Tagfangguna 12 - Fanawbuid tagsibaliwas Fakayabian

Efta ay Efraim at Kasugfunanan

¹ Sanya ginan, Efraim at ngay tagfawayan nafalganan ay nadife Liskung Urdan ay nalao sas furuan Safun laman nanlong sas Efta te, “Wain way o nafasaful sa emi nu namawayan o ngay taw Amun? Aroro sam nafakamulun takatanya, nangirug ro mi am bale, anggan emu.”

² Ay Efta nabalus te, “Gina ami fia gfawayan ngay taw Amun, naet ami sa ayu gubuk ay wam nagubuk emi.

³ Fagnasaful kdi te, wam nanggubuk emi, nafalganan au ku sadili laman namawayan. Ay Yawi nafababo tua angku. Wain katsi ay fagyafabulun angku?”

⁴ (Ebi ataw, ngay taw Efraim nalong te, “Am fag ngay taw Gilyad wam katap sas Efraim ay Manase at ngay kasugfunanan.”) Nu katanya, Efta nafaful fagayu mangama ay nanamawayan ngay taw Efraim, ay kafag ngay taw Efraim nababawan.

⁵ Ngay taw Gilyad nagbilug ngay furuan sas fagdifean Liskung Urdan tagsas talun Efraim, laman nusdi sadik taw Efraim we sawad. Ay kanya fagayu ginto sas nusnga sinu taglangfe te, o sik taw Efraim. Ay nu nabalus way te, “Duan,”

⁶ ngay taw Gilyad glong te, “Ay agvd longi te, ‘Syibulit,’ ” aroro ngay taw tagsis talun Efraim wa mafafalong takatanya. Ay kanya ro fag taw nu glong way te, “Sibulit,” gfabul wan anya sanya sas fagdifean Liskung Urdan. Ginanya at nafabul, ufatk safulu e duak libu.

⁷ At Efta nu gfangguna ngay taw Israel unumk banwa. Ay nu nbul wan, nanamoli sa sik furuan tagsis talun Gilyad.

Ibsan, Elun ay Abdun

⁸ At natubus Efta laman tagfangguna ngay taw Israel, Ibsan tagsiginans Betleem.

⁹ Ibsan e unumk safuluk sisian: tuluk safuluk baguama ay tuluk safuluk baguina. Kanya nafafangindugan at ngay baguina sat yud e fakataipan fag gaban. Kanya nu gfunan ngay taw Israel fituk banwa.

¹⁰ Ay Ibsan nu nbul wan, nanamoli sas furuan Betleem.

¹¹ Ay at natubus Ibsan laman tagfangguna ngay taw Israel, Elun tagsiginans Sebulun fag kasugfunanan. Kanya nafangguna kaduge safuluk banwa.

¹² Elun nu nbul wan, nanamoli sas furuan Ayalun, Sebulun at fagagbilugun.

¹³ Ay at natubus Elun laman tagfangguna ngay taw Israel, Abdun, Ilel at baguama, tagsiginans Piratun.

¹⁴ Abdun e ufatk safuluk baguama ay tuluk safuluk fufu mangama, ay galay at sadi e sakayan asnu. Kanya nu gfangguna ngay taw Israel fituk banwa.

¹⁵ Abdun nu nbul wan, nanamoli sas talun Piratun, sas Efraim at fagagbilugun fag ngay buksul, ay taw Amalek at fagagbilugun.