas Fakayabian

Samsun Nalao sas Gasa

^1-2 Sik menit, Samsun nalao sas Gasa, Filistia at furuan at sadi. Ay sanya, Samsun nalag sik tagfaebayad fag mangena ay nanangalo sat bale laman namataladan. Ay ngay taw Gasa nu nasaful te, Samsun sanya fag mangena at bale, kanya fagayu nananligung fagdaul furuan anggan sat sakbawan ay sanya way gugat fagngabak yabi laman gulit. Ginanya, ya nanamawayan. Nakamatoan yay te, “Si ya bans balabag sirut nu gfabul tam anya.”

³ Ay Samsun nafataladan kafag mangena sitsigons wabilug yabi. Ay kanya nalao sas sakbawan furuan laman namul at famalabag, ay anggan at turuk sakbawan an-gulad wan ay nabuba sas tungud buksul at masalubang sas Kebrun.

Samsun ay Delila

⁴ Sanya ginan, Samsun nalao sa sik furuan sas Liskung Surek, ay naylat sanya sik baguina at ngayan Delila.

⁵ Ngay taw Filistia at limak tagfangguna nalao sas Delila ay nalong te, “Faylatani fia anya laman gfoyung emu tagfae fagmabitsugun anya ay nu setain nu masiuk ami ay mababo anya. Nu nafakamulun tua ro wo takatanya, galay ro ami at sadi gfon ami emu sadik libu sadik sandank salapi.”

⁶ Ay Delila nainto sas Samsun te, “Daginan am fagmabitsugun? Tain ro nu magamat ay masiuk emu?”

⁷ Samsun gbalus te, “Nu nasiuk wa ro angku fituk langi ue melo, kwa ro mkalfas ya.”

⁸ Delila nafoyung takatanya sa sangay taw Filistia at ngay tagfangguna ay nafon sa anya fansalod ay nasiuk Samsun.

⁹ Ay sik gaban at nanggamat, gsuksuan sit day fagtiugan fag suluk. Ay Delila nauro te, “Samsun, e kadasug sik gaban taw Filistia laman nanggamat emu!” Ay Samsun nafalifung way lang at siuk kata nu e nadangdang sik lubid sas afuy. Dewa katanya, ngay taw Filistia wa nasaful te, daginan at fagmabitsugun.

¹⁰ Ay Delila nalong sas Samsun te, “Gsuksuk way o ay kamuag. Agvd, foyungi wa ngani sa angku setain nu e mafasiuk emu.”

¹¹ Samsun nabalus te, “Nu e nasiuk ro angku sik lubid bagu, kwa ro mkalfas ya.”

¹² Nu katanya, Delila nabul sik lubid bagu ay nasiuk Samsun. Ay sik gaban taw gsuksuan munakbang sanya fag suluk. Ay Delila nauro te, “Samsun, e kadasug sik gaban taw Filistia laman nanggamat emu!” Ay Samsun nalifung way lang kafag fansiuk kata nu glifung sik fansimat lanbung.

¹³ Ay Delila gdog yay nalong sas Samsun te, “Dasug katsi gfalingun way o angku ay kamuag. Longi wa ngani matuyan, tain nu makasiuk o?” Ay Samsun gbalus te, “Nu nafasadi wa ro wo ku buk at mafalubidan fag fitu ay nafabarikus kata sik fansimat lanbung nu mafabarikusan, kwa ro dayvm umkalfas ya.”

¹⁴ Ay Samsun gina gtiug, Delila nafasadi Samsun at buk fag fituk mafalubidan ay nafabarikus sa sik turuk. Ay sanya ginan, Delila nauro te, “Samsun, e kadasug sik gaban taw Filistia laman nanggamat emu!” Ay Samsun anfulo, ay masakit nu gluas at buk.

¹⁵ Sanya ginan, Delila nalong sas Samsun te, “Am longan kesug tuo angku, ay wa mangaro mafanud. Katsi at fatulu ginan nu gfalingun o angku. Wain way o fia glong angku nu daginan am fagmabitsugun?”

¹⁶ Kayu menit, Delila gfabulun ginto sas Samsun yakmay kanya ankuri gdungug.

¹⁷ Nu katanya, Samsun nafoyung at matuyan. Ay Samsun gfataglayun glong te, “Siginan nu bagu au kasalug, ya batang e gufo ku buk, aroro sik mafalganan au sas Dius. Ay nu e naufo way ro ku buk, kwa ro e fagmabitsugun ya.”

¹⁸ Nu katanya, Delila namatangan te, Samsun nalong wa at matuyan. Nu katanya, kanya nafadasug sik longan sa sangay taw Filistia at ngay tagfangguna te, “Afolii wan stie aroro Samsun nafoyung wa dayvm at matuyan.” Ay kafag ngay tagfangguna anfoli ay gbuba salapi at famayad sas Delila.

¹⁹ Ay Delila nafatiug Samsun sit tungud balangbang. Ay gina gtiug, Delila nauro sik taw laman gufo Samsun at buk at mafasawaluan fag fitu. Ay kafag taw naufo Samsun at buk. Ay nu katanya Delila nafamomuy anya. Ay Samsun at fagmabitsugun nalyam wan.

²⁰ Ay Delila nauro te, “Samsun, sik ngay taw Filistia kadasug laman nanggamat emu!” Samsun nu nfulo, nu glong ro mkalfas yay kata ebiginan. Dewa katanya, wa nasaful te, Yawi wa ggubuk ya anya.

²¹ Ngay taw Filistia nagamat Samsun, ay nabul at mata fagdua. Sanya ginan, nabuba sas talun Gasa ay nasiuk sanbung ganyang. Ay kanya fagayu nafafakamulun Samsun sisad basad fagubungan laman gligis rawvg trigu.

²² Ay Samsun gina sad basad ubung, at buk gdog yay kaba.

Samsun nu Kabul

²³ Taw Filistia at ngay tagfangguna gdog yay namaful laman namauseganan ay namon ngay fanggalangun sat fagsegan Dagun. Kanya fagayu gfauseganan galubadan te, “Tam fagsegan nafababo antam siginan tam fawayan Samsun.”

^24-25 Ay kafag ngay tagfangguna maksvn nu gfauseganan at fagsegan ay nu guro gfalingun Samsun te, “Tabani stae Samsun laman gfae fagusegananun antam!” Nu katanya, kanya fagayu nafaduksun Samsun siginan sad basad ubung. Ay at ngay taw nu nalag Samsun, galubadan yangay te, “Tam fagsegan nafababo antam sa tam fawayan at nafauri tam talun ay at nafabul tangayu si antam.” Nu katanya, e nataban Samsun ay nanamalindug sis wabilug duak turuk daul, ay kanya fagayu gfalingun anya.

²⁶ Samsun glong sa tagtabanan anya te, “Fatedi angku turuk ay nansarare au.”

²⁷ Ngay taw at kayuan, we fakasakan ya sasad bale. Anggan at ngay tagfangguna sanya wan. At kayuan tagsanya tuluk libu, mangama ay mangena. Ay kafag ngay taw guseganan gfalingun anya.

²⁸ Ay ginanya, Samsun gdarangin te, “Yawi, ku Fun, amatangi angku. Nu masine, fafolii ku fagmabitsugun laman mafasud au ngay taw Filistia at nabul ku mata.”

²⁹ Samsun nafagtean swabilug duak turuk bale tagtukud lafian. At siun fag take gted sit sadi fag turuk ay at wala si yangay at sadi fag turuk.

³⁰ Sanya ginan Samsun nauro maksvn ay glong te, “Kabul kwan gasfuan ngay taw Filistia!” Ay Samsun natulud kafag duak turuk kaksvn at fagmabitsugun, ay at fagmafulan fag bale narit, ay at ngay tagfangguna ay tagsanya fag ngay taw Filistia, natalfian wan. Ginanya, Samsun at nafabul fag ngay taw Filistia ayu yap gina gleleg.

³¹ Ay Samsun at ngay faduksay ay at ngay kalongan nabul at bilug ay nanamoli sat mama Manwa at fagfolian, sis wabilug Sura ay Estaul fag duak furuan. Samsun nu gfangguna ngay taw Israel, duak safuluk banwa.